1 Teketa narung aurong dootuuꞌnava-ita aaꞌnaꞌ karoko taaravantuꞌ aaꞌpuriko teing ˜kenaanka-taa koosinunanka, “Berira teing utaunanka ˜kerenta-taa Kumponing bakaang iirai maantoꞌning kansiꞌkoo piamperiai.” 2 Teketa tutunaꞌnunge koosinunge bera bakanareng utaunareng piampuuꞌ kansiꞌkoo, eeꞌnoko pentananka orakaꞌ oroꞌnanka sisikeera-poꞌnanka nantoong-eta taꞌdaꞌpuuꞌ, teing tee biiko-koong mooꞌdoꞌanta otoroining-koo eeꞌnoko bakaang baka-oo-koo dootuuꞌarikooꞌ aaꞌning-koo. 3 Teketa napoꞌ kenaanka-nung koosinunge bakanareng utaunareng pirung-koo dau piampuuꞌ, eeꞌnoko tee pirung ereng koonkuꞌumaung narung deemparuꞌ naning booꞌkoong-pinaꞌ, eeꞌnoko ookara kapooꞌ pirung-koo domampariri otoromaing boorouꞌ. 4 Eeꞌnoko napoꞌ beenaumo-nunge koosinunge bakanareng utaunareng ntonanka-koo dau piampuuꞌ eeꞌnoko puꞌantananka aaꞌning-koo, eeꞌnoko teing ntonanka ereng narunanka deempariruꞌ. 5 Teketa teie koosinunge ntonanka tanatavumaunge aaꞌpuko taaravantuꞌ, “Ee Ovoring, dake tee koontoꞌnaꞌ teing makuꞌeri nkovering. Aiꞌ daꞌ tee Meekung, teroita otouꞌnung, eꞌmung teeꞌ otong, eeꞌnoko damaꞌke teeꞌ nariꞌ otoi poainge. Dake tee koontoꞌ makosinaꞌ teing teeꞌ nkoverima makuꞌering. 6 Aiꞌ teing teinge eeꞌninge dakaning meekupoong eeꞌnoko teing nakaro-nupoong˜ dupisiꞌaarioꞌ biikaang ereng dakoaruꞌnung. Teeꞌkoo teing nantoong oreng tee ereng nai-antaveriko biikaang mooꞌ koontoꞌ makosinaꞌ nkavaavaing.”

7 Eeꞌnoko teketa boonturoma-ita narunge makuꞌuko taaravantuꞌ, aaꞌpuko, “Eeꞌ, Ovoring, Kumponing Purintoꞌ, masikung eeꞌnoko koontoꞌ tee dakaang simpesimpeꞌ.”

8 Teketa karenaumo-nunge koosinunge bakanareng utaunareng duaaꞌkoo piampuuꞌ, eeꞌnoko teie duaaꞌ aaꞌnaꞌ deekoronooꞌ biaꞌantavuuꞌ nantoong ntaꞌpinaꞌ taivuriiꞌnaang. 9 Eeꞌnoko nantoonanka uipaariiꞌke iirakutai taivuriko Kumponing bakaang miring barakosiꞌaakoꞌ tee teing eeꞌning arikananka okoraꞌ, napoꞌ bereꞌarira Kumponing pankaing-anta-koo piavoroaruuꞌ.

10 Teketa napoꞌ paꞌnokoꞌnunge koosinunge bakanareng utau piampuuꞌ teꞌ masipoꞌ tee biiko bakanooꞌ ovorimpari baꞌnavaꞌnaniꞌdoma, eeꞌnoko bakaning otoromanairu mutaanampuuꞌ eeꞌnoko nantoonanka meneng siꞌdaie taiarikoꞌ aaꞌnaꞌ sisikeeravoroma. 11 Eeꞌnoko Kumponing paning-koong barakosiꞌaakoꞌ sisikeera dovang-eta eeꞌnoko pentanankai orakaꞌ mantomparima. Eeꞌnoko teeꞌ nkoarima napoꞌ bereꞌariaꞌ biikaang orara aarumo-ita. 12 Teketa napoꞌ ˜narung-taa-nunge koosinunge bakanareng utaunareng piampuuꞌ tee-koo ntong pankarei Iuperetisi eeꞌnoko tee ntong teri ootukunari siriꞌaruꞌ maamu-anta-koo tee taung teing dauraronanka duaaꞌ poma-nooꞌketa teke porooꞌnaang. 13 Eeꞌnoko teketa ooansioꞌ maꞌnari beenaumo oreng dokorokoꞌpinaꞌ oroꞌnuka bakoariruꞌ aing aaꞌning beenaumo biikaang karang-eta: tee pakia, tee biiko, eeꞌnoko tee nakaronung daang minku. 14 Aing teing maꞌnari Sietaniꞌke botovurioꞌ kapooꞌ taꞌnimpaariiꞌnanka ninka taaꞌniꞌantavarima porouꞌning teing dauraronanka ookara kansiꞌnupoong-kooning aavavaarima oosiaarima maamu-antavaariiꞌnaang kare tutung-koo Kumponing bakaning ninka, teka teꞌmung kare tutumpaavainaꞌmung teꞌmung Ovoring Kumponing Dau Basi Purintoꞌ bakanaꞌmung pinidaakuꞌuriainaꞌmung.

15 “Ee aing, teꞌmung eeꞌnaꞌmung bakiaaꞌnko-pinaꞌ taꞌninaꞌ moaing. Baa naning tanteari maamuari otoing tee biraankearavaing eeꞌnoko bakaang baarong duaampari nariꞌ otoaing simpenoiꞌ otoi nanuko ooaako maiaꞌoꞌneeng.” 16 Eeꞌnoko teinge maꞌnari orenge teing dauraronanka Iiburu-nupoonge Amakedon tampaamanooꞌ naroꞌaaruꞌ, miruꞌnooꞌ Mekido-namii.

17 Teketa tee teie ˜kenaanka-taa-nunge koosinunge bakanareng utaunareng bikiavuuꞌ aanarooꞌke danto, eeꞌnoko dootuuꞌnava-ita baꞌnavaꞌnaniꞌdoma-ita auronge aaꞌnaꞌ bokuma aaꞌpuuꞌ, “Enang bakearing.” 18 Teketa aing aaꞌning nkoaruꞌ: pipimpuma kurunkurung tompooꞌkukoꞌ, eeꞌnoko ninininimpuma uꞌmiꞌ pankaing nkoaruꞌ, tee uꞌmiꞌ tee bakei teroita kansiꞌkoo nantoong tavoꞌariruꞌnooꞌketa nkoaravaꞌnaꞌ nkoaruꞌ, aaꞌnaꞌ dau basi masikung tee aung. 19 Tee osi pankaing Babiloniꞌ beenaumo-koo keꞌmeꞌaruꞌ. Napoꞌ niiꞌning osi pankeng nantoong amutemuuꞌ biikaning doonko turampariruꞌ. Baruꞌnooꞌ tee osi pankaing, Babiloniꞌ bakaang orara aarumo Kumponinge noruꞌui teeꞌ turampuuꞌ bakaang iirai maantoꞌuioꞌ toraꞌantavurima uainie toraꞌantavurimanaꞌ. 20 Ookara muiꞌnanka paaꞌariruꞌ eeꞌnoko iuꞌnanka otoroaruuꞌ. 21 Eeꞌnoko apoꞌ kamaarie moomparama kapang kaaꞌomanaꞌ kaaꞌora paning-eta nantoong-koo dau kapang-pinaꞌ tumputumpurunang duaꞌariruꞌ, nareꞌnaꞌkoo mankiꞌnooꞌ naninge kakau nkavupeuꞌnooꞌ basi. Eeꞌnoko teinge Kumponing bakaang miring barakosiꞌaakoꞌ apoꞌke kapang-pinaꞌ nareꞌnaꞌ nareꞌnaꞌ aaꞌnaꞌ baikevuriko, tee tee arikananka-koo dau basi arikunge.

<- MAKENSIꞌNUNG OO 15MAKENSIꞌNUNG OO 17 ->