1 Niiꞌning doong tankinuioꞌ Jiisuuꞌ napoꞌ toroaruꞌ Kapaneumeꞌnavuntuꞌkoo. Eeꞌnoko toroarako ooauꞌninge pava-koo otoko siraꞌpauꞌ. 2 Nantoong aaꞌnaꞌ karikaꞌ poroioꞌ otoꞌdoma otoaruuꞌ pava-koo kuunge eeꞌnoko karanaang-koo damaꞌdu. Eeꞌnoko Jiisuuꞌke nantoong teka kara daankivuruꞌ. 3 Eeꞌnoko tenang daankivuriko niiꞌning porouꞌ naning doota tavoꞌaama Jiisuuꞌanko, nantoong karenaumoi nkavaakotaaꞌ. 4 Eeꞌnoko nantoong karikaꞌke itoꞌaioꞌ Jiisuuꞌanko koontoꞌ tavoꞌaavaꞌ. Enang tee pava-koo kantuꞌda dipiꞌauꞌ Jiisuuꞌ otouꞌnooꞌka dau. Eeꞌnoko naning doota teke doonai sing-antavauꞌ bakaang taniꞌ ninka nariꞌ. 5 Eeꞌnoko tenang Jiisuuꞌke teing tee tavoꞌauꞌning biikaang baito oovura aaꞌpuuꞌ tee naning doota, “Ee aung, dakaning orarananka tontaꞌderonsing.” 6 Eeꞌnoko teinge boto naunukai teke baꞌnampariri tunsi-koo eeꞌ noruꞌaakoꞌ, 7 “Aming-koo aung kara menaankavumaang Kumponing bauvaupaaꞌuma? Naning otoaꞌ orara aarumo tontaꞌupeuꞌnung, Kumponing narung deekoꞌ.” 8 Teeꞌ tamung noruꞌaako Jiisuuꞌke namuꞌke iraakavurira aaꞌpuruꞌ, “Aming-koo teeꞌ noruꞌerimang? 9 Arera kara masikaꞌpoaruko ooverira ning makosi deeaung tammeripeuꞌ aaꞌning-koo, aung doota eeꞌ minku-koo, ‘Dakaning orarananka tontaꞌderonsing,’ niiꞌnaꞌ eeꞌ minku-koo, ‘Daaꞌdarara dakaang taniꞌ nkavei naniai.’? 10 Teka diiꞌke iroꞌ noruꞌkoo makosi ning Tee Naning-naumpoꞌ Paning-etaing kansiꞌkoo oꞌnoi orarananka tontaꞌkoo makosi...” Teeꞌpura tee naning doota aaꞌpuuꞌ, 11 “Ninge aaꞌdamaang, daaꞌdarara dakaang taniꞌ nkavei naniai dakanava-koo.” 12 Teeꞌpuko daaꞌarara namuꞌke taniꞌ nkavui tenkenuuꞌ ooai otoko. Eeꞌnoko aaꞌnaꞌ taꞌninaara ookarai Kumponing daangampauꞌ aaꞌpaama, “Niiꞌke tero teeꞌ oroꞌ kapooꞌ ooampiaꞌ.”

13 Eeꞌnoko Jiisuuꞌ napoꞌ tenkenura miiruꞌ Kaaleliꞌkoo basiaruꞌ. Eeꞌnoko teke otoko nantoong karikaꞌ poroioꞌ kara nauvuruꞌ. 14 Eeꞌnoko teketa tenkenura Liivaiꞌ, Alopeasi bauring, oovuuꞌ taakisi nkavaakoꞌnava-koo baꞌnanuioꞌ bakanavaro-koo. Teketa Jiisuuꞌke aaꞌpuuꞌ, “Ning siomeai.” Eeꞌnoko Liivaiꞌke deto donkonura tenang-eta deto tee siompui nanuuꞌnung. 15 Eeꞌnoko karikaꞌ nantoong orenanka eeꞌnoko napoꞌ taakisi nkanuka ninka Jiisuuꞌ nariꞌ siompauꞌ. Eeꞌnoko teing-koo nariong ninka Liivaiꞌ bakanavaꞌkoo nariꞌ taamanauꞌ Jiisuuꞌ bakaning barevare-nupoong ninka nariꞌ. 16 Eeꞌnoko teke taamanai otoroko nariong Boto Keperuuꞌnavitu-koo nau-antanukai ooauꞌ Jiisuuꞌ nariꞌ taamanaako oreng ninka eeꞌnoko taakisi nkanuka. Eeꞌnoko bakaning barevare-nupoong tanaꞌaarima aaꞌpaaruꞌ, “Aming-koo taakisi nkanuka ninka nariꞌ taamanaamaang eeꞌnoko nantoong orenanka ninka nariꞌ?” 17 Eeꞌnoko Jiisuuꞌke taaravurira makuꞌurima aaꞌpuruꞌ, “Teing nantoong tampaꞌ otoromaing naninge nankaiꞌuriiꞌnaang piavoroaꞌ, teka teing siipavoromaing naing piavoromaung. Ning nantoong tampenanka-anko moaꞌ. Ning orenanka-koo mouꞌnung nauaranko bereꞌariaꞌnaang.”

18 Jooni bakaning barevare-nupoong eeꞌnoko teing Boto Keperuuꞌnavitu biikaning unkumoariko nantoonge Jiisuuꞌanko porora tanaꞌaama aaꞌpauꞌ, “Aming-koo dakaning unkumoariaung?” 19 Eeꞌnoko Jiisuuꞌke bariꞌurima aaꞌpuruꞌ, “Teka ee nantoong baraneeꞌ navitu nampeesi-koo poromaing naning nampeesinara ninka nariꞌ otoroi unkumoaripeuꞌ? Otoaꞌ, aiꞌ nantoong nampeesinara ninka nariꞌ otoroi unkumo-koo makotuaꞌ. 20 Teka doonanka pomaang teing biiꞌmaikoꞌ teꞌnemparako unkumoariaing. 21 Naninge baarong nerakanaaꞌ urikanaaꞌ ninka naroꞌka pateꞌuarupeuꞌ. Eeꞌnoko teeꞌ nkovuko deekoꞌ napoꞌ nerakanaaꞌke tenaaꞌ urikanaaꞌ beetoꞌuko aaꞌnaꞌ dereꞌarapeuꞌ. 22 Eeꞌnoko napoꞌ naninge uaini nerakaruꞌ urikaroꞌkoo pareꞌuarupeuꞌ. Teeꞌ nkovuko dei katekateꞌora teroꞌ nakaꞌupeuꞌ. Eeꞌnoko nakaꞌuko teruꞌ eeꞌnoko teroꞌ ookeng oraruꞌkupeuꞌ. Uaini nerakaruꞌ nerakaroꞌkoo deekoꞌ pareꞌkoo makosi.”

23 Eeꞌnoko niiꞌnaꞌmung Doong Uaanaꞌmung-koo Jiisuuꞌ bakaning barevare-nupoong ninka nanauꞌ mintoong uiteꞌnaue˜. Eeꞌnoko bakaninge biiꞌdaꞌpaama nanauꞌ, Juꞌnupoong biikaang aarumo-koo tauraꞌpari otoinaꞌ. 24 Eeꞌnoko teinge Boto Keperuuꞌnavitue˜ Jiisuuꞌ aaꞌpauꞌ, “Ooveai. Aming-koo Doong Uaanaꞌmung-koong boto totoꞌpaamang dake bare-antaverimainge?” 25 Eeꞌnoko Jiisuuꞌke makuꞌurima aaꞌpuruꞌ, “Diiꞌke aming-koo teeꞌ tuumpimerimaang? Tampaꞌ noruꞌeri otong tee kapooꞌ Deevitaꞌke nkovuuꞌnung tenang Abietaꞌke piristiꞌ pankaing deempari otouꞌnang, tenang teing ataꞌai peeravorora, tee eeꞌnoko teing nariꞌ otorokoꞌning ninka; 26 Kumponing bakanava-koo Deevitaꞌke koinura, nkavura naiauꞌ tee taamang meekung, niiꞌninge nai-koo tauraꞌparavaꞌ, teka piristiꞌnuka nainge deekoꞌ nai-koo makosi. Eeꞌnoko teie Deevitaꞌke teing nariꞌ otorokoꞌning avurioꞌ boto totoꞌkoo tuumpiaavaꞌ.” 27 Eeꞌnoko Jiisuuꞌke aaꞌpuruꞌ, “Kumponinge Doong Uaanaꞌmung nkomemuruꞌnung niiꞌkoo boonge otoi pakumuri otoꞌkoo. Eeꞌnoko teꞌmung-koo boong siꞌmuriaꞌ. 28 Teeꞌkoo ning Tee Naning-naumpoꞌ Paning-etaing tee Ovoring Doong Uaanaꞌmung-koong.”