1 Diiꞌ Karistooꞌkoo namaiaꞌ deentariri teeꞌ nariꞌ piaareeri otorimaatoai. 2 Nantoong damisimainku diikanairu-koo poroko bauꞌererima teke aasiꞌanta-koo ampaꞌdoriaukaꞌ eeꞌ noruꞌerima niiꞌninge tee teeꞌ nkoarima koosinunanka bauꞌaarikoꞌ noruꞌaavaꞌ. 3 Teing kiimataroma otoroining domang dontong-anta-koo norunoruꞌererimaatoai, diiꞌ teing ninka nariꞌ kiimatanavaꞌkoo otorining-pinaꞌ noruꞌdarima. Eeꞌnoko napoꞌ teing niiꞌninge orakaꞌ nkoaarimaing norunoruꞌererimaatoai, diiꞌ teing ninka narung mono-kooning tasiꞌdariri.

4 Nampeesi tee tampara, orakaꞌ minku-koong deeaꞌ. Teeꞌ nariꞌ tampaꞌ tanatavampiaing totoꞌpampiaꞌ, aiꞌ Kumponinge tee kiimatavuriaing teing bakiaaꞌke otoromaing eeꞌnoko nampeesi orariaakooꞌ.

5 Okoꞌoko-koong aarumo dimpaꞌeri otomatoai eeꞌnoko teing kapooꞌ eeꞌning komperimaing diiꞌkoo makosining-pinaꞌ noruꞌerimatoai, aiꞌ Kumponinge tee aaꞌpuuꞌnung,

7 Teing diikaning urantananka Kumponing bakaang kara diiꞌ nauraarikoꞌning napoꞌ noruꞌereriai. Jiisuuꞌkoo imaꞌariri biikaang domang tampaꞌ botu basiariruꞌnaꞌ norunoruꞌerira teeꞌ nariꞌ teinge masikaꞌantavaakoꞌnaꞌ paaraveri otoriai.

8 Jiisuuꞌ Karistooꞌ bakaang aarumo tee teeꞌ nariꞌ otomatoaing, aaꞌnoko keꞌmaakiꞌ, eꞌmung, eeꞌnoko ookara doong-koo. 9 Teeꞌkoo amutemuriiꞌ dootuuꞌkoong karai masikeng deeainge avitoitoi baranturiaukaꞌ, taamang tovang-kooninge. Diiꞌ Kumponing bakaang piaae diikaang domang puring-anta-koo makosi, teinge taamang-koong botonankai nantoonge minkuaamainge deeaꞌ. Nantoong teing siompaamaing pakuvuriarukooꞌ.

10 Niiꞌ teing paning-koo meepoꞌ otoꞌmemuring Kumponinge piaamuri otoko pakupaku nkavampimanooꞌ eeꞌnoko teing teva dootuuꞌnava kaandesi-koonava tarenukai teka pakupaku nka-koo makosiaavaꞌ. 11 Biikaninge piristiꞌ pankainankai Meepoꞌketa Aaꞌnaꞌ Meepoꞌ ereng poꞌantavaakoꞌ orara aarumo tontaꞌkoo, teka teinge kauꞌ karenaumonanka biikaning mononanka ereng dakoaarima tee-koo osi-koo taapoꞌke tai-antavaarikoꞌ. 12 Eeꞌnoko teeꞌ nariꞌ Jiisuuꞌ osi pankamono-koo taapoꞌka baike kuneꞌuuꞌ nantoong meekaꞌantavuriiꞌnaang baka bakaang erenge. 13 Teeꞌkoo niiꞌ pankavitu-eta urikung aarumo tareaamaing-eta taapoꞌ tee-anko merira tee porepooreꞌ toraꞌpampiaing teie toraꞌpuuꞌnaꞌ. 14 Aiꞌ anke tee osi pankamono teeꞌ nariꞌ dootuuꞌ okoraꞌarioꞌ otoainamono otoꞌmemuriaꞌ tero Jerusalemaꞌ noruꞌampikoꞌnaꞌ, teka niiꞌke besiꞌampimang temono osi pankamono damaꞌ tavoꞌaravainamono. 15 Tee boontunang niikaang karange eꞌmung nkoampimatomaung tee sipampiaukaꞌnung niiꞌke, tee Kumponing-koo tampaꞌ tang-koong bakaang Pakoꞌpariꞌniiꞌke, Karistooꞌke, tampaꞌ nkomuruꞌnung-koo niiꞌ, bakaang miring siraꞌpampima. 16 Teing kapooꞌ diiꞌ otoꞌderurining tankaamperima kapooꞌ tampeng nko-koo siꞌdariaukaꞌ. Tee eeꞌnung temuriiꞌ boontunang Kumponing dotuaramaung.

17 Teing urantananka biikaning kara siomperimatoai eeꞌnoko teing-koo boong otorimaatoai, aiꞌ diiꞌ diikaang domang tee teinge tanatavai otong damaꞌke Ovoringe simpeꞌuriko makuꞌaavainaꞌ noruꞌai. Teing tauraꞌperereriko teinge dotuariri nkoaavaing, orarunsiariaꞌ. Teing orarunsi-antavereriaing deekoꞌ pakupaku-koo nkakiriaukaꞌnung.

18 Kunsi-koo pakumererimaatoaing, aiꞌ niiꞌke tee noruꞌampiri otong domang kuaaꞌmori oꞌnorinaꞌ ookara kapooꞌkoo tampara aarumo narung nko-koo piamori. 19 Ninge baruꞌ aaꞌnaꞌ kontampiri siꞌdamping teeꞌ nariꞌ kunsi-koo pakumerimatooꞌnaang diiꞌanko daꞌdeng meainaꞌ. 20 Teie Kumponinge niikaang Ovoring Jiisuuꞌ booꞌketa daaꞌuuꞌ sipisipiꞌnanka tarenara pankaing deemparaaꞌnaang bakaang erenge kara naroong-anta oꞌpaaꞌ pinkaꞌura mooꞌmuruꞌnung-koo; 21 Teie eeꞌnarai Kumponinge mooa-poꞌnunge ookara kapooꞌnanka tampeng bakaang pia siomperi nkoveriaing-koo aruriaing. Eeꞌnoko tee ninka Jiisuuꞌ Karistooꞌ ninka niiꞌkoo mintoomparama kapooꞌ dotu-antavuaing nkovuuꞌnaang piamomaang meenasie araka ninka doong kante Jiisuuꞌ okovui otomatoainaꞌ. Teeꞌ nariꞌ.

22 Diiꞌ mmaikoriꞌ, ning enang diiꞌkoo eentamaramaang diiꞌke tampaꞌ taaraveriiꞌnaang tee aung nkaang kara diiꞌ daarirerompiring pakururiaing teꞌ basinooꞌ baruꞌ isipoꞌ deeaꞌ. 23 Diiꞌke noruꞌeriaing tee niiꞌmaikoꞌ Timoti tee bakearing kiimata-doma-ita. Ning-anko dueꞌka pora deekoꞌ beeroꞌdarampeeꞌnaang neeꞌke. 24 Tampara tamperiaing teing-koo diikaning urantanuka-koo, eeꞌnoko teing ookara Kumponing bakaning. Teing Itali-nameensiꞌketa porouꞌninge diiꞌkoo tampara tampaamaang. 25 Tee biraanke tee diiꞌ ninka nariꞌ otomatoaing. Eeꞌ, masikung.

<- IIBURU 12