1 “Nantoong koong-anta-koo oioiꞌdariaꞌ otoai Kumponinge nariꞌ koong-antaruꞌneenga. 2 Aiꞌ diiꞌke koong-antavererimaung-koo teeꞌ nariꞌ Kumponinge diiꞌ koong-antaruriaing. Tee paaranang kompei nantoong koong-antaverimanarong Kumponinge kompui daꞌ koong-antaruuꞌnaang. 3 Aming-koo dake nankiꞌ daaraꞌmaꞌnung-koo duta-koo oovemaunge teka daka noruꞌdaravaꞌ daꞌkoo duta-koo konkinarong otoing? 4 Arekeeꞌ dake aaꞌpepeuꞌ tee daaraꞌmaꞌnung, ‘Ioꞌ nankiꞌ mooꞌdampai daꞌkoo duta-koo otoing,’ tenang daka ooraravaꞌ tee konking daꞌkoo duta-koo otoing. 5 Daꞌ ampirinung˜, iroꞌ tutung daka-koo mooꞌdaravaing tee konking duta-koo eeꞌnoko tenang daaraꞌmaꞌnung-koo sirakaꞌpei oovera mooꞌeai tee nankiꞌ daaraꞌmaꞌnung-koo duta-koo otoing.”

6 Eeꞌnoko Jiisuuꞌke mirumiruꞌ nauvurima aaꞌpuuꞌ, “Kapooꞌ meekung mosiꞌnanka averereriaꞌ otoai bereꞌarima okiꞌnooꞌnaꞌ tairaarima busivusiriraariꞌneenga. Eeꞌnoko napoꞌ diikaang dukuꞌ pooroꞌanko duaꞌeriaꞌ otoai. Teeꞌ nkoveriko metoꞌ ninka nariꞌ meeꞌaama moreꞌaaꞌneenga.”

7 “Eentarariai aruriainaꞌ. Besiꞌeriai daaꞌeriainaꞌ. Kopikopiꞌeriai karanaang daateꞌderuriainaꞌ. 8 Aiꞌ ookara nantoonge eentavarimainge tee nkavaamaung, eeꞌnoko besiꞌaamainge tee daaꞌaamaunge, eeꞌnoko karanaang kopikopiꞌaamaing teinge daateꞌevurimaunge. 9 Diiꞌkoo baie bauring taamang-koo eentavuko kapang avupeuꞌ? 10 Niiꞌnooꞌ taviꞌkoo eentavuko ee boruꞌ avupeuꞌ tee? Otoaꞌ. 11 Tee tee diiꞌke orenge diurukaaꞌ tampaꞌ averererimaung deekoꞌ noruꞌeriaing teie Diumai paning-koo otomaunge bakei tampaꞌ masikaꞌ avuriaing teing tee-koo eentavarimaing. 12 Teeꞌ nantoonge diiꞌ tampaꞌ nkoraariiꞌnaang piarorimanaꞌ teeꞌ nariꞌ nkovererimaatoaing teing diiꞌke, aiꞌ teie aunge aarumoi tee boto Moosesi-nung eeꞌnoko nakaro-nupoong urikupoong biikaang naroꞌka dupeantavuri otong.”

13 “Muuꞌ paninung-koo tuntoma teꞌ ito-navarong. Teke tevaronge tuntariaing avutevuꞌdariaꞌ, aiꞌ tee karanaang pankaing, eeꞌnoko taung tee beetaꞌniiꞌ tee mosianung-aape bei otong, eeꞌnoko mmauꞌ tevaronge tumparimaung. 14 Teka tevarong ito-navarong kaponavunge danto tee domaang isikung-anta-aape bei otong, eeꞌnoko mmauꞌ nantoonge dekopiꞌaamaung tevung.”

15 “Tanatarariaing teing-koo nakaro-nupoong daang Kumponing-etaning tamparimaing-koo. Teing teing diiꞌanko sipisipiꞌkoong dopaꞌ kurumpariri poroaing, teka kuunooꞌ teing teing nkaunanka makosi-nanka tairoꞌnanka. 16 Teka tee-koo biikaang sinananka-koo diiꞌke tasiꞌpereriaing. Aiꞌ nantoonge ee karikauꞌ tooꞌmurintaaꞌpoꞌnavari-koo kavaapeuꞌ? Aiꞌ kiring ee nantong-koo kavaapeuꞌ? Otoaꞌ! 17 Teeꞌ nariꞌ ookara koiꞌ tampenanka-koo tee sinang tamparananka biꞌumaung. Eeꞌnoko tee-koo koiꞌ orara-koo sinang orara biꞌumaung. 18 Tee-koo koiꞌ tampara-koo orara sinang biꞌuarupeuꞌ, eeꞌnoko orara koiꞌkoo sinang tampara biꞌuarupeuꞌ. 19 Eeꞌnoko ookara koiꞌnanka sinang tampara biꞌuaukaꞌning teing nokiaarima ntaꞌkoo duaꞌaariaining. 20 Teeꞌkoo biikaning sinananka-koo diiꞌke tasiꞌpereriaing teing nakaro-nupoong Kumponing-etaning deekoꞌ.

21 “Mmauꞌke tee aaꞌmaamaung, ‘Ovoring, niikaang Ovoring,’ nka teing ookara nariꞌ tumpariaukaꞌnung teꞌ muuꞌ paninung-koo, teka teing naing deekoꞌ tee Mmaꞌ paning-koong bakaang pia siompaavaining tumpariaing. 22 Napoꞌ nantoong karingai aaꞌmaavainge ning teꞌmung, ‘Ovoring, Ovoring, niiꞌ ee dakaang miring-koo tarampeemariaruuꞌning˜ napoꞌ dakaang miring-koo maꞌnari bataꞌarampiaruuꞌninge taaꞌniꞌantananka mmauꞌ nkoampima?’ 23 Teka ninge eeꞌ nauarampaing teing siraꞌpansi, ‘Temuꞌketa diiꞌ nkaning pinaꞌ noruꞌdampiaung. Tokoi beriai ning-ankoita diiꞌ orara aarumo nkonuka.’ ”

24 “Teeꞌkoo ookara nantoong aung nkaang kara taaravaama nkoaakooꞌ teing teing tee-pinaꞌ naning norukasiꞌ tee bakaang pava boiaꞌkoo dau kanivuuꞌnung. 25 Teketa aing aaꞌning pouꞌ: apoꞌ duaꞌaruꞌ, doua tuuvuuꞌ, eeꞌnoko dovinge aaꞌnaꞌ duparara dankampuuꞌ tee pava, teka teva pesiꞌaravaꞌ, kapang-koo boiaꞌkoo eꞌmaniiꞌnava deemparako. 26 Teka teing ookara nantoong nkaang kara tamung taaravaama siompaavarukooꞌ teing teing tee-pinaꞌ naning kanuꞌ tee bakaang pava tamung piisiꞌkoo dau kanivuuꞌnung-pinaꞌ, eꞌmang-antavuaꞌ. 27 Eeꞌnoko tenang teing aing aaꞌning pora apoꞌ duaꞌaruꞌ, doua tuuvuuꞌ, eeꞌnoko dovinge aaꞌnaꞌ duparara dankampuuꞌ tee pava, eeꞌnoko bakei pesiꞌarara tuung tanuuꞌ tee pava.”

28-29 Eeꞌnoko tenang Jiisuuꞌke teeꞌ minkuvura bakearioꞌ nantoong karinga bakei aaꞌnaꞌ taꞌnimpariruꞌ tee-koo bakaang nau-anta-koo kara bakaang purintoꞌ deemparioꞌ, teing-pinaꞌ biikaning boto naunuka-pinaꞌ deeaꞌ.