IIBURU 8

Jiisuuꞌke Piristiꞌ Bakaang Nko-nko Nkovumanaꞌ Paning-koo

1 Enang minkuampirinaꞌkoong okoraꞌnooꞌ aung: Niiꞌ tee teeꞌ oroꞌ piristiꞌ pankaing otoꞌmemuring, tee tampavine-koo baꞌnanui otomaung teke Ovoring Pankaing baꞌnanui tarearamanooꞌke paning-koo. 2 Tee teke piristiꞌ deempari tanatavaramaung teke meepoꞌke dootuuꞌdoma masipoꞌke, naninge birenge donkong-antavuaꞌ, Ovoringe baka nkovuuꞌnooꞌ teꞌ.

3 Ookara piristiꞌnanka pankeng teing tee avuavuꞌnanka eeꞌnoko boontunang nko-koo miruꞌaarikoꞌning, teeꞌkoo bakei kapooꞌ niiꞌnung avuavuꞌ otong teie Karistooꞌke piristiꞌ pankaing deempari boontunampuaining. 4 Aung-koo kansiꞌkoo anke otoꞌkoo dei tee piristiꞌ deempari otoarupeuꞌ bakei, niiꞌning niiꞌnamuuꞌkooning temuꞌketa otoromaing otoroko botoi miruꞌurioꞌ avuavuꞌ tavoꞌaamaing. 5 Teing tee tamung uuꞌaaꞌnooꞌkoo tanatavari dootuuꞌarimaung, paning-koo otoinooꞌ meepoꞌ paara-antanooꞌkoo. Aiꞌ tenang teie Moosesie teva meekava kaandesi-koonava kani-koo daruvuuꞌnang tee Kumponinge nau-antavuuꞌ nkovuainaꞌ aaꞌpuma,

“Ooveko dake ookara kapooꞌnanka tee biikaang paaranang siompei nkoveaing tero naurantuꞌnaꞌ teka miinani-koo.” (Toro 25:40)

Nerakung Kara Naroong-anta Tee Tampara Masikung, Urikung Puruꞌui Otong

6 Teka masikaꞌpari otoinaꞌkoo eeꞌ otong, Kumponinge damaꞌnung kara naroong-anta bakei tampaꞌ nkovuuꞌ maraka-anta aaꞌnaꞌ tampenge daiꞌura temuꞌnung boto eeꞌnoko bakaning maraka-anta puruꞌuioꞌ, eeꞌnoko Karistooꞌ tee kara naroong-anta-koong meuꞌnung deemparitaaꞌ bakaang nko-nko paku-koong teeꞌ nariꞌ dau basinooꞌ aaꞌnaꞌ tampara temuꞌning piristiꞌ pankenanka kansiꞌkooning biikaang nko-nko puruꞌuitaaꞌ.

7 Tee tutunaꞌnung kara naroong-anta koontoꞌ makosi dei tee kenaanka-nung otoꞌkoong doona otoarupeuꞌ. 8 Teka teie makosi deeaung tampuuꞌ Daari Meekung-koo aaꞌpuuꞌnooꞌka,

“Ovoringe aaꞌpumaung: Niiꞌnaꞌmung doong tavoꞌkuko ninge nerakung kara naroong-anta sipevorompaing Isireeli-nupoong-koo eeꞌnoko Judiaꞌnupoong-koo. 9 Tee kara naroong-anta nerakung tee-pinaꞌ kara naroong-anta biikakatauro-koo nkoantuꞌnung-pinaꞌ deeaꞌ tenang ninge nkaang birenge baramparantuꞌnang Iisipiꞌnameensiꞌketa, aiꞌ teinge tee kara sipevorontuꞌnung danto nariꞌ siompaavaruuꞌnung-koo ning noruꞌ oꞌnoaruuꞌ teing-koo.

10 Aung tee kara naroong-anta ninge donkompamaꞌnaang otomaung teing-koo ookara Isireeli baꞌdompenkuri-koo, Isireeli-nupoong-koo eeꞌnoko Judiaꞌnupoong-koo, doong urikeng tankinuko, aaꞌnoaing, nkaang botonanka biikaang onou-koo sipampai biikaang domang-koo daariamira, eeꞌnoko ning tee biikaang Kumponing oꞌnoaing eeꞌnoko teing nkaning nantoong otoroai. 11 Eeꞌnoko teinge napoꞌ biiꞌmaikororiꞌ eeꞌnoko biiraꞌmainkaang nau-antavaariaukaꞌ ning-koo aaꞌpaama, ‘Ovoring-koo barerariai,’ aiꞌ ookarai tee ning noruꞌmai otoroaing okiꞌnarekaꞌketa bera pankenanka-koo basie. 12 Aiꞌ ninge tee teing piaavaramira biikaang orakaꞌ nkonanka-koo ampaꞌmora norunoruꞌarampaing napoꞌ. Ovoringe teeꞌpumaang.” (Jeremaia 31:31-34)

13 Teie nerakung kara naroong-anta minkuvuma tee tee tutunaꞌnung urikaꞌantavuuꞌ. Eeꞌnoko tee urikung iriꞌ otoarura dueꞌka paaꞌaraaꞌnaang.

<- IIBURU 7 IIBURU 9 ->