KALESIA 3

Jiisuuꞌ Masikaꞌantavaara Tanuaang Meekung Nkavauꞌnaꞌ Kalesia-nupoonge

1 Diiꞌ Kalesia-nupoong bakei kanukanuꞌnanka! Arekeeꞌkoo diiꞌke kara masikung siperi, aiꞌ pa naninge doomaruringe? Niiꞌke tee diiꞌ naurarampiruꞌnung Jiisuuꞌ Karistooꞌ baruꞌ aaꞌnaꞌ sirakaꞌantararampima koontoꞌ diiꞌke oovering-pinaꞌ tasiꞌantarampiri aaꞌbarataꞌkoo biꞌari diiꞌkoo booꞌparuꞌnaꞌ. 2 Aung ioꞌ kapooꞌ narung diiꞌke naumeriiꞌnaang: Diiꞌke ee tee Tanuaang Meekung Moosesi-nung Boto siomperimaung-koo nkaveruꞌnung? A, Moosesi noruꞌeriaꞌ nkaveruꞌ, tee Jiisuuꞌkoong doorenang tampara taaraverira baitorariruꞌnung-koo. 3 Aaꞌnaꞌ kanuꞌdariri ampaꞌdoruꞌnunge Tanuaang Meekung nkaveruꞌnaꞌ, eeꞌnara nkaverira domang nerakaꞌdariruꞌnung? Tee domang nerakaꞌdariruꞌnaꞌ ee tamung mono bakaang iriꞌke Tanuaang Meekung-eta taapoꞌke dupeveriiꞌnaang noruꞌerimang? 4 Teing kapooꞌ ivekeng tero mantontariruꞌning enang ee tamunsiꞌnanka deemparing? Teeꞌ nkoarapeuꞌ daanaꞌ? 5 Tee eeꞌnara diiꞌ Tanuaang Meekung avusiroꞌari aruruꞌnung eeꞌnoko kapooꞌ taꞌnimpaariiꞌ purintoꞌnanka tavoꞌantarerurikooꞌ. Enang naumeriaing tee ee Moosesi-nung Boto siomperimaung-koo teeꞌ biraankerurikooꞌ aiꞌ doorenang tampara taaraverira baitorariruꞌnung-koo? Diiꞌ aaꞌ baitorariruꞌnung-koo teeꞌ biraankerurimaung.

Kumponing Bakaang Maraka-anta Masikaꞌantavura Biraankearuꞌnaꞌ Eebaraamiꞌ

6 Eebaraamiꞌ teeꞌke, Daari Meekunge aaꞌpumanaꞌkoo:

“Kumponing bakaang maraka-anta masikaꞌantavuioꞌ eeꞌnoko Kumponinge bakaang masikaꞌanta oovura naning koontoꞌnung tampuuꞌ.” (Pupuꞌ 15:6)

7 Teeꞌkoo enang tasiꞌperiaing Eebaraamiꞌ baurukaaꞌ masikeng teing nantoong masikaꞌanta-poꞌnupoong. 8 Teroita daariari otomaung Kumponinge koontoꞌnuka tampuriainaꞌ teing avitevitu Juꞌdeeaing baitoariko. Daari Meekunge naumurimaung Kumponinge Eebaraamiꞌkoo tee tampara doorenang daankivuuꞌnaꞌ aaꞌpuuꞌnooꞌka:

“Ookarai avitevitue daꞌkoo biraanke nkavaavaing.” (Pupuꞌ 12:3)

9 Aung eeꞌ miruꞌari otong: Nantoong Kumponing-nung maraka-anta masikaꞌantavaamaing tee, nariꞌ biraanke nkavaamaung Eebaraamiꞌ ninka, masikaꞌanta-poꞌnung ninka.

Teing Moosesi Bakaang Boto-koo Eꞌmanaamaing Domaang Paaꞌariainaꞌ

10 Teka baata teing Moosesi-nung Boto siong-koo mantomparimaing teing bakaang barakosiꞌkoo kuung otorong, aiꞌ Daari Meekunge eeꞌ minkuvumaung:

“Baa tee naning Moosesi-nung boto siompui teeꞌ nariꞌ keperuuꞌaravaukaꞌnung ookara batei-koo daariari otoinaꞌ pukevui tee barakosiꞌniiꞌ.” (Boto 27:26)

11 Eeꞌnoko napoꞌ eeꞌ siraꞌpari otong tee naning Kumponing ninka naroomparavarupeuꞌ Moosesi-nung boto siompumaung-koo Daari Meekunge napoꞌ aaꞌpuuꞌnaꞌkoo:

“Naning tee Kumponing baitovuko koontoꞌ tampuainung domamparavaing.” (Abakaka 2:4)

12 Teeꞌkoo Moosesi-nung boto sionavung makotuaꞌnavung deempari otong baito-aapenavung deearuko eeꞌ minkuaramanaꞌkoo:

“Naninge tee boto siompui nkovuaing tee teing nko-nkonanka nkovuaining-koo domamparavaing.” (Boontu 18:5)

13 Teka Karistooꞌke mooꞌmuruꞌ niiꞌ tee boto-koong barakosiꞌketa bakaang monoi barakosiꞌ kuneꞌura niiꞌ pariꞌantamurima, teeꞌ Daari Meekunge minkuvumanaꞌ aaꞌpuma,

“Ookara barakosiꞌpoꞌnupoong koiꞌkoo biꞌaariaining.” (Boto 21:23)

14 Jiisuuꞌ Karistooꞌke teeꞌ toraꞌpuuꞌ tee Kumponing-nung biraanke Eebaraamiꞌkoo minkuvuuꞌnung Juꞌdeeaing-koo pooꞌnaang, tee-koo baitomarimaung-koo niiꞌke Tanuaang Meekung nkavampiaing, tee bautaꞌ maraka-antamuruꞌnung.

Moosesi-nung Botoi Totoꞌpuarupeuꞌ Tee Teroitaing Maraka-anta

15 Mmaikoriꞌ ee, enang kara miruꞌpoꞌnung naurampiiꞌnaang niiꞌ doong kante nkomarimanaꞌkoong. Noruꞌeriaing, kapooꞌ kara naninka kenaankai naroompurepeuꞌnung, eeꞌnoko marakavareko narunge totoꞌpuarupeuꞌ aiꞌ beꞌnuꞌuarupeuꞌ bane naninka kansiꞌkoonaanka marakavareko, eeꞌnoko Kumponing bakaang maraka-anta totoꞌkoo makosi deeaꞌ bakei. 16 Enang tee Daari Meekung-koo otoinaꞌ tee Kumponinge Eebaraamiꞌ maraka-antavuretuꞌ baꞌdompeng ninka nariꞌ, baꞌdompeng isiꞌisimpuaing. Daari Meekunge eeꞌ minkuvuaꞌ, “dakaning isiꞌisinanka ninka nariꞌ,” mmauꞌkoo tampuma, teka narung minkuvuma eeꞌ minkuvuuꞌ, “dakaang isiꞌising ninka nariꞌ.” (Pupuꞌ 12:7)

Eeꞌnoko tee isiꞌising tee Karistooꞌ eeꞌnara miruꞌari otong.

17 Tee aung kapooꞌ ninge miruꞌansinung: Teie botoi totoꞌpuarupeuꞌ damaꞌke tavoꞌkuuꞌnunge mareꞌ narung daakuꞌketa beenaumo kivora divuꞌkuioꞌ. Tee Kumponinge kara naroong-antavui tero pinkaꞌuuꞌnung eeꞌnoko Moosesi-nung Botoi tee maraka-anta daang deeng-anta-koo makotuaꞌ. 18 Niiꞌke tevung boto sionavung siompampikotaaꞌ Kumponing ninka naroomaripeuꞌnung dei tee eeꞌ siraꞌparapeuꞌnung: tevung niiꞌnaꞌ oroꞌnavung Kumponinge naroong-anta nka-koo, Eebaraamiꞌke siompuuꞌnavung-pinaꞌ deeaꞌ, aiꞌ teie tee tamung Kumponing bakaang maraka-anta masikaꞌantavuko Kumponinge bautaꞌui tee ninka nariꞌ narooniiꞌ tampuuꞌ.

19 Enang aming-koo Moosesi-nung boto otong? Tee aaꞌ tee orakaꞌnko otoko avuruꞌnung boto aarempaara orakaꞌ nkoaamanaꞌ tasiꞌpariiꞌnaang. Kumponinge teeꞌ nariꞌ otoꞌkoo miruꞌuuꞌ bera tee isiꞌising, Karistooꞌ, tavoꞌkuainooꞌke basi, eeꞌnara tero maraka-antavuuꞌ nung. Tee boto tee koosinunankai poꞌantavauꞌnung Moosesi nauaama kara-pareꞌ Kumponing eeꞌnoko teing nantoong-koo meuꞌke. 20 Teka tenang maraka-anta Kumponinge Eebaraamiꞌ avuuꞌnang Kumponinge naning otoaruko kara-pareꞌ Eebaraamiꞌ koontoꞌ nauvuuꞌ. Teeꞌkoo napoꞌ tee maraka-anta deu basi Moosesi-nung boto-koo, aiꞌ boto tee tamung nantoong-koo otong.

Boto Tee Nantoong Jiisuuꞌkoo Poꞌanta Tee-koo Kuung Otorooꞌnaang

21 Enang ee Moosesi-nung botoi Kumponing bakaang maraka-anta totoꞌpui otong? A, teeꞌ aaꞌ deeaꞌ bakei. Boto tee kapooꞌ nantoong domampuripeuꞌnung-pinaꞌ oroꞌ otoi dei tee koomariri oꞌnoripeuꞌ tee boto siompampima. 22 Teka Daari Meekunge tasiꞌantamuruꞌ niiꞌ ookara orara aarumo-koo kuunge daiꞌmariri paapaaꞌmarimaing, boto sionavung-eta bereꞌmarira Karistooꞌkoo baitomariainaꞌ Kumponing ninka naroomariiꞌnaang. Teeꞌ nkomariko deekoꞌ Kumponinge dupe-antavuaing tee bakaang maraka-anta koontoꞌnuka tampuriaing-koong teing masikaꞌantavaamaing.

23 Tenang masikaꞌantanavung oroꞌparavaruko niiꞌ botoi naroꞌka parammuri oꞌnorikoꞌ daiꞌmuritaaꞌnange bera masikaꞌantanavung oroꞌparavainooꞌke basi. 24 Tee boto tee niikaang nau-anta-pinaꞌ otokoꞌ Karistooꞌanko poꞌantamuriiꞌnaang masikaꞌantanavunge Kumponing ninka naroomariiꞌnaang. 25 Teka enang tee masikaꞌantanavung oroꞌparioꞌ niiꞌ tee enang botoi tanatamuriaꞌ. 26 Enang tee Jiisuuꞌ Karistooꞌkoo kuunge diiꞌ ookara Kumponing baurukaaꞌ deentaririning teie diikaang masikaꞌantai. 27 Diiꞌ ookara ntong-koo minkie meekaꞌanta nkaverima Karistooꞌ bakaang tare-koo kuung poruꞌning teing Karistooꞌnaunturi otoriaining, siivenkeꞌdeeriaꞌ. 28 Aiꞌ tee Karistooꞌkoo siivenkeꞌ otoaꞌ eeꞌpinaꞌ: Juꞌnung eeꞌnoko Juꞌdeeaung, botovotonaaꞌ nuka eeꞌnoko osikaiaang, niiꞌnooꞌ donkaani napoꞌ manikuma. Diiꞌ teing navitu tee-koo kuung otori. 29 Eeꞌnoko enang Karistooꞌkoo kuung poring-koo diiꞌ teeꞌ nariꞌ okoruriaing tee barenku Eebaraamiꞌketaing isiꞌising-koong Kumponinge maraka-antavuuꞌnung.

<- KALESIA 2 KALESIA 4 ->