IIBURU 7

Jiisuuꞌ Tee Piristiꞌ Melkesedek-pinaꞌ Miring Pankaing-poꞌnung

1 Enang Melkesedek-koo napoꞌ noruꞌantarampiiꞌnaang. Tee eeꞌnara tee Saalemaꞌnavuntuꞌkoong daurarong˜, eeꞌnoko piristiꞌke Kumponing deto basi bakaang. Teie eeꞌnarai tee Eebaraamiꞌ dauraronanka tavuruꞌnooꞌketa toroarako kuneꞌura Kumponing-koo marakavari biraankevuuꞌ tee. 2 Eeꞌnoko tee Eebaraamiꞌke kivora-koo narung avuuꞌ ookara kapooꞌnanka-koo tavurira nkavuuꞌning-koo. Teenooꞌ tee Melkesedek kenaanka kapooꞌkoo daurarong, aaꞌning-koo koontoꞌkoo eeꞌnoko mooa-koo. Eeꞌnara bakaang miring bereꞌarama miruꞌnooꞌ tee “Daurarong Koontoꞌkoong”, eeꞌnoko temono osinamono-koong miring Saalemaꞌ bereꞌarama miruꞌnooꞌ “Mooa” tampari otong. Teeꞌkoo napoꞌ tee tee eeꞌnara daurarong mooa-koong. 3 Eeꞌnoko tee-koong minkunaa-koo tee eeꞌnara bauma eeꞌnoko bauko Daari Meekung-koo miring otoaꞌ eeꞌnoko bakanaving-koong parapara-koong minkunaa otoaꞌ, eeꞌnoko bakaang otootoꞌkoo tutumparuꞌnooꞌ eeꞌnoko bakeroma otoaꞌ, teka bakaang otootoꞌ tee tee-pinaꞌ Kumponing Bauring tee piristiꞌ teeꞌ nariꞌ otoi otoꞌ.

4 Ooveriko, Melkesedek eeꞌnara naning pankaing. Aaꞌnoko Eebaraamiꞌke, bane Juꞌnupoong ookara biikaang pankauꞌmoi, tee eeꞌnara aaꞌnaꞌ pankaing tasiꞌpui kivora-koo narung avuuꞌ ookara kapooꞌnanka tavurima nkavuuꞌning-koo. 5 Teka teing Liivaiꞌ bakanaving-kooning Juꞌnupoong-koo piristiꞌnanka deemparikoꞌning teing Moosesi-nung botoi tampuioꞌ biiꞌmarange narung kivora-koo narung avaarikoꞌ, teinge eeꞌninge ookarai naroꞌka Eebaraamiꞌ baꞌdompenkue. 6 Teka tee aung Melkesedek Eebaraamiꞌketa narung kivora-koo narung nkavuuꞌnung tee deto basi teing ookara-koo, teing-koong deeaꞌ paraparai.

Eeꞌnoko napoꞌ Melkesedek-ke pankaimpari tee Eebaraamiꞌ, bane maraka-anta-poꞌnung, biraankevuuꞌ. 7 Aung-koo kapooꞌkoo paapaaꞌ otoaꞌ, naning tee biraankevumaung pankaing tee-koo biraanke nkavumaung-koo.

8 Napoꞌ teing piristiꞌnuka Juꞌnupoong-koo, narung kivora-koo narung nkavaakoꞌning teing booꞌkoo-nupoong, teka tee Melkesedek tee domampari otong, teeꞌ naumurimanaꞌ.

9-10 Napoꞌ tenang Melkesedek-ke Eebaraamiꞌ kuneꞌuuꞌnang minkuampima niiꞌke aaꞌpampipeuꞌ: Eebaraamiꞌ baꞌdompenku Liivaiꞌ bakanaving-kooning piristiꞌnanka mmeꞌ tavoꞌariaruko Eebaraamiꞌ ninka nariꞌ kivora-koo narung Melkesedek avauꞌnung-pinaꞌ otong.

Nerakung Pristiꞌke Teing Urikaving-kooning Puruꞌuri Pariꞌantavuruꞌnaꞌ

11 Napoꞌ eeꞌkoo Melkesedek Liivaiꞌnariong-koong piristiꞌnanka-koo naning pankaing deto basi tasiꞌpampimaunge: Kumponinge tee Juꞌnupoong boto avurima piristiꞌnanka miruꞌuruꞌ Liivaiꞌ bakanariong-kooning teing okoraꞌariri tee boto tanatavaavaꞌnaang. Teka teinge nantoong makosinaꞌ naroong-antavaariko dei teie Kumponinge oovunooꞌka piristiꞌ daaꞌuarupeuꞌ Melkesedek-namuriiꞌ, temuriiꞌ Liivaiꞌ, Eeroni dovang biikanamuriiꞌ deeaung.

12 Enang tee piristiꞌnung aarumo paariarako deekoꞌ napoꞌ tee kara naroong-anta boto teeꞌke paariarapeuꞌ bakaning botonanka ninka nariꞌ, eeꞌnoko teeꞌ nkoarama paariaruꞌ. 13 Aiꞌ tee naning paariaruꞌnung naumuriiꞌnaang otoing tee oovunaving-koong boonturomai kapooꞌ nkoaavarukoꞌning-koong. 14 Aiꞌ tee tee siraꞌpari otong tee niikaang Ovoring tee Juda bakanaving-koong eeꞌnoko teving-koo eeꞌnaving-koo Moosesie piristiꞌaapenung kapooꞌ minkuvuaꞌ.

15 Tee boto paariaruꞌnaꞌ napoꞌ aung-koo aaꞌnaꞌ siraꞌpari otong: oovunara piristiꞌ donkonuuꞌnung-koo Melkesedek bakanaꞌ siompui. 16 Aaꞌnouꞌnaꞌ: Botoi eeꞌnoko mono-aapenung paraparai minkuvui otoinaꞌ teeꞌ otoko tee Jiisuuꞌ domaang oꞌpaaꞌkoong iriꞌ ninka piristiꞌ deempari donkonuuꞌ. 17 Eeꞌnoko Daari Meekunge teeꞌ nariꞌ siraꞌpui otong aaꞌpumanooꞌke,

“Daꞌ tee piristiꞌ deto basi teeꞌ nariꞌ otomatoaing Melkesedek bakanaꞌ siompei.” (Kena 110:4)

18-19 Tee boto temuꞌnung tee tontaꞌniiꞌ, aruaruꞌ eeꞌnoko makotuaung deemparako, aiꞌ teie botoi koontoꞌ naning naroong-antavuaꞌ. Teka niiꞌnaꞌ biraanke-aapenaꞌ tasiꞌantamuruꞌ Kumponing-koo dueꞌmariainaꞌ.

20 Eeꞌnoko teeꞌ biraanke-aapenaꞌ tamung nkovuaꞌ, teka teeꞌ masikaꞌ deto minkuvuma tee kara naroompui pinkaꞌuuꞌ. 21 Teinge tero uroꞌke piristiꞌ deemparikoꞌninge teeꞌ nkoaama meekaꞌparikoꞌ masikaꞌ deto otoarukoꞌnang, teka tee aung Karistooꞌ tee masikaꞌ deto minkuvuma pakoꞌpariꞌuuꞌ aaꞌpuuꞌnooꞌka,

“Ovoringe tee masikaꞌ deto tampuing eeꞌnoko bakaang noruꞌ paariaravaukaꞌnunge. Teie aaꞌpuing: Daꞌ tee piristiꞌ deto basi teeꞌ nariꞌ otomatoaing.” (Kena 110:4)

22 Kumponinge teeꞌ pinkaꞌantavura niiꞌ bakei tampaꞌ biraankenaꞌ kara naroong-antamemuruꞌ temuꞌnaꞌpinaꞌ deeaꞌ, eeꞌnoko tee tee teie Jiisuuꞌke okonara deemparara bakei dupe-antavuaing.

23 Urikupoong piristiꞌnanka teing mmauꞌnanka deerunooꞌkoo, aiꞌ biikaang nko-nko-ita booꞌke siꞌantavuriko biurukaaꞌke paari-antavaarikoꞌ. 24 Teka Jiisuuꞌke tee teeꞌ nariꞌ piristiꞌnung nko-nko kompui otomaung doong kante teeꞌ nariꞌ domampari otomaung-koo. 25 Teeꞌkoo ookara batei-koo nantoong tee-koo kuunge Kumponing-koo poroaining Jiisuuꞌke tee teing domang-anta-koo makosi, aiꞌ teie teeꞌ nariꞌ domampari otoi eentavarama pakuvurimaung.

26 Aiꞌ tee teeꞌ makosinaꞌ niiꞌ narung piristiꞌ pankaing otoꞌmemuriiꞌnaang, tee meekung, tuumpiaravaunge, kuꞌmiꞌdopai, nantoong orananka-ita pokaꞌari otong, eeꞌnoko pankaing-antaniiꞌ ookara kapooꞌnanka-koo dau basi, paning-kooning-koo eeꞌnoko kansiꞌkooning-koo. 27 Tee tee teing-pinaꞌ niiꞌning piristiꞌ pankeng-pinaꞌ deeaꞌ kantoꞌpuriaruma aꞌmunteꞌmunge boontunang nkoaakoꞌning-pinaꞌ tutunaꞌ biiꞌka biikaang orakaꞌ nkonanka-koo eeꞌnoko damaꞌke ookara nantoong biikaning-koo. Teie Jiisuuꞌke tee tee-koo orara aarumo otoaruko boontunang naroꞌka bakevui nkovuuꞌ tenang baka avari boontunamparuꞌnang. 28 Tee tee Moosesi-nung botoi nantoong aruaruꞌnanka deempariko piristiꞌnanka pankainanka otorooꞌnaang miruꞌurikoꞌ, teka tee-koo damaꞌnung karai Kumponinge masikaꞌ detoarama aaꞌnaꞌ pinkaꞌuuꞌnunge tee Bauring piristiꞌ pankaing deemparaaꞌnaang miruꞌuuꞌ, tee ookara batei-koo makosi-antaniiꞌ deemparako.

<- IIBURU 6 IIBURU 8 ->