2
Norukasiꞌnukai Jiisuuꞌ Beeroꞌauꞌnaꞌ
1 Teketa tee Jiisuuꞌ pontoꞌarioꞌ teke Beeteleemaꞌke Judiaꞌkoonooꞌke tenang tee daurarong˜ Eerotiꞌ otokoꞌnang niiꞌning norukasiꞌnuka duaaꞌ bakoaramanooꞌketa Jerusalemaꞌ porouꞌ. Porora niaꞌkaama aaꞌpaakoꞌ, 2 “Daurarong Juꞌnupoong biikaang pontoꞌaruꞌnung arerai? Niiꞌke bakaang beentoꞌ taꞌdaꞌpuioꞌ ooampira nanampikotaaꞌ enang moring tee-koo dootuuꞌmariiꞌnaang.” 3 Teketa tenang teie daurarong Eerotiꞌke teeꞌ taaravura tee bakei orakaꞌ mantomparuꞌ, teing Jerusalemaꞌnupoong tee ninka nariꞌ. 4 Teketa tenang teing ookara piristiꞌkoo pankenuka eeꞌnoko boto naunuka naroꞌ bokuvurira niaꞌurima aaꞌpuruꞌ, “Nko tee Kumponinge teroita Pakoꞌpariꞌniiꞌ nantoong domampurira tarevuriainooꞌkoo areꞌke pontoꞌaravainge?” 5 Teinge makuꞌaama aaꞌpauꞌ, “Beeteleemaꞌke, Judiaꞌkoonooꞌke, aiꞌ aung kara nakaronarai daarivuuꞌnung Daari Meekung-koo, aaꞌpuma,
6 ‘Daꞌ Beeteleemaꞌ, Judiaꞌkoonavuntuꞌ osi okiꞌnavuntuꞌ deeaꞌ teing-koo pankeng osi Judiaꞌnavaroi otoromaing-koo, aiꞌ daꞌketa tee narung tanata-nko tavoꞌkuaing nkanavitu Isireeli-nupoong sipisipiꞌnanka-pinaꞌ tanatavuriaing.’ ”
(Maika 5:2)7 Teketa teie Eerotiꞌke teing norukasiꞌnuka bakuꞌnooꞌ bokuvuruꞌ eeꞌnoko teing batei tee beentoꞌ oroꞌpari otouꞌning tampaꞌ noruꞌuuꞌnaang niaꞌuriko nauauꞌ. 8 Teketa botovurima teꞌ Beeteleemaꞌaape aaꞌpuruꞌ, “Berira tampaꞌ besiꞌeriai tee tootoꞌ, eeꞌnoko ooverira namuꞌke ning naumeriai, meraiꞌnang tee-koo dootuuꞌmaravainaꞌ.” 9 Teketa teinge tee daurarong taaravaara tenkenauꞌ, eeꞌnoko tee beentoꞌ duaaꞌ bakoaramanooꞌaapea tutung ooauꞌnung teing-koo napoꞌ oroꞌparara uroꞌkanooꞌke nanuuꞌ bera teꞌ tootoꞌ otouꞌnooꞌ dau datearuꞌ. 10 Tenang teinge tee beentoꞌ teka ooaara doturotue maantoꞌurira bakei aaꞌnaꞌ doꞌderoꞌdeꞌariruꞌ. 11 Teketa tenang pava-koo kuung porora teinge tee tootoꞌ ooauꞌ bauko ninka Meeriꞌ ninka otoreko. Eeꞌnoko teing teꞌ doonko miinge keemparira tee-koo dootuuꞌariruꞌ. Teketa biikaang bakurananka daateꞌaara kapooꞌ mooꞌ pankeng-kooninge bautaꞌauꞌ tee aaꞌninge: kooro, kapooꞌ betuꞌuko tampaꞌ nuuraaꞌ eeꞌnoko duuni tampaꞌ nuuraaꞌ miring meea. 12 Eeꞌnoko noone-koo koono-antavurioꞌ Eerotiꞌanko napoꞌ beroarooꞌnaang teing norukasiꞌnuka niiꞌnavunge biikanameensiꞌaape toroariruꞌ.
Josepaꞌdaang Iisipiꞌaape Kooꞌariruꞌnaꞌ
13 Teing beroioꞌ napoꞌ tee koosinung Ovoring bakaang Josepaꞌankoi oroꞌparuꞌ noone-koo, teketa aaꞌpuuꞌ, “Daaꞌdaravai. Tee tootoꞌ eeꞌnoko bauko bokuereta Iisipiꞌaape mmaririra bera teke otoriko ninge nauranko deekoꞌ tororariai, aiꞌ Eerotiꞌke tee besiꞌuuꞌnaang tee tootoꞌ dupisiꞌuuꞌnaang.” 14 Teketa iꞌamparara tee tootoꞌ eeꞌnoko bauko bokuvureta tenang muunga Iisipiꞌaape tenkenauꞌ. 15 Bera teke otorouꞌ Eerotiꞌ booꞌparuꞌnooꞌke basi. Teeꞌ nkoarioꞌ tee kara Ovoring bakaang makotuuꞌ nakaronara˜ karantavuma˜ aaꞌpuuꞌnaare:
“Ninge bokuantuꞌ tee nnuring Iisipiꞌketa.” (Osea 11:1)
Eerotiꞌke Tampuioꞌ Toirekaaꞌ Tavaaruꞌnaꞌ
16 Teketa tenang Eerotiꞌke noruꞌuraiꞌnange teinge norukasiꞌnukai tee tosiaara divuꞌauꞌnung tee, tee bakei aaꞌnaꞌ iiravouꞌ eeꞌnoko tee botoaruꞌ ookara toirekaaꞌ donkaang Beeteleemaꞌnavete-kooning dupisiꞌkoo biikaang mareꞌ beemareu-koo basiariaing
* teing norukasiꞌnukai nauauꞌnooꞌka noruꞌ nkavura.
17 Teketa tenang eeꞌnang tee kapooꞌ tee-koo Daari Meekung-koo nakaronarai Jeremaiaꞌke tero minkuvuuꞌnung masikaꞌparuꞌ.
18 Aaꞌpuuꞌ,
“Narung aurong teka Raama-nairu-koo taaravansing, aaꞌnaꞌ orarunsiari uiarama biromparako, teni Reesiel baurukaaꞌkoo biromparako, dunsirunsi-antavaako˜ piavoaruuꞌ baurukaaꞌ oparirioꞌ.” (Jeremaia 31:15; Pupuꞌ 35:19)
Josepaꞌdaang Iisipiꞌketa Toroariruꞌnaꞌ
19 Teketa tenang Eerotiꞌ booꞌparioꞌ, tee koosinung Ovoring bakaang napoꞌ Josepaꞌankoi noone-koo oroꞌparuꞌ teke Iisipiꞌke. 20 Eeꞌnoko aaꞌpuuꞌ, “Tanterarara tee tootoꞌ eeꞌnoko bauko bokuereta teꞌ Isireeli-nameensiꞌaape beriai, aiꞌ teing tee tootoꞌ dupisiꞌkoo piavorokoꞌning teing booꞌpariruꞌning.” 21 Teketa tantearara tee tootoꞌ eeꞌnoko bauko bokuvureta Isireeli-nameensiꞌaape berouꞌ. 22 Teka tee Akeleasi Judiaꞌnavete tarevuko bauma tee Eerotiꞌ pariꞌantavura tee Josepaꞌ avorouꞌ teꞌ beꞌkoo. Eeꞌnoko noone-koo napoꞌ koono-antavuioꞌ Kumponinge Kaaleliꞌnavete-koo berouꞌ. 23 Eeꞌnoko berora narung osi miring Nasaretiꞌnamono-koo otorouꞌ. Teeꞌ nkoarako tee kara nakaronara karantavuma Ovoringe minkuvuuꞌnung masikaꞌparuꞌ, aaꞌpuuꞌnung,
“Nasaretiꞌnung tampaamaatoaing.”
(Aisaiaꞌ 11:1; 53:2)
<- MAATIUꞌ 1MAATIUꞌ 3 ->
- a Tee tootoꞌ Pakoꞌpariꞌniiꞌ tokoa otoko naroꞌka tavaavaꞌnaang piavora, mareꞌ beemareu-koo kuunge otoing-pinaꞌ noruꞌuma.
