1 Nugu no taamat, nawe xa a atsinaa lalon xa namaang tsaxa, gim biaa gim ta us taman Nantanua gim na le gii adamisi ia mula. Gim bula gim na tilaamamil sin gim tsaa o no xonkonon naba soro xonon gim. 2 Gita na alet engen xida no mamaxet, o nawe gim xosaraa weaatia, gim ba xosor puaa xan lo Karisito. 3 O nawe xa, adodo we, ia taamat lot so, sin ia ta taamat gomsaa mu, xan adodo apanaai ia tsaa. 4 Oro xuxuuk ina gita araraa na suk asoi xan namaang axaau tsaa, ngali ia tsaa naba pupua ngali paraak taman ia tsaa, ma naba xap pupua ngali apuaa ia mii xa xaatsap. 5 Amuina gita xuxuuk gita ba atsaxei xida no mamaxet tsaa ngali xida no namaang.

6 Nawe xa alet inanaa lalon xan totore Moroaa, axaau na exasen abia xan no maarang axaau bula mii xan unaasasing.

7 Gim nangaam apanaai gim tsaa. Moroaa a xap ngali reret sin gim, amuina senaara gim ta soxaa gim ba adi tsaa waawaan. 8 Nawe saa ia ta wena amusili namaang tsaxa naba adi tsaa waawaan ina namaang tsaxa biaa minet laaliu. Oro saa ia ta wena amusili namaang ina Nantanua naba adi tino laaliu sin Nantanua. 9 Gita na xap pelmet sin xoxosaraa no namaang ta axaau; gita ba paaski waawaan, sin abia leng so naba ta tsap nawe gita xap pelmet. 10 Biaabi, biaa gita ta pupua tsaa ngali xosaraa namaang axaau sin no inaman araraa, gita na xosaraa weaatia. Oro, xariin maarang mu, gita na xosaraa namaang axaau sin abia xadi matenaanua no taltaalnge.

11 Gim lasi, taman no limaaga tsaa iaa atatal lot laa sin gim.

12 Biaa no inaman, di ta saan ngali mat axaau sin biexaal, di tii xonon ngali atuaai gim ngali xasau, amuina di xap saan ngali no Jiu di na taal sosong sin di, ngali xan tongol Karisito. 13 Asuk xap xa ina abia no inaman di tii se xasau, di xaa amumusili no lo. Oro, di saan mu ngali di na axasaui gim ngali di ba paraak sin biexaa inaman Judaia taman no isuaan gim. 14 Asuk so maase, iaa na suk xap paraak gomsaa taman no isuaan iaa, oro iaa na paraak mu taman xan tongol xida Orong Iesu Karisito. Papan tongol Iesu tii se met poroklii abia no namaang ina xolkolmoxo, ma biaa no namaang tii se papaalii iaa. 15 Ma nawe di axasaui gita o a xap, biaa maarang gomsaa mu. Oro xaraxin maarang mu, gita na tsap taamat uul lalon Karisito. 16 Ma biaa di, di ta eses mii nugu totore, iaa atsuraa Moroaa ngali tali malina ma biirbirum sin di ma sin no Israel[a] di ta ie tinaalnge, biaa di xan no Moroaa.

17 Sin xapkap ina se, iaa suk palo ngali xa na amagaai iaa, amuina balawaa no balak sin no isuaaga asen malen, iaa xan Iesu.

18 Nugu no taamat lalon Karisito, iaa sawit malen biaa amiimiilam sin xida Orong Iesu Karisito, na manman mii Nantanuaan gim. Aso.

<- Galeisia 5