Link to home pageLanguagesLink to all Bible versions on this site
38
Icocolis Ezequías huan quenicatza mochicajqui
(2 R. 20:1-11; 2 Cr. 32:24-26)

1 Huan ipan nopa tonali, Ezequías quipixqui se cocolisti cati chicahuac huan ya itztoya para miquis. Huan na nitajtolpanextijquet Isaías, niicone Amoz, niyajqui nijpaxaloto huan niquilhui:

―Quej ni quiijtohua TOTECO: ‘Xijcualtali nochi tamanti ipan mochaj pampa amo timochicahuas ten ni cocolisti.’

2 Huajca Ezequías mixijcueni huan tachixqui ica campa tapepecholi huan motatajti ica TOTECO, 3 huan quiijto: “TOTECO, na nimitztajtanía xiquelnamiqui quenicatza nelía nimitztequipanojtoc ica temachili huan nimonejnemiltijtoc ica noyolo xitahuac huan nochipa nijchijtinentoc cati mitzpactía.”

Teipa Ezequías mochoquili ica miyac tequipacholi.

4 Huajca TOTECO sempa technojnotzqui niIsaías huan techilhui, 5 ma niya huan ma niquilhuiti Ezequías quej ni: “TOTECO cati iTeco mohuejcapan tata David, quiijtohua ya ni: ‘Na nijcajqui quenicatza timotatajti huan niquitztoc quenicatza timochoquili. Huajca na nimitzmacas seyoc 15 xihuit para noja xiitzto. 6 Huan ta huan ni altepet nimechmanahuis ten nopa tanahuatijquet ten tali Asiria huan na nitatehuis por ni altepet.’ ”

7 Huan na niIsaías niquijto:

―Ya ni nopa tanextili cati mitzmachiltis TOTECO para mitznextilis melahuac quichihuas cati mitzilhuijtoc. 8 Quichihuas para iecahuilo tonati ma tacuepili majtacti pasos ipan ireloj Tanahuatijquet Acaz.
Huan ne tonati tacuepili majtacti pasos cati ya panotoya.

9 Teipa quema Tanahuatijquet Ezequías mochicajqui ten icocolis, quiijcuilo ni huicat ten nochi cati quipanoc:

10 San ninejnentoc tajco ten nochi nopa tonali ten nonemilis huan ama monequi nijcajtehuas pampa nimiquis.
Ayecmo huelis nicaxitis noxihui quej monequiyaya.
Ama ya monequi niyas ipan nopa tali ten miquilisti.
11 Niquijto: “Ayecmo quema niquitas TOTECO ipan ni tali campa itztoque cati yoltoque.
Ayecmo quema niquinitas nohuampoyohua cati itztoque ipan ni taltipacti.”
12 Nopa ajacat ya quihuahuatatzqui nonemilis quej se ajacat quihuica iyoyoncal se tamocuitahuijquet ten tapiyalme.
Huan quej nopa tajtzonquet quitequi se icpat, quej nopa nojquiya ni cocolisti quitequis nonemilis.
Techtaijyohuiltía tayohua huan tonaya.
13 Nitzajtziyaya seyohual por nopa tacuajcualoli ipan notacayo.
Hasta nijmachiliyaya quej elisquía se león techpojpostequilía noomiyohua.
San se yohuali huan se tonal huan nimiquis.
14 Niayijtiyaya quej nopa totot grulla huan quej nopa totot golondrina.
Nitaijyohuiyaya quej se paloma.
Noixteyolhua techcocohuayayaj pampa senquisa nitachixtoya nepa ilhuicac para nijchiyas itapalehuil TOTECO.
Niquijtohuayaya: “¡NoTECO Dios, techpalehui!
Niitztoc ipan se hueyi taijyohuilisti.”
15 ¿Pero taya huelis niquijtos?
TOTECO iseltitzi techmacac ni cocolisti.
Na ayecmo nimohueyimatis sempa por nochi nonemilis,
pampa ipan noyolo tahuel nitaijyohuijtoc.
16 NoTECO Dios, nelía cuali nopa tatzacuiltili cati techmacatoc,
pampa techyacana ipan se nemilisti xitahuac ica ta,
huan techhualiquilía chicahualisti.
Ama techchicajtoc huan techchijtoc noja ma niitzto.
17 Quena, ni taijyohuilisti cati hualajqui ipan na, ama nijmachilía para nelía cuali,
pampa ica ya nopa ta techmanahui ten miquilisti,
huan ama ayecmo tijtachiliya notajtacolhua.
18 Masehualme cati ya mictoque huan ya quintalpachojtoque, ayecmo hueli mitzhueyichihuase.
Ayecmo quichiyaj para ta cati titemachti tiquinpalehuis.
19 San quichiyaj inijuanti cati itztoque.
Quena, san inijuanti hueli mitzhueyichihuaj quej na nijchihua ama ni tonali.
Huan nochi tatame quinpohuilise ininconehua para ta nelía titemachti.
20 TOTECO yaya techchicajqui.
Huajca ama mojmosta nihuicas ipan itiopa TOTECO miyac huicat para nijhueyichihuas.

21 Achtohuiya na niIsaías niquinilhuijtoya itequipanojcahua Ezequías: “Xijtisica higos huan nopa higo tatixti xijpepechoca ipan icocohua Ezequías huan ica ya nopa mochicahuas.”

22 Nojquiya achtohuiya Ezequías tatzintocatoya taya tanextili quimacas TOTECO para quinextilis temachti quichicahuasquía huan sempa huelis yas ipan itiopa.

<- ISAÍAS 37ISAÍAS 39 ->