MAATIUꞌ 11

Jiisuuꞌ Baa Masikung?

(11:1–16:20)

Tee Jooni Minkinara Jiisuuꞌkoo Niaꞌkuuꞌnaꞌ

(Luk 7:18-23)

1 Teketa Jiisuuꞌke teing bakaning nanaiꞌketa kenaanka barevare-nupoong tautauvurikotaaꞌ bakearako osinanka-koo Kaaleliꞌnameng-kooning-koo dueꞌke daankinamparama nau-antavuriiꞌnaang beuꞌ.

2-3 Eeꞌnoko Jooni Minkinara kiimata-navaꞌkoo otoi teing kapooꞌnanka Karistooꞌke nkovukoꞌning taaravura teie kenaankara bakaning barevare-nupoong-koo botovuretuꞌ tee Jiisuuꞌanko tee niaꞌurema aaꞌpureeꞌnaang, “Daꞌ ee tee tavoꞌkuaing-koong, aiꞌ mmeꞌ niiꞌnung nempampiainge?” 4 Eeꞌnoko teie aaꞌpuretuꞌnung tenaanka, “Bereta nauereai tee Jooni Minkinara kapooꞌ deeꞌke ooveresining eeꞌnoko taaraveresining; 5 Aaꞌnoining: kaputuꞌnuka banteaama ookai, kauꞌ deꞌdoonuka nanai, oramuuꞌpoꞌnupoong kiiroraaꞌariri eeꞌnoko kipaunuka taareai, booꞌnuka daaꞌariri, ataꞌoinku tampara doorenang daankianko taaravai. (Aisaiaꞌ 29:18-19; 35:5-6; 61:1)

6 Eeꞌnoko biraankearavaing tee naning ning-koo dateꞌpari baitoaravaing, eeꞌnoko nkaang nko-nko akoveeꞌ mareꞌuaukaꞌ.”

Jiisuuꞌke Tee Jooni Minkinara Minkuvuma Nauvuruꞌnaꞌ

(Luk 7:24-35)

7 Teketa Jooni Minkinara bakanaanka kara-nkara toroareko Jiisuuꞌke kara-nau tutumpuruꞌ nantoong karinga Jooni minkuvuma, eeꞌnoko aaꞌpuuꞌ, “Diiꞌke aremuriiꞌ naning doore taaraverira meeꞌboraꞌ sirakamaaꞌkoo ooveriiꞌnaang berikoꞌ karikaꞌduri? Naning tunsi-paaka onou avitoitoi eeari otoꞌ oo-koo teꞌ beriarupeuꞌ, apeꞌ? 8 Napoꞌ naning nepuꞌarama kirokaiari otomaung oo-koo beriaꞌ, apeꞌ aing? Aiꞌ teing nantoong baarong tampenge nopaꞌarimaing dauraronanka biikaning-koo pava-koo oovereripeuꞌ, meeꞌboraꞌ sirakamaaꞌkoo deeaꞌ. 9 Teka arekeeꞌ masikaꞌ oroꞌ oo-koo berikoꞌ diiꞌ, aiꞌ narung nakaronara? Eeꞌ, tee bakei nakaronara masikung Kumponing-etaing emuꞌ ninge naurampimang diiꞌ. Tee tee aaꞌnung ookara nakaronuka-koo dau basie tee. 10 Aiꞌ aung eeꞌnung miruꞌui Daari Meekung-koo eeꞌ minkuari otong Kumponinge bauring Karistooꞌ temuꞌ nauvuuꞌnooꞌka aaꞌpuma,

‘Ee aung, ninge botoampaing nkaang kara-nka daꞌkoo uroꞌke tee taung maamu-antareruaing uroitaaꞌ.’ (Malakai 3:1)

11 Masikaꞌ naurampimang diiꞌ, Jooni tee ookara nantoong tee-koo uroꞌke pontoꞌariruꞌning-koo tee deto basi pankaing, teka ninge eeꞌ naurampimang, enang-eta deto baata teing ninge tare-koo arooꞌariaining, bane Kumponing bakaang muuꞌkoo miring okiꞌnarekaꞌ, teinge tee Jooni puruꞌai otoroaing. 12 Teketa Jooni Minkinarai daankinang tutumpuuꞌnooꞌketa bera doong eꞌmunung-koo basi-nooꞌkoo tee paninung muuꞌ tee iriꞌoi daaꞌaramang, eeꞌnoko teing teꞌ muuꞌkoo kuung poromaing teing iriꞌoroi tee-koo pinkaꞌarimaing. 13 Aiꞌ tee tee uripoꞌketa nakaro-nupoonge eeꞌnoko Moosesi-nung botoi paninung muuꞌ tavoꞌaravainaꞌ tarampeearima˜ minkuauꞌ bera Jooni bakaang batei-koo basi. 14 Diiꞌke masika-antaveriaing deekoꞌ tee Jooni tee eeꞌnung Eliasi miruꞌari otong Kumponinge uroꞌke pooꞌnaang tampuuꞌnung teinge nakaro-nupoonge minkuauꞌnaꞌ. 15 Diiꞌ punkang-poꞌnupoong deekoꞌ enang taaraveriai!”

16 Teketa Jiisuuꞌke napoꞌ aaꞌpuuꞌ, “Diiꞌ nantoong emuꞌnavarang ninge aminge pa miruꞌdampipeuꞌ? Diiꞌ teing toireꞌpinaꞌ oroꞌnanka baaveroma baꞌnaniai turampeemaing biiꞌka aaꞌpeema, 17 ‘Kovi puunterorompiko konterorima neekarariarukooꞌ. Aiꞌnontuꞌmariko diiꞌ birontariarukooꞌ.’ Teeꞌ nariꞌ oorarampimaung neeꞌ tokomererimaing. 18 Jooni Minkinara poraiꞌnange taamang tovang uaini kerempuko konterorima aaꞌperikoꞌ, ‘Tee maꞌnaang-poꞌnung.’ 19 Eeꞌnoko ning Tee Naning-naumpoꞌ Paning-etaing mora taamanama tuaamarako napoꞌ konterorima aaꞌmerimaung, ‘Aung ooveriai taamang eeꞌnoko uaini nai bauko, taakisi nkanuka eeꞌnoko niiꞌning orenge biiꞌmaikoꞌke!’ Teka Kumponinge avutevuꞌmuresi botomuresinaꞌ sinampuko diiꞌke bakaang matau tasiꞌperiaing.”

Piaaruꞌnanka Bakei Teing Osi Pankeng Bereꞌariaing.

(Luk 10:13-15)

20 Teketa tenang Jiisuuꞌke teing osi pankenanka taaꞌniꞌantananka nkovuko ooauꞌning daankiarama turampuruꞌnung bereꞌariaruko oovurira. 21 Aaꞌpuruꞌ, “Bakaꞌe piaaruꞌnuka diiꞌ Korasin-nupoong, toraꞌkiriaining. Piaaruꞌnuka diiꞌ Besaida-nupoong, diiꞌ toraꞌkiriaininge, aiꞌ diiꞌ teing kapooꞌnanka iriꞌpoꞌning taꞌnimpaariiꞌnanka diiꞌkoo nkoaruꞌning ooverima bereꞌdariaruuꞌ. Teinge Juꞌdeeaing Saidoniꞌnupoong eeꞌnoko Taiaꞌnupoonge ooaara dei namuꞌke bereꞌaripeuꞌ sipunge pooꞌarima mononopaꞌ orarunsi-koong kurumparipeuꞌ bereꞌariruꞌnung-koo taaꞌniꞌantavarima. 22 Teka aaꞌdampimang, teꞌmung Kumponinge nantoong simpeꞌurima kiimatavuriainaꞌmung diiꞌke dau basinooꞌ toraꞌperiaing Taiaꞌ naankai Saidoniꞌ toraꞌpureainooꞌketa. 23 Eeꞌnoko diiꞌ Kapaneumeꞌnupoong deto paning-koo basirariaining-pinaꞌ daang noruꞌdarimaing. Diiꞌ doonko mosianung-koo sing-antaruriaining. Teing taaꞌniꞌantananka diiꞌkoo nkoantuꞌning Sodom-namono-koo nkoantuꞌnung dei temono tee teeꞌ nariꞌ otopeuꞌ eꞌmung-koo basinooꞌkoo. 24 Teka ninge eeꞌ naurampimang teꞌmung simpeꞌ nkonaꞌmung kiimata bakei aaꞌnaꞌ toraꞌperiaining diiꞌ, teing-koo temuꞌnupoong oreng-koo dau basinooꞌ, biikaang osi Sodom Kumponinge paroꞌuuꞌning-koo.”

Mankiꞌpoꞌnupoonge Uaa Kompaavainaꞌ

(Luk 10:21-22)

25 Tenang eeꞌnang Jiisuuꞌke aaꞌpuuꞌ, “Mmaꞌ ee, tampara tantamang daꞌ Ovoring paning-koong eeꞌnoko kansiꞌkoonge, dake aaꞌnouꞌnung-koo: Dake tee doorenang tampara bakuꞌeuꞌnung-koo teing-koo matau-poꞌnupoong eeꞌnoko noruꞌpoꞌnupoong tamparimaing-koo eeꞌnoko siraꞌpeuꞌ teing-koo tootoia-pinaꞌ otoromaing-koo. 26 Teing nantoong piaaveri piarouꞌnaꞌ teeꞌ. Eeꞌ, Mmaꞌ.”

27 Eeꞌnoko nantoong karavurima aaꞌpuruꞌ, “Ookutunung kapooꞌnanka tee Mmaꞌke pareꞌmuuꞌnung, eeꞌnoko naning otoaꞌ ning Tee Bauring noruꞌmui otoing, Mmaꞌke deekoꞌ noruꞌmui otong. Eeꞌnoko napoꞌ naning otoaꞌ Mmaꞌ noruꞌui otoing, teka ninge Bauringe deekoꞌ noruꞌansi oꞌnong. Eeꞌnoko nantoong teing naing ninge Bauringe miruꞌarampaining-koo oroꞌantavanko noruꞌaavaing tee.

28 “Ning-koo poriai diiꞌ ookara iriꞌ oꞌdarima mankiꞌdorimaing avutevuꞌ matau siomperima poreꞌdorimaing, eeꞌnoko ninge uaa-antarampiaing diikaang tanuaang. 29 Ning nkaang tare-koo kuung porira ning-koo barerariai, aiꞌ ning tee banainge otoꞌ, eeꞌnoko domang boonko noruꞌmari otoꞌke. Eeꞌnoko ning-koo tee diikaang tanuaang uaa-anta komperiaing. 30 Ninge tare-koo diiꞌ arooꞌdariri dei mankiꞌdoriaꞌ kuaaꞌdoripeuꞌ ning siomeritaaꞌ.”

<- MAATIUꞌ 10 MAATIUꞌ 12 ->