3
Piita naankai Jooni Naning Kauꞌ Doota Pakuvuretuꞌnaꞌ
1 Niiꞌnaꞌmung kamunooꞌ Piita eeꞌnoko Jooni pava dootuuꞌnava pankava-koo beretuꞌ kunsi-koong bateinang-koo, duaaꞌ aveꞌarako. 2 Eeꞌnoko naning kauꞌ doota pontoꞌaruꞌnooꞌketa teꞌ otokoꞌ. Tee eeꞌnung doong kante nkavai poroma sipaakoꞌnung karanaang pava dootuuꞌnava pankava-koo, miring Tampaꞌ Oroꞌnavarong tampaakoꞌnavarong-koo, baka-eentavaramaatooꞌnaang dootuuꞌnava pankava-koo koinaakoꞌning-koo. 3 Eeꞌnunge Piita naanka Jooni dootuuꞌnava pankava-koo bereko oovureta eentavuretuꞌ kapooꞌ avureeꞌnaang. 4 Eeꞌnoko Piita naankai Jooni naapu narung oovuresi Piitai aaꞌpuuꞌ, “Neeꞌ oomereai.” 5 Eeꞌnoko tee tenaanka-koo baroromparuꞌ eeꞌ noruꞌuma: Kapooꞌ amureeꞌnaang anaankai. 6 Teka Piitai aaꞌpuuꞌ, “Aung ee, ning mooniꞌ otoꞌmemuaꞌ, teka kapooꞌ ning otoꞌmemuing aromaꞌnaang. Jiisuuꞌ Karistooꞌ bakaang miring-koo tee Nasaretiꞌnung daꞌ daaꞌdarara naniai!” 7 Eeꞌnoko teie tampanaang-koo bireng-koo kompura deto iꞌampuko namuꞌke bakaang kauꞌ eeꞌnoko koposiina purimparuꞌ. 8 Bera tee deto dinkitooꞌarara donkonui nanuuꞌ eeꞌnoko tumparuꞌ dootuuꞌnava pankava-koo tenaanka ninka nariꞌ, nanuma eeꞌnoko dinkitooꞌarama Kumponing daangampuma. 9 Kumponing daangampuma nanuko ookara nantoonge ooaara tee tasiꞌpauꞌ tee eeꞌnara baka-eentavaramaung Tampaꞌ Oroꞌnavarong-koo baꞌnanui dootuuꞌnava pankava-koo. 10 Eeꞌnoko tee teing aaꞌnaꞌ taꞌnimpariruꞌ asikovoroma tee-koo kapooꞌkoo tee-koo nkoaruꞌnung-koo.
Piita Dootuuꞌnava Pankava-koo Daankiaruꞌnaꞌ
11 Tenang tee kauꞌ doota taarevora Piita naanka-koo Jooni biꞌantavari beioꞌ ookara nantoong teing-anko nariꞌ aivitu-navaro-koo˜ miring Solomoniꞌ bakanavaro-koo kuaꞌparira dooroi tavuruꞌ. 12 Eeꞌnoko tenang Piitai oovurira teing tee teka daankivuruꞌ aaꞌpuma,
“Diiꞌ nantoong Isireeli-nupoong, aming-koo taꞌninirimang aung-koo, eeꞌnoko neeꞌ aming-koo tuutuuꞌanta narung oomererimaang? Aiꞌ eeꞌ noruꞌerima aung neekaang purintoꞌke eeꞌnoko aarumo meekaꞌpari otoꞌke kauꞌ taare-antavampesing?
13 Teie Kumponinge niikakatauro Eebaraamiꞌ dovang, Aisakeꞌ, eeꞌnoko Jeekopiꞌ biikaange tee Jiisuuꞌ bakaang muuꞌ tarenung meenasi avuioꞌ aung tamparuꞌantavuing. Tee eeꞌnung Jiisuuꞌ diiꞌke Pailatiꞌanko beꞌantaveruꞌ, eeꞌnoko Pailatiꞌke unaa-anta-koo tampuioꞌ piaroriaruuꞌ.
14 Tee Jiisuuꞌ naning meekung eeꞌnoko koontoꞌ tee tompimperira naning tavuꞌnko piaroruꞌ Pailatiꞌke sing-antareruriiꞌnaang.
15 Eeꞌnoko diiꞌke tee Domaang Okonara dupisiꞌeruꞌ, teka tee eeꞌnung Kumponinge domang-antavuuꞌ booꞌketa. Neeꞌnaanka tee-koong kara siraꞌka.
16 Eeꞌnoko teie bakaang miring purintoꞌke masikaꞌantavampirioꞌ aung naning puring-antavuing ooverima tasiꞌperimatomaung. Eeꞌnoko teie eeꞌnunge masikaꞌantai Jiisuuꞌketainge aung naning ookutuarioꞌ taare-antavuing diiꞌkoo ookara-koo dutakanooꞌka.
17 “Emuꞌ tee diiꞌ mmarang, ninge noruꞌdampiring diiꞌke tee noruꞌeriaꞌ teeꞌ nkoveruꞌnung teing ninka diikaning ovontunanka ninka. 18 Teka tee kapooꞌ Kumponinge tero siraꞌpuuꞌnung bakaning nakaro-nupoong biikaang karange, tee eeꞌnung domamuriainooꞌkoo Pakoꞌpariꞌniiꞌke baike kuneꞌuaing teeꞌ nariꞌ dupe-antavuieeng. 19 Eeꞌnoko enang tee Kumponing-koo bereꞌdariaing diiꞌ teing diikaang orakaꞌ nkonanka piuꞌderuriainaꞌ eeꞌnoko napoꞌ unaa-anta Ovoring-eta komperiai batei makotuko. 20 Teeꞌ nariꞌ bereꞌdariri otoriko botovuaing tee naning Pakoꞌpariꞌniiꞌ diiꞌ domang-anta-koo miruꞌuuꞌnung, tee eeꞌnung Jiisuuꞌ. 21 Enang tee paning-koo otomatooꞌnaang bera tee batei Kumponinge ookara kapooꞌ nerakaꞌantavuainooꞌke basi teeꞌ maraka-antavuuꞌnaꞌ bakaning meekupoong nakaronuka biikaang karange uripoꞌketa. 22 Aaꞌnung Moosesie tee minkuarama niikakatauro aaꞌpuruꞌ,
‘Ovoring Kumponinge tee narung nakaronara donkong-antareruriaing diiꞌkoo damaꞌnavarang-koo meuꞌke, teeꞌ nariꞌ ning donkong-antamuuꞌnaꞌ, eeꞌnoko diiꞌke bakei taaraverimaatoaing teing kapooꞌ naururiaining.
23 Eeꞌnoko teing nantoong ookara narunaꞌ narunaꞌ tee eeꞌnung nakaronara taaravaavaukaꞌning bakaning nantoong-eta simpeꞌuriaing.’
(Boto 18:15,18,19)24 “Eeꞌnoko Moosesi narung deeaꞌ, napoꞌ ookara nakaro-nupoonge Samuelaꞌketa doompeto Kumponinge karantavurikoꞌninge˜ kara eꞌmunung doong-koong siraꞌpauꞌ. 25 Ooveriko, Ovoring bakaang maramaraka tee diiꞌ diikaang, aaꞌning teing bakaning nakaro-nupoong biurukaaꞌ, eeꞌnoko teing okoꞌbosiꞌnuka diikakatauro biiꞌdompenku. Eeꞌnoko tee kara maramaraka Kumponinge Eebaraamiꞌkoo naroompuuꞌnaare Jiisuuꞌ miruꞌuitaaꞌ eeꞌ minkuvuuꞌ,
‘Daꞌdompenge ookara kansiꞌnupoong amutemuriiꞌ nantoong biraankevuriaing.’ (Pupuꞌ 22:18; 26:4)
26 Kumponinge Jiisuuꞌ, bakaang muuꞌ tarenung, tutung diiꞌkoo botovuuꞌ diiꞌ ookara narunaꞌ narunaꞌ diikaang orakaꞌ nkonanka-ita bereꞌantarurira biraanke-antaruriiꞌnaang.”
<- KARA OKOVURI NKANUKA 2KARA OKOVURI NKANUKA 4 ->
