MATEO 17

Jesús quipatac itachiyalis huan quinnextili itatanex

(Mr. 9:2-13; Lc. 9:28-36)

1 Huan quema panotoya chicuase tonati, Jesús quihuicac Pedro huan Jacobo ihuaya iicni Juan, huan tejcoque iniselti ipan se huejcapantic tepet. 2 Huan nepa Jesús quipatac itachiyalis iniixpa huan ixayac cahuanqui quej tonati huan iyoyo mocuetqui chipahuac quej taahuili. 3 Huan nimantzi monextijque Moisés huan Elías huan pejque quicamanalhuíaj Jesús. 4 Huajca Pedro quiilhui Jesús:

―NoTeco, nelía cuali para tiitztoque nica. Sinta tijnequi, tijchihuase eyi pilxajcaltzitzi. Se para ta, seyoc para Moisés, huan seyoc para Elías.

5 Huan quema Pedro noja quicamanalhuiyaya Jesús, temoc se mixti cati cahuaniyaya huan quintzajqui. Huan camanaltic Toteco Dios ipan nopa mixti huan quiijto: “Ya ni Nocone cati niquicnelía. Nijpiya miyac paquilisti ica cati quichihua. Xijtacaquilica cati yaya quiijtohua.”

6 Huan quema imomachtijcahua quicajque ni camanali, moixtapachojque huan nelía momajmatijque. 7 Huan Jesús quinnechcahuico huan quinitzqui sese inijuanti huan quinilhui:

―Ximoquetzaca huan amo ximajmahuica.

8 Huan quema inijuanti ajcotachixque, amo aqui más quiitaque, san Jesús iselti.

9 Huan quema temoyayaj ten tepet, Jesús quinnahuati:

―Amo aqui xiquilhuica cati anquiitztoque hasta na cati niMocuetqui Masehuali niquincajtehuas cati mictoque huan nimoyolcuis sempa.

Jesús quiijto para ya hualajtoc Elías

10 Huan imomachtijcahua Jesús quitatzintoquilijque:

―¿Para ten nopa tamachtiani ten itanahuatil Moisés quiijtohuaj para achtohui monequi hualas Elías huan teipa hualas nopa Cristo?

11 Huan Jesús quinilhui:

―Nelía Elías huala achtohui para quicualtalis nochi tamanti. 12 Pero nimechilhuía, Elías ya hualajqui huan masehualme amo quiixmatque huan san ten hueli quichihuilijque. Huan na cati niMocuetqui Masehuali nojquiya san se nitaijyohuis inimaco.

13 Huajca imomachtijcahua quimachilijque para Jesús quincamanalhuiyaya ten Juan cati tecuaaltiyaya para yaya eltoya Elías.

Jesús quichicajqui se oquichpil cati quipiyayaya se iajacayo Amocualtacat

(Mr. 9:14-29; Lc. 9:37-43)

14 Huan inijuanti sempa ajsicoj campa itztoyaj nopa miyac masehualme, huan hualajqui se tacat huan motancuaquetzqui iixpa Jesús huan quiilhui:

15 ―Tío, xijtasojta nocone huan xijchicahua pampa tapolohua huan taijyohuía miyac. Quemantica huetzi tixijco huan quemantica huetzi atita. 16 Niquinhualiquili momomachtijcahua pero amo huelque quichicajque.

17 Huan Jesús quinilhui nopa tacame cati moquetztoyaj nopona:

―¡Ay anmasehualme cati ama anitztoque, amo antechneltoca! ¿Taya nijchihuas ica amojuanti? Amo xitahuac amotalnamiquilis. ¿Quesqui tonali monequi nimocahuas amohuaya? ¿Quesqui tonali monequi nimechijyohuis?

Huan Jesús quiilhui nopa tacat:

―Techhualiquili mocone.

18 Huan Jesús quinahuati ma quisa iajacayo Amocualtacat cati calactoya ipan itacayo, huan yaya quisqui. Huan nopa oquichpil nimantzi mochicajqui.

19 Huajca tiimomachtijcahua iyoca tijcamanalhuitoj Jesús huan tijtatzintoquilijque:

―¿Para ten amo tihuelque tijchihuaj ma quisa nopa ajacat?

20 Huan Jesús techilhui:

―Amo anhuelque pampa noja pilquentzi antechneltocaj. Nelía nimechilhuía, sinta amotaneltoquilis moscaltisquía quej quichihua se ipilxinacho mostaza, huelis anquinahuatise ni tepet: ‘Ximijcueni huan xiya nepa’, huan nopa tepet mijcuenis huan mochihuas amocamanal. Sinta cuali antaneltocase, nochi anhuelise anquichihuase. 21 Pero ni tamanti ajacame amo quisase sinta amo timosahuase huan timotatajtise ipan Toteco para ma quisaca.

Jesús sempa quiijto miquis huan moyolcuis

(Mr. 9:30-32; Lc. 9:43-45)

22 Huan quema ya tiajsitoyaj ipan tali Galilea, Jesús techilhui tiimomachtijcahua:

―Nechtemactilise na cati niMocuetqui Masehuali inimaco tacame, 23 huan nechmictise, pero ica eyi tonati nimoyolcuis.

Huan tiimomachtijcahua nelía timotequipachojque.

Jesús taxtajqui nopa tomi para tiopamit

24 Teipa Jesús huan tiimomachtijcahua tiajsicoj altepet Capernaum, huan hualajque campa Pedro itztoya nopa tacame cati quisentiliyayaj nopa tomi cati tainamaj para tiopamit huan quitatzintoquilijque:

―¿Amotamachtijca taxtahua nopa tomi cati tainamaj para tiopamit o amo?

25 Huan Pedro quinanquili:

―Quena, taxtahua.

Teipa Pedro yajqui quiitato Jesús campa itztoya ipan se cali. Huan quema Pedro noja ayemo teno quiilhuiyaya, Jesús quitatzintoquili:

―¿Quenicatza tiquita, Pedro? Quema tanahuatiani ipan ni taltipacti tainamaj impuesto, ¿ajquiya quininamaj? ¿Quininamaj ininconehua o seyoc tali ehuani?

26 Huan Pedro quinanquili:

―Quininamaj seyoc tali ehuani.

Huan Jesús quiilhui:

―Huajca amo monequi para tojuanti cati tiiconehua nopa tanahuatijquet ma titaxtahuaca. 27 Pero para amo titecualancamacase, nojquiya titaxtahuase. Xiya nepa campa hueyi at huan xijmajcahua se tepos cuachijcoli para michime. Xijtanana nopa michi cati achtohui tijmasiltis, huan ipan icamac tijpantis se tomi cati quiaxilis para titaxtahuase cati tainamaj para tiopamit. Huajca xijhuicas huan xitaxtahuati para na huan para ta.

<- MATEO 16 MATEO 18 ->