1 Na kwe Josep eso ho Ferome megali latujuwelële, “Aya afanime Kenan life mago wafata lëlelëkakime. Bu sipsip kleli na bulmakau kleli na iniwa mëlesuma na bubë iniwa wesibi mata mohweija. Na bu Gosen lifate mëta kë tafa mëla.” 2 Na Josep tobalimalë bolijahanime gali telëkakëme. Na bu mitisiya. Na eso hobë li mëta mitlija.

3 Na kwe, eso ho takune tlome, “Sobo fëye wege fa etokweflone?”

Na bu gali tafu mëtëtatla, “Sebo sipsip kleli nëlëkefëma, sebobë ayanino fene mëtlëkefëma. 4 Sebo metole nanëla, sebo ebë lifate mëta esokwaneme tafa nëglame. Hi jwa olë Kenan life mëta fata tëgletëname nëgeme na sebobë sipsip kleli agosaba jwa nëgeme. Na fëye wesibi hi mëglemene? Këme nëgeme, sebo metole nanëla, ju seme megali lalowa eglonamene, ‘Sobo Gosen life mëta lalowa tafa egelome.’ ”

5 Na kwe eso ho, Fero, Josepme gali tlole, “Blijaya na blijahanina wamisiya, juna tafa egelobëme. 6 Ju Isip lifatebë iniwa afloko lowene sle eletëmeme, na jowa lale aflokomu hwi elotëmeme na yo elomeme kë mëta tafa namëglame. Na ju metole egletëmena bu Gosen life mëta tafa matla, kwe ebë lalowa. Na jubë ilawa mago ho flime eselëmeme, bu bulmakau kleli mëglëmabë alëge kë lowene sle mëgletlabë, na ju bume aniji elomeme, bobë bulmakau kleli mëglëma namëglame.”

7 Na kwe Josep bolijayame eso ho Fero belë sei tlële. Na Jekop Gotome takune tlole, eso ho Ferome ululu sle nalëgëtaguleme na lëgaitawagule nalëgleme. 8 Na eso ho gali tlole, “O aya, jubë tlibutu ebënujune?”

9 Na Jekop tafu tëtatle, “Bo ebë life mëta kë tafa nokweibë tlibutu këniji, 130. Ebë tako olë nane tafa nokwei kwe bome lebutako hobota mitisi tenë. Bobë afunino bu ebë life mëta tako tafa motokweijamu. Na bubë tlibutu ebë lebutakomu kwe bobë tlibutu tëlewa.” 10 Na kwe Jekop eso home kaiye tlole na tuju. 11 Na Josep bolijayaname, bolijahaniname taitame, lale life yo naloglomeme, eso ho fene gali tlole. Na bu Rameses life yo tlome, kë life mëta tafa namëglame. Kë life afloko lalemu kwe Isip lifatebë fli life afloko bu sogë lalowaha. 12 Josep bu hi wesibi bolijayaname, bolijahaniname, bolijayabë ilawa mago oneho name, lëlekefëme.

13 Tako fone fata tletëme na iniwa life hi wesibi jwamu. Isip life mago oneho na Kenan life mago oneho bu foneme tako gigli lamëlekefëyamu. 14 Na Isip life mago oneho na Kenan life mago oneho bu hi wesibi Josep mago balitina glo mëtlekefëya. Na bubë baliti yawe motloma. Na Josep kë glo lëglekëfebë baliti, eso hobë lo mëta gogwa tlekëfe. 15 Na Isip life mago onehobë baliti na Kenan life mago onehobë baliti yawe motloma na iniwa oneho Josepme gali mutujuwelëla, na bu gali motlola, “Hi wesibi enëna. Hana enënaye kwe sebo jubë naba li mëta gigliwa nëglame. Ju seme aitana. Sebobë baliti wafi yawe mëgleme nëgeme.”

16 Na kwe Josep gali tlome, “Sobobë baliti wayawe eglomona, kwe sobobë bulmakau kleli na sipsip kleli bome elesume kefëtëname. Na bo some hi wesibi kofayame nanëglëkefëyome.” 17 Na bubë hos kleli na bulmakau kleli na sipsip kleli na mëmë kleli na donki kleli Josepme mëtlelumekefëtla. Na Josep hi wesibi kofayame tlëkefëme. Na bu melë kë mëtlekefëyabë jowa tlibutu. Bu melëwa motokoujabëë na kë tlibutu mana yawe motlola.

18 Kë tlibutu yawe motlola na ita Josepme mutujutla na gali motlola, “O eso ho, sebobë hobota jume hana ëho nëgëtatëyome. Sebobë baliti alujawamu. Na sebobë iniwa sipsip kleli na bulmakau kleli jume watlëkefëyo. Sebo jume nëglëkefëyobë wesibi hanane mu. Kwe sebowa nëtabëya na sebobë lifewa mëbagu. 19 Ju seme foneme gigli nëglabëme asa elësëna na ju sebobë flëke feilawa tëbo lëglebëme asa elësëtëna. Na sebo metole nanëla, eso ho Fero, bu seme laitakefëname na seme hi wesibi lëlëkefëname. Kwe sebo bubë wege manawa fa nëgëtatlabë oneho fata nëgletlame. Na sebobë life mata bume yo nololame. Kwe ju seme hi wesibi na olo wesibi eglënana kwe sebo foneme hana gigli nëglame. Na sebo tafa sle nëlame na sebobë flëke tëbo jwa nalëgleme.”

20 Na kwe ëbame kë fata tëglebë fone mana lëbe na bu tako fatamu lalële. Na Isip life mago oneho Josepme hi wesibi sëneme bubë flëke yo mëtlagula. Na Josep bu kë iniwa flëke eso ho Ferome yo tlole. Këme nëgeme Isip lifatebë iniwa flëke, eso ho Ferobë flëkemu fata tletle. 21 Na Josep melë latle, Isip lifebë iniwa onehome gali tlome, “Sobo eso ho Ferobë wege manawa fa etakefëtelome.” Këme nëgeme iniwa oneho bubë wege manawa fa mëtakefëtla. 22 Kwe, Josep bu fëso hi wesibi ahujume ahujume mëglekefëyabë, hobë flëke hi wesibi kofayame hana fa tëtagutëme. Melëme nëgeme eso ho Fero bu kë enëneme baliti tlëkefëmeme nëgeme. Na bu kë balitina hi wesibi glo mëtlekefëya. Këme nëgeme bubë flëke hi wesibina kofayame yo jwa këme motlola. 23 Na Josep bu onehome gali tlome, “Sobo aholokwane ekoujo. Bo sobo na sobobë flëke hi wesibina wahihijika telë. Na sobo eso ho Ferobë wege manawa fa egëtatelobë oneho tafa waelo. Na eli, bo olo wesibi some nëglëyome, sobobë nuju mëta tobalo naekoujome. 24 Tokwafe nuju mago hi wesibi wawa egelona kwe sobo fu 5 mëta sa gwa etlo. Jowa lokotabobë eso ho Ferome elëlome, na 4 lokotabobë some egelome. Na somagobë fli unina tobalo egelobëme gogwa elome. Na fli sobo na sobobë nëbalena hi elome.”

25 Na kwe oneho Josepme gali motlola, “Eso ho, ju seme hi wesibi watlëna, na seme wataitana, na sebo iniwa tafa sle nanëla, sebo gigli hana nëglame. Na sebo tako fleflesumu nanëla, eso ho Ferobë wege manawa fa nëgëtakefëtlame.”

26 Na kwe Josep Isip life onehome gali tlome, “Sobo aholokwane ekoujome na kë gali esogo elelëlome. Tokwafe nuju mago hi wesibi wawa egelona kwe sobo fu 5 mëta sa gwa etlo. Jowa lokotabobë eso ho Ferome elëlome.” Kë gali unalëme mana lëbagutëmeme na mana ekë lëbetëme. Kwe eso ho Fero bu fëso hi wesibi ahujume ahujume mëglekefëyabë hobë flëke hana fa tëtatëme.

27 Israel enëne bu Isip lifatebë provins Gosen mëta tafa mëtla. Na bu kë flëke bume yo tlome. Na bu lebutako nëbale fata mototoma. Na feilawa oneho fata mëtla. 28 Na Jekop bu Isip life mëta 17 tlibutu tafa tle na bubë iniwa tlibutu këniji 147. 29 Na bu melowene latle, “Bo gli nëgelëme teife.” Këme nëgeme bu bowene Josepme këme gali telëkakle, ligisitle nalëgleme. Na bu tisitle. Na Jekop bume gali tlole, “Ju bome tolemu laletenë, kwe ju toba bobë yelukwafe sei elulukwakëmeme na bome megali sle enonëme, ‘Bo jume Isip life mëta hana matëmatë nëgëtëme.’ 30 Bo gli nëgelëna, ju bome ebë life mëta asa matëmatë etanë. Weye. Matëbe. Bo mogome ebë life mago egehunëme na bobë afuninobë titono matëmatë mëta gwa eutanëme.”

Na Josep gali metafu tëtatle, “Bo jume melë nëgëtëme ju fene gali ele.”

31 Kwe Jekop gali tlole, “Ju bome iniyafememu fwa gali sle eglonëmemu, ju kë wesibi melë egotleme.” Na Josep bolijayame iniyafememu gali sle tlole. Na kwe, Jekop bubë ni labuku mëta eso life tuku totle na Gotome mana fleflesu tletle, Josep bume gali sle togloleme nëgeme.

<- Jenesis 46Jenesis 48 ->