3
Yesuko Moses takate
1 Uni topo meté horé, ye ŋuya Anutuko sambo koŋgo neko yereró mu, Yesu ŋuro kondé iŋoyi. Anutuko noko ŋano asáŋoní o qa-qa unindoro tapá uni
* tunoqaró, ŋuro yesowoyoteto.
2 Enendo Anutuko kho inaró ŋu kama rotaró. Kini, Mosesko
† Anutu koro suwisawiyó soso keweroyemo kho taró ŋunde qembe Yesuko khoyó taró.
3 Qeni, uni kato pase meté ka towoníqo, pase ŋuro mande meté mu yeyoteto, quko uni towaró ŋuro seré parámi te inoyoteto. Asa ŋundiro naŋge Yesu koro owé parámi qundo Moses koro owé parámi ŋu takate.
4 Dokoro unindo pase towoyoteŋgo, quko Anutuko noko sambo towaró.
5 Komo Mosesko Anutu koro suwisawiyó soso keweroyemo kho uni tunoqero kho ŋu kama rotaró. Kini, kho tero enendo Anutuko o karo tukú yeweya quro yesowaró.
6 Quko Kristoko
‡ naŋuní tero Anutu koro suwisawiyó sopo yereyote. Ko norendo wimbí tero Anutuko o meté-meté mu nore nunoweya ŋuro kondé sopowato tiníqo, noreko Anutu koro suwisawiyó yoteto.
Newondeye ma kusiyowero
7-8 Ŋunde ŋuroko nore Yuqa Surumímboro mandí iŋato. Ŋande yete,
“Komo usi-siyembo mira wimbímo mira windu-windu tero
towo nerero newondeye kondé kusiyaŋgurí.
Asa itaka naru ŋano ye Anutu maŋgó iŋoteŋgo tiníqo,
usi-siyemboro oteteye howero newondeye ma kusiyowero.
9 Mira wimbímo ŋuno kumima naru 40 ŋunde yate-yate towo niri
kho wimbí tewe qeneŋgurí.
10 Ŋunde ŋuroko no unipare ŋuro kiro mande yero
ŋande yanowó, ‘Newondeyembo no kama iŋo nunoyoteŋgo.
Neneŋo khene kama howeyoteŋgo.’
11 Ŋunde ŋuro no saŋgirí tero mande kondé ŋande yimiranowó,
‘Hamó horé ye neneŋo imaqe-imaqe narune ŋuro quroko kama uyarewaŋgo.’ ”
12 Ye topo-topone, iŋo-iŋoye meté sopoyuri qembe. Ye keweroyemo kato iŋondutu piyimi ka newondímo yoní iŋondutuyó rotoro Anutu yoto-yotoyó moré ŋu huwóŋoweya koro. 13 Kini, Anutuko mande ŋuno ŋande yaró, “Itaka naru ŋano,” yaró. Ko naru ŋu kama kini taró, yote. Asa itaka ye epe rukiso-rukiso ti qembe. Quhurímbo kaná yiriní newondeye kondé kusiyowaŋgo koro. 14 Dokoro Kristo§ koya womoyoteto. Quko iŋondutu kondé koretero tatowó ŋu kondé kama towoyoteto tiníqo, eneya kama womoyoteto. 15 Mande ŋuko ŋande yete,
“Komo usi-siyembo mira windu-windu tero
newondeye kondé kusiyaŋgurí.
Asa itaka naru ŋano ye Anutu maŋgó iŋoteŋgo tiníqo
usi-siyemboro oteteye ŋu howero newondeye ma kusiyowero.”
16 Dani kato Anutu maŋgó iŋoro mira windu-windu taŋgurí? Ŋu unipare ŋu Mosesko yorero Isip noŋgo areŋgurí, hamómbe? 17 Ko Anutuko dani kaya saŋgirí teyoní kumima naru 40 ŋunde taró? Ŋu unipare ŋuko o piyimi taŋgurí. Ko khumoyi ukúye mira wimbímo ŋuno yoraŋgo. 18 Ko Anutuko danimboro ŋande yimiraró, “Hamó horé ye neneŋo imaqe-imaqe ŋu quroko kama uyarewaŋgo?” Ŋuko unipare mande wenda-wenda taŋgurí ŋuro yaró. 19 Asa ko ŋande iŋoteto, unipare ŋundo iŋondutu kama tero imaqe-imaqe naruyó ŋuro quroko kama uyareŋgurí.
<- Hibru 2Hibru 4 ->
- a “o qa-qa unindoro tapá uni” ŋundo Ya Surumímo hu-hariri sopoyaŋgurí. Ŋunde soporo kumima naru soso quroko naru kanata quno unipare soso koro quhuríyemboro o qa-qa parámi ka taró.
- b Komo suki “Mosesko” uni parámi tero Israel unipare sopo yereró. Anutuko Sainai purímo hutuŋo mande inoní mande ŋu rondaqe unipare yunaró.
- c “Kristo” ŋuko Yesu naŋge, asa Anutuko rokóŋoní mahero wiri yerete uni parámi horé tunoqaró ŋu.
- d “Kristo” ŋuko Yesu naŋge, asa Anutuko rokóŋoní mahero wiri yerete uni parámi horé tunoqaró ŋu.
