IIBURU 6

Kumponing Neng-koo Kontemoriaukaꞌ Biraanke Dupearavainooꞌ Noruꞌampima

1 Enang tee Kumponing bakaang kara-koo okoraꞌnooꞌ Karistooꞌ tero Pakoꞌpariꞌniiꞌ noruꞌkoong teeꞌ nariꞌ putuꞌampiaukaꞌ, teka napoꞌ naunaue kato meriaing Karistooꞌkoo pankaꞌmaririning-pinaꞌ. Pava-koo natuku narung amutemuꞌke unampampima keempampiaukaꞌ temuriiꞌ narung kara minkuampima. Temuꞌketa noruꞌeruꞌ tee temuriiꞌ kara diiꞌ orakaꞌ nkonanka-ita booꞌaapening-eta orarunsirarira bereꞌdariaing-koong. Napoꞌ diiꞌke noruꞌeruꞌ tee Kumponing masikaꞌantaveriainaꞌ. 2 Niiꞌke tee temuꞌketa amutemuriiꞌ aarumo meekaꞌanta-koong nau-antararampiruꞌ, eeꞌnoko bireng panteꞌ. Diiꞌke napoꞌ noruꞌeri otong tee booꞌketa daaꞌ eeꞌnoko tee simpeꞌmurira miruꞌmuriko doong kante teeꞌ nariꞌ oꞌnorimaatoainaꞌ. 3 Teeꞌ eeꞌnaꞌ tee Kumponinge tauraꞌmuriko kato nenkeꞌansitaaꞌ nau-antarampiaing.

4 Enang napoꞌ tee berevereꞌ unaunampampima minkuampiarooꞌnaang, aiꞌ teing nantoong tutung araka-koo otorokotaaꞌ damaꞌdu toroariko napoꞌ naninge bereꞌanta-koo makotuaꞌ, aaꞌning paning-etaing avuavuꞌ mantompauꞌ Tanuaang Meekung nariꞌ kompaara. 5 Eeꞌnoko teinge mantompauꞌ tee Kumponing bakaang kara-koo tariiꞌnooꞌ eeꞌnoko napoꞌ mantompauꞌ teing iriꞌnanka Kumponinge bakaning avurimaung ovorimpariri otoroainaꞌ. 6 Teing eeꞌning napoꞌ beiꞌbeiꞌariko naninge napoꞌ bereꞌanta-koo makotuaꞌ teing. Teeꞌ nkoarima Kumponing bauring aaꞌbarataꞌkoo napoꞌ biiꞌka taakavaamaung-pinaꞌ nkoaamaung sirapoꞌka nantoonge pooreꞌkoo.

7 Kansiꞌke tee apoꞌuko ntong kompura keenkeenanka nantoonge keempaamaing piavoromanaꞌ tampaꞌ duꞌantavuko Kumponinge manee-antavukooꞌ. 8 Teka teie kansiꞌke tooꞌmurintaaꞌ dovang tonto duꞌantavuko tee binaaꞌomaung, eeꞌnoko barakosiꞌkoo makosi. Botue ntaꞌkoo tai-anta-koong tee.

Kumponing Bakaang Maraka-anta Masikaꞌantavampiri Oꞌnoriai

9 Teka ee maikoriꞌ, bane teeꞌ karoma nau-antaramping ninge diiꞌ eeꞌning masikaꞌantarampiri otong tee diiꞌ teing-pinaꞌ deeaꞌ, teka domaang-aape-navung-koo otoring. 10 Kumponing tee koontoꞌnaꞌ nariꞌ nko, eeꞌnoko diikaang nko-nko eeꞌnoko piaa tamung doonko oovuaukaꞌnung, tee eeꞌnung piaa Kumponing-koo oroꞌantaverimaung bakaning pakuererima temuꞌketa eꞌmung doong-koo basinooꞌkoo. 11 Eeꞌnoko diiꞌ teeꞌ nariꞌ aaꞌnaꞌ nkorariiꞌnaang piamorimang bera tee kapooꞌ diiꞌke nemperimaung asiꞌnooꞌka diiꞌkoo dupeari taaꞌniꞌpoainooꞌke basi. 12 Teeꞌ nau-antarampimang diiꞌ konteroriaukaꞌnaꞌ, teka siompereriai teing biikaang baito ninka iriꞌ oꞌpaaꞌ ninka barenku maraka-antavuruꞌnanka okovurimaing.

13 Teeꞌ Kumponinge Eebaraamiꞌ maraka-antavuuꞌnaꞌ eeꞌnoko siompuuꞌnaꞌ ooveriaing teeꞌ daari meekung-koo naumurimanaꞌ eeꞌ,

“Bakei biraankeransioꞌ daꞌ berentaramatoaing.” (Pupuꞌ 22:17)

14 Tenang tee maraka-anta Eebaraamiꞌkoo nkovuuꞌnang, baka-koo masikaꞌ deto tamparuꞌnung naning tee masikaꞌ deto tamparapeuꞌnung otoaruko tee-koo dau basi. 15 Eeꞌnoko Eebaraamiꞌ tenaare-koo eꞌmanui iriꞌ oparavaꞌ teka miiꞌkuitaaꞌ nemparuꞌ, eeꞌnoko tee maraka-antavuuꞌnung biraanke nkavuuꞌ.

16 Nantoong tee tee-koo pankaing-koo teing-koo dau basi-koo masikaꞌ deto tamparimaung, eeꞌnoko tenang-eta deto kapooꞌ minkuaavarupeuꞌ tee kara pinkaꞌniiꞌ noruꞌaitaaꞌ. 17 Teeꞌkoo masikaꞌ deto tampuma Kumponinge bakaang maraka-anta pinkaꞌuuꞌnung niiꞌke tee biraanke okomuriaininge eeꞌ tasiꞌpampiiꞌnaang: bakaang kara maraka-antamuruꞌnaꞌ paariaravaukaꞌnung. 18 Tee tee Kumponinge kapooꞌ kenaanka aampariꞌkoo makosi deeaing ninka bakaang kara pinkaꞌuuꞌnung aaꞌning ninka maraka-anta eeꞌnoko masikaꞌ deto, teing eeꞌning minkuvuma tosiaravarupeuꞌning. Teing eeꞌning-koo niiꞌ Kumponing-koo neeꞌmariri oꞌnorimaing aaꞌnaꞌ domang dontomuri pinkaꞌmariri oꞌnoring tee kapooꞌ naumurioꞌ nempampimaung noruꞌampiri. 19 Tee niikaang nooruupi damaꞌ domang-antamuriaing-koong tee tankanung-pinaꞌ ivepoꞌ masipoꞌ iꞌmaꞌari otomaung, diiriꞌkoo makotuaꞌ, aiꞌ narunge tee koontoꞌ paning-koo kuunavaro-koo meepoꞌ masipoꞌ tumparara tee maraka-anta teka pinkaꞌuuꞌnung; 20 Tee eeꞌnara Jiisuuꞌ niiꞌkoo uroꞌke beuꞌnung pakumuriiꞌnaang piristiꞌ deto basi deemparara Melkesedek bakanaꞌ siompui ookara batei-koo teeꞌ nariꞌ otooꞌnaang.

<- IIBURU 5 IIBURU 7 ->