1 Biaa no inaman araraa, di ta taltaalnge we Iesu ia Karisito di xan no tsi Moroaa, ma gim araraa biaa gim ta titii Mom, a malen mu gim ta titii xan tsi bula. 2 Balawaabi gita ga atii we gita titii xan no tsi Moroaa, sin namaang ina titii Moroaa ma xosaraa ma amusili xan no papaare watwat. 3 Balawaa xan titii Moroaa, ngali amusili xan no papaare watwat. Ma xan no papaare watwat a xap lelep buxa ngali amusili,[a] 4 amuina no inaman araraa, di xan no tsi Moroaa di aiepatsaa balawaa xolkolmoxo. Balawaa xida tinaalnge we gita se aiepatsaa xolkolmoxo. 5 Saa ia tii aiepatsaa xolkolmoxo ina inaman? Iwaa mu ta taltaalnge we Iesu ia xan Tsi Moroaa.

6 Iesu Karisito tii xaalame taman axaxadaan taman daan ma xan dal tii ga tamkabare papan tongol. A xap xaalame taman axaxadaan mu, oro tii xaalame taman axaxadaan ma minet. Ma Nantanua mu iwaa ta paare leng taman, amuina Nantanua ia biaa soina. 7 Amuina detatuul, detuu ta paare leng taman, 8 Nantanua, axaxadaan taman daan ma dal papan tongol, ma detuu ukbal we Iesu ia xan Tsi Moroaa. 9 Gita sirawaa xan papaare leng taamat, oro xan papaare leng Moroaa a lot buxa amuina biaa xan papaare leng Moroaa, biaa tii se tali, taman xan tsi. 10 Saa ia ta taltaalnge sin xan Tsi Moroaa a ie abia papaare leng lalon xan butsa, o saa ta xap taltaalnge sin Moroaa, a xosaraa Moroaa unaababaa, amuina a xap taltaalnge sin abia papaare leng Moroaa tii se tali taman Xan Tsi. 11 Sin abala xan papaare leng, Moroaa a se tali tino laaliu, ma balawaa tino biaa sin nugu Tsi.[b] 12 Saa ia ta manngi nugu Tsi, a ie tino o saa ia ta xap manngi nugu Tsi, a xap ie tino.

13 Iaa atalaa abala no maarang laa sin gim, biaa gim ta taltaalnge sin Iesan Xan Tsi Moroaa ngalibi gim ba atii we, gim ie tino laaliu. 14 Biaa gita ta tilwatwat laamuaan no matan Moroaa gita pupua ngali atsuraa ngali no matlaxen maarang ma naba alongmen gita. 15 O nawe gita atii we ia alongmen gita, semaarang gita ta atsuraa ia ngali, gita atii we gita ba adi semaarang gita tii atsuraa ia taman.

16 Nawe xa a lasi turamasen ta xosaraa xa namaang tsaxa, biaa ta xap tali ia laa sin minet, na suk ningning ngali Moroaa naba tali tino sin ia. Iaa papaare sin abia di, biaa xadi no namaang tsaxa ta xap tali di sin minet. Biexa namaang tsaxa a tali minet. Iaa xap paare we, na ningning ngali abia tsaxa ta tali minet. 17 No namaang ta xap tutiik biaa namaang tsaxa lalon no matan Moroaa, oro biexaa namaang tsaxa biaa a xap laamungen iu sin sal ina minet.

18 Gita atii we xan no tsi Moroaa di xap tigiri xosaraa namaang tsaxa, oro iwaa xan tsi Moroaa, ia naba tilkaali ia, ma Saatan naba xap xosor atsoti ia. 19 Gita atii we gita xan no tsi Moroaa, ma biaa xolkolmoxo araraa aman paina xan banam Saatan. 20 Gita atii bula we xan Tsi Moroaa a se xaalame ma a se tali sinaae leng sin gita, ngali gita ba atii ia, iwaa ta so. Ma a manman lalon xan Tsi Iesu Karisito, iwaa Moroaa so ma a Tino Laaliu.

21 Nugu no xos ina tsi, gim nangaam langaari sin no malagan.

<- 1 Jon 4