MAATIUꞌ 28

Tee Jiisuuꞌ Booꞌketa Daaꞌaruꞌnaꞌ

(Mak 16:1-10; Luk 24:1-10; Jon 20:1-18)

1 Doong Uaanaꞌmung tankinuioꞌ Saandei-naꞌmung sirakaꞌpuma nanuko Meeriꞌ Maꞌdala-nani eeꞌnoko teni niiꞌnani Meeriꞌ beretuꞌ tee kuvi dakoꞌdoma oovureeꞌnaang. 2 Tenaanka teꞌ basiareko uꞌmiꞌ pankaing nkoaruꞌ. Narung koosinung˜ Ovoring bakaang paning-eta teꞌ siarara kuvi-aape bera tee kapang kaavororiiꞌ kato korimpuuꞌ eeꞌnoko tee-koo dau baꞌnamparuꞌ. 3 Bakaang ooꞌoo-koo piping-pinaꞌ oroꞌparitaaꞌ, eeꞌnoko bakaang mononopaꞌ aaꞌnaꞌ kakaara sinou-pinaꞌ. 4 Eeꞌnoko teing teꞌ tareaakoꞌning tee-koo aaꞌnaꞌ avoroꞌke daiꞌurioꞌ dankurankuꞌarima booꞌpinaꞌ otorouꞌ. 5 Eeꞌnoko teie koosinunge tenaanka manikumaara aaꞌpuretuꞌ, “Deeꞌ arorereaukaꞌ. Noruꞌansi oꞌnong deeꞌke Jiisuuꞌ besiꞌeremang, tee eeꞌnung aaꞌbarataꞌkoo taakavaieeng. 6 Tee tee aꞌ otoaꞌ, domamparing teeꞌ minkuvuuꞌnaꞌ. Poreta oovereaing aꞌ bempaieenooꞌ. 7 Teketa namuꞌke bereta bakaning barevare-nupoong aung kara nauereriai, aaꞌpereriaing, ‘Tee tee booꞌketa domamparing, eeꞌnoko Kaaleliꞌaape diiꞌkoo uroi bemaang. Teka berira ooveriaing.’ Teeꞌ eeꞌnaꞌ masikaꞌ ninge naurampesinaꞌ.”

8 Teketa tenaanka manikumaara namuꞌke tenkenuretuꞌ teketa kuvi dakoꞌdoma-ita avororema, nka tee domang dotue maantoꞌuresi. Eeꞌnoko kuaꞌparetuꞌ teing bakaning barevare-nupoong nauaareeꞌnaang. 9 Teketa Jiisuuꞌke tenaanka teka taunga taꞌninaꞌ oroꞌpari kuneꞌureta aaꞌpuretuꞌ, “Deeꞌke ee!” Eeꞌnoko tenaanka tee-anko poreta bakaang kauꞌ bokoꞌureta pankaing-antavuretuꞌ tee. 10 Teketa Jiisuuꞌke aaꞌpuretuꞌ tenaanka, “Arorereaꞌ bereta teing mmaikoriꞌ nauereriko Kaaleliꞌnameensiꞌaape beroai teka kuneꞌmaavaing ning.”

Teinge Kuvi Dakoꞌdoma Tarenukai Jiisuuꞌ Domamparuꞌnung Siraꞌpauꞌnaꞌ

11 Tenang tenaanka manikumaara taunge nanuresi otoreko niiꞌning teing-koo kuvi dakoꞌdoma tanatavaakoꞌning-koo Jerusalemaꞌ duparira siraꞌpauꞌ teing piristiꞌnuka-koo pankenanka nauaarima ookara kapooꞌnanka nkoaruꞌning. 12 Teketa teinge piristiꞌnuka-koo pankenge teing ninka nantoong-koo pankenanka ninka naroꞌke minkunaavarira teinge narung taung matauauꞌ. Eeꞌnoko teing piatooronuka mooniꞌ pankainge mooꞌaaruꞌ aaꞌpaarima teing, 13 “Aaꞌperiaing, ‘Bakaning barevare-nupoonge muunga aatumpirioꞌ bakiaaꞌaara nkavaing.’ 14 Teka tee aung kara aasirieeng-koong ovoꞌmaꞌke taaravuko deekoꞌ niiꞌke boing-antavampiaing tee, eeꞌnoko diiꞌ tee-koo kara-koo kiimatarariaukaꞌ.” 15 Teketa teinge piatooronukai teing mooniꞌnanka kompaara teeꞌ nariꞌ nauaaruꞌnaꞌ minkuakoꞌ. Eeꞌnoko biikaang minkunaa tee avitoitoi beremparuꞌ Juꞌnupoong-koo meuꞌke bera eꞌmung doong-koo basinooꞌkoo.

Jiisuuꞌke Bakaning Avitoitoi Nanaama Kara Nau-anta-koo Boto Sipuuꞌnaꞌ

(Mak 16:14-18; Luk 24:36-49; Jon 20:19-23)

16 Teketa tenang teing nanaiꞌketa narung barevare-nupoong Kaaleliꞌaape berouꞌ teꞌ mii-koo Jiisuuꞌke berooꞌnaang nauvuruꞌnooꞌ. 17 Eeꞌnoko teinge ooaara kinkinaama pankaing-antavauꞌ, teka niiꞌning keekooꞌariruꞌ. 18 Eeꞌnoko Jiisuuꞌ teing-anko pora aaꞌpuruꞌ, “Ookara iriꞌnanka paning-kooning eeꞌnoko kansiꞌkooning tee ning oko-antamuining. 19 Teeꞌkoo berira ookara nantoong amutemuuꞌ ning-koo barevare-nupoong deeng-antavereriaing aing aaꞌning miring-koo ntong-koo minkiererima meekaꞌantaverererima: tee Mmaꞌ eeꞌnoko ning Bauring eeꞌnoko tee Tanuaang Meekung. 20 Eeꞌnoko nau-antavereriaing ookara kapooꞌnanka ninge diiꞌke nko-koo botorampiruꞌning siompaavaꞌnaang, eeꞌnoko ning tee bakei masikaꞌ diiꞌ ninka nariꞌ oꞌnoaing ookara batei-koo bera doong asiꞌnooꞌke basi.”

<- MAATIUꞌ 27