Jeims

Lasiaat axaau sin gim.

2 Nugu no taamat gim na taton sin abia no mat laxen xonkonon ma mamaet ta xaalame sin gim. 3 Amuina gim atii we, biaa no xonkonon ina nagim no tinaalnge naba til awatwati gim lalon tinaalnge. 4 Gim na tigiri tilwatwat ngalibi biaa namaang ina tilwatwat naba araraai xan tinaxaa lalon gim ngali gim ba maatkel ma xubit araraa. Ngalibi gim ba xap muun ngali xawas. 5 Nawe xa ina gim a xap ie sinaae na ningi Moroaa iwaa naba taal gomsaai araraai abia sinaae ma naba xap taxaariti xa mamaet, ma naba tali sin ia. 6 Oro biaa ta atsura na suk taltaalnge ma na xap puei xan adodo amuina iwaa xa ta puei xan adodo, a malen tuun, maal ta maalen ma ga lii laangen laa tia ma tia. 7 Biaa mat taamat na xap adodo we, naba xap adi xawas sin Moroaa. 8 Ia xo xudu ina taamat a xap man adamis sin no tinaxaa ta xosaraa.

9 Iwaa xida taamat ta suk muun, na paraak amuina a ies lot lalon no matan Moroaa. 10 Oro iwaa untang na paraak amuina iesan adokdok lalon no matan Moroaa. Amuina naba met malen xa nanaal. 11 Pal atsila xaalame lapalaa taman xaraxin lelep ma ga amalangi soksok. No nanaal di ba xol laa lapula ma xan geramis naba se tamsi. Biaa iwaa untang ta lo xoxosaraa xan tinaxaa, naba maraamen sin xan xalkale ina untang.

12 Atubudaani aia xa ta tilwatwat lalon xonkonon amuina nawe a se aiepatsaa abia xonkonon, naba adi xan bungwal ina tino biaa Orong tii se xubatsi ngali abia di, di ta titii ia.

13 Nawe xa atsigaii xonkonon na xap paare we “Moroaa a xonon iaa,” amuina namaang morokon a xap pupua ngali xonon Moroaa o Moroaa a xap xaa xonon xa ngali xosaraa namaang morokon. 14 Oro xonkonon a xaalame sin gita xuxuuk biaa sin xan sasaae morokon tsaa. Xan sasaae morokon naba tataii ia laa palpalaa ngali xosaraa namaang tsaxa. 15 Mil sin sasaae tsaxa ta se tiaan, a taxaali namaang tsaxa ma biaa namaang tsaxa ta se tsap lot ga taxaali minet.

16 Nugu no xos ina taamat, gim nangaam poroklii xaal di na apanaai gim. 17 No tinabel axaau araraa ma no tinabel mamainaang a xaal lapalaa, ga xaalame lapula xaal sin Mom ina no xalaleng tade balalangit; iwaa ta xap puputsi malen no maliip. 18 Tii axilangi ngali tulen xan inesaait so sin gita, ga xosaraa gita ngali tsap nanaaxuuk ina xan no tsi, ina no axoxos araraa.

19 Nugu no xos ina taamat, gim na adodomi abala, no inaman araraa di na isagaa ngali lolong ma di na paare adamis ma di na xap isagaa ngali magaa. 20 Amuina xan minagaa taamat naba xap tali abia tino tutiik Moroaa ta saansili. 21 Biaabi gim na saali no namaang ta pun ma no namaang morokon ta puaren gim ma gim na sirawaa adamisi xan totore Moroaa biaa ta soxaa lalon gim, biaa naba ta pupua ngali atoaa gim.

22 Nangaam alongmen gomsaai mu xan totore Moroaa, gim nangaam apanaai gim tsaa. Gim na xosor puaa senaara ta paare taman. 23 Saa ia ta alongen abala totore oro ga xap xosaraa amusili sawe ta paare taman a malen aia taamat ta lasi no matan lalon tintinarun, 24 o biaa ta matngen araraai ia tsaa a es laa o a xap sauna mu a se adodolii asen mat we. 25 Oro iwaa taamat ta nan axaautsi xan lo tutiik Moroaa, biaa ta tali leiwaa ma ga tigiri xosaraa abala ma ga xap adodolii samaarang tii se alongmen oro a lo xoxosaraa no, Moroaa naba atubudaani ia sin samaarang ta xosaraa.

26 Nawe xa a we ia unlanglangaari, o ga xap arongi ma alatsangi nan xaliman, apanaai ia tsaa ma biaa xan langlangaari asuk maarang gomsaa. 27 Langlangaari biaa xida Mom Moroaa ta sirawaa malen a mixat ma a xap xa daraxe lalon: ngali tilaamamil sin no nantinmet ma no aina nal, lalon xadi no mamaet ma gita na tilaamamil axaau sin gita tsaa ngali biaa namaang tsaxa ina abala xolkolmoxo na xap amorokoni gita.

Jeims 2 ->