1 Teketa tenang ooansioꞌ teue sipisipiꞌ kampianue tutunaꞌnung pinkapinkaꞌ kaapeꞌuuꞌ teing-koo ˜kenaanka-taa pinkapinkaꞌnanka-koo, eeꞌnoko taaravansi oꞌnoko teing-koo karenaumo kapooꞌ domantoia-koo narunge kurunkurung-pinaꞌ karoma aaꞌpuuꞌ, “Poai.” 2 Eeꞌnoko ooama navoroꞌ oosinavoroꞌ kakaaranavoroꞌ ooantuꞌ, naning tevoroꞌkoo baꞌnanui otouꞌnunge mpaang kompui otoko. Eeꞌnoko piikonara deemparako baakopo tee-koo kurumpaioꞌ bera napoꞌ dau basinooꞌ pinivurima boong deempuruꞌ. 3 Teketa napoꞌ kenaanka-nung pinkapinkaꞌ kaapeꞌuuꞌ, eeꞌnoko napoꞌ taaravansioꞌ kenaanka-nung kapooꞌ domantoia-koonge aaꞌpuuꞌ, “Poai.” 4 Teketa napoꞌ kevoroꞌka-navoroꞌ oosi-koo urumpuma navoroꞌ bakoaruꞌ, tevoroꞌkoo daue naning baꞌnanui otoko. Bainatu isikung kong-antavauꞌ eeꞌnoko tauraꞌ nantoong kansiꞌnupoong-eta mooa pariꞌuriko turampeema dupisiꞌeeaing-koong avauꞌ.

5 Teketa napoꞌ beenaumo-nung pinkapinkaꞌ kaakeꞌuko beenaumo-nunge kapooꞌ domantoia-koonge aaꞌpuko taaravantuꞌ, “Poai.” Teeꞌpuko oosinavoroꞌ mutaanuꞌnavoroꞌ poko ooantuꞌ, tevoroꞌkoo naning baꞌnanui otoko birenge sikeere kompui. 6 Eeꞌnoko narung aurong taaravantuꞌ teing-koo kapooꞌ karenaumo domantoia-ankoita karoma aaꞌpuko, “Taamang apukaꞌparako nauꞌ bauꞌnuꞌ naꞌmung doong-koong mooꞌ siompei sikeereveai, eeꞌnoko beekuri aane teeꞌ nariꞌ siompei sikeereveaing, teka mou dovang koiꞌ sinampoꞌning orarieaukaꞌ.”

7 Teketa napoꞌ tee karenaumo-nung pinkapinkaꞌ kaapeꞌuko napoꞌ tee karenaumo-nung kapooꞌ domantooꞌ karoma aaꞌpuko taaravantuꞌ, “Poai.” 8 Teketa ooama oosinavoroꞌ booruraaꞌnavoroꞌ ooantuꞌ. Naning tevoroꞌkoo dau baꞌnanui otouꞌnung bakaang miring Booꞌ. Eeꞌnoko damaꞌketa tutueue siompui nanukoꞌ. Eeꞌnoko iriꞌ tenaanka avaaretuꞌ nantoong kansiꞌnupoong karevituri-koo tankaampaareta teing-koo navitu dupisiꞌkoo aaꞌninge: bainatue dupisiꞌkoo, peerai booꞌkoo, doovaninkainge siipai dupisiꞌkoo eeꞌnoko kauꞌkarenaumo-nankai dupisiꞌaariai.

9 Teketa napoꞌ tenang teie Sipisipiꞌ Kampiai paꞌnokoꞌnung pinkapinkaꞌ kaapeꞌuko teka boonturoma-koo boonga nantoong Kumponing bakaang kara pinkaꞌai siraꞌpaako dupisiꞌaaruꞌning biikaang tanuaang ooantuꞌ. 10 Teinge aaꞌnaꞌ bokiaama aaꞌpaakoꞌ, “Ovoring purintoꞌ, meekung eeꞌnoko paariraravaung, batei arenang dake ookara nantoong kansiꞌnupoong simpeꞌerira teing niiꞌ dupisiꞌmaaruꞌning makuꞌeriaing?” 11 Teketa teing mononopaꞌ kakaarai kantevurira niiꞌnaroong napoꞌ uaavoroi otorooꞌnaang tampuruꞌ bera napoꞌ niiꞌning biiꞌmaikororiꞌ teing-pinaꞌ tavaarima dupisiꞌaariaininge deerunooꞌ makotuainooꞌke basi.

12 Teketa napoꞌ ˜narung-taa-nung pinkapinkaꞌ kaapeꞌuko ooama uꞌmiꞌ pankaing nkoarako ooantuꞌ, eeꞌnoko duaaꞌ mutaanampura baarong mutaanuꞌpinaꞌ oroꞌparuꞌ, eeꞌnoko kaara pankaveraaꞌouꞌnooꞌka koontoꞌ ereng-pinaꞌ oroꞌparuꞌ. 13 Eeꞌnoko beentoꞌnanka paning-kooning kavarima kansiꞌkoo duaꞌariruꞌ, karikauꞌkoong sinananka pionge darampuriko kavarima duaꞌarimanaꞌ. 14 Eeꞌnoko paning tamung taniꞌpinaꞌ kaiꞌaruꞌ, eeꞌnoko ookara iuꞌnanka napoꞌ muiꞌnanka diiriꞌariruꞌ otomanairu-eta. 15 Teketa aing aaꞌning dauraronanka ookara kansiꞌkoo-nupoong, nantoong pankenanka, tavuꞌkoo urantanuka, nantoong kavo-poꞌnupoong, eeꞌnoko iriꞌpoꞌnupoong, eeꞌnoko napoꞌ niiꞌning nantoong, botovotonaaꞌnuka eeꞌnoko osikaiaang, iuꞌnanka-koo meuꞌnairu-aape kooꞌarima kuvinanka-koo kuung eeꞌnoko boiaꞌnanka-koo boong bakuꞌarima aaꞌpaakoꞌ, 16 “Niiꞌkoo dau duaꞌdarara neeꞌmeriai teie Ovoringe baꞌnavaꞌnaniꞌkoo baꞌnanui otoinge oomuriꞌneeng. Napoꞌ teieta Sipisipiꞌ Kampia bakaang iira-ita bakuꞌmeriai. 17 Teꞌmung beekaang iira orara aarumo-koo oroꞌantavureainaꞌmung eꞌmung basiaring. Bakei naning tekang doompuresi donkonui otoaing otoaꞌ!”

<- MAKENSIꞌNUNG OO 5MAKENSIꞌNUNG OO 7 ->