1 Teketa tee niiꞌ Itali-aape aarerie beꞌkoo tamaaruꞌ Paulaꞌ eeꞌnoko niiꞌning kiimata-nupoong nariꞌ. Eeꞌnoko tee naning miring Julias teing tanata-koo botoauꞌ, tee Siisaꞌ bakaning mauꞌmoniꞌnavitu-koo narung daakuꞌ piatooronuka tarenara. 2 Eeꞌnoko danto aareri-koo Aꞌdamitiang biikanareng-koo koinampira tenkenampiruꞌ, Eesia-nameensiꞌ kantevui siompuai-nareng-koo. Aristakas niiꞌ ninka nariꞌ meruꞌ, Tesalonaikaꞌnara, Masedoniaꞌnameensiꞌkoong. 3 Teketa daunaꞌmung Saidoniꞌnavuntuꞌ daanto duumemariruꞌ, eeꞌnoko Juliasie Paulaꞌ tampaꞌ nkovuma baꞌmaikoriꞌ beeroꞌkoo tauraꞌpuuꞌ teinge pakuaavaꞌnaang. 4 Eeꞌnoko teketa danto tenkenampima Saiparasi-namuiꞌkoo neeꞌmariri meruꞌ booꞌai tamuriko. 5 Eeꞌnoko tenang pirung pakoꞌampiri merima Silisia eeꞌnoko Pampiliaꞌ aaꞌnamensiꞌkai kato tankinampira Maira-navuntuꞌkoo tavoꞌmariruꞌ Lisia-nameensiꞌkoonooꞌ.

6 Teka teie piatooronuka daakuꞌ tarenarai narung aareri oovuuꞌ Aleksandariaꞌ biikanareng Itali-aape beko, eeꞌnoko tereng-koo kooꞌmuruꞌ. 7 Teketa makenge terenge nanampiko mmauꞌ doong divuꞌkuioꞌ karimarikotaaꞌ Naidas-navuntuꞌ dueꞌmariruꞌ. Eeꞌnoko pionge doonko Eesia siong-koo koontoꞌ bonoꞌmurioꞌ eeꞌ deto Kiritiꞌnamuiꞌkoo pakoꞌmarira neeꞌmariri meruꞌ Saamoni-koo siuru˜ koroampiri. 8 Aaꞌnaꞌ poreꞌmori Kiritiꞌnamuiꞌkoo miirimariri merikotaaꞌ niiꞌnooꞌ miring Tampooꞌ Kunkumenooꞌ tampaamanooꞌ basimariruꞌ, Laseaꞌketa osi pankamono-ita dueꞌ.

9 Teeꞌ poreꞌmorima mmauꞌ batei tamung tanking-antavampiruꞌ aaꞌnoko Juꞌnupoong unkumoarimanang eeꞌnoko pirunge nanuꞌkoo tampanang. Eeꞌnoko nanuꞌ arikaꞌparioꞌ pirung oraruꞌkumanang meuꞌpampira Paulaꞌke nauvurima aaꞌpuruꞌ, 10 “Ee aing, ninge eeꞌpinaꞌ ooamaang: Nariꞌ nanampiaing deekoꞌ tee baike kuneꞌampiiꞌnaang, eeꞌnoko kapooꞌ baruꞌ paaꞌaraaꞌnaang otoining aing aaꞌning: kavo narung deeaꞌ teka areng aareri-nareng eeꞌnoko niikaang domaang nariꞌ.” 11 Teka teie piatooronuka narung daakuꞌ tarenarai tee tereng okovenung eeꞌnoko tee nanuꞌanta-nko beekaang kara aaꞌnaꞌ barorompukoꞌ, Paulaꞌ baruꞌ deeaꞌ. 12 Eeꞌnoko teketa teꞌ kunkumenooꞌ bakuꞌkoo makotuaruioꞌ piong kamaari ninkaing batei-koo, teing-koo mmauꞌ nantoong teketa tenkeng-koo piavorouꞌ eeꞌ noruꞌaama, Piiniks-navuntuꞌkoo pa tampaꞌ tavoꞌkampipeuꞌ. Teꞌ eeꞌnooꞌ napoꞌ Kiritiꞌkoonooꞌ kunkumenooꞌ bakuꞌkoo tampooꞌ kamaari bakanang.

13 Eeꞌnoko tenang tee piong eeꞌdepeto tampaꞌ poko aaꞌpauꞌ, “Enang Piiniks tampaꞌ tavoꞌmariiꞌnaang.” Eeꞌnoko teinge aankaꞌ doompeto barampaaraiꞌnange Kiritiꞌ miiringe danto meruꞌ piisiꞌ dueꞌke. 14 Teketa tee piong bariꞌuuꞌ eeꞌdoompeto piong ivekung pomanaꞌ, poraꞌka daue doompeto pora tamuruꞌ. 15 Eeꞌnoko tenang tee aareri teeꞌ kompuioꞌ piong-aapei beꞌkoo makotuaruioꞌ tamung danto bereꞌampirioꞌ biiꞌmuruꞌ. 16 Eeꞌnoko okiꞌnamuiꞌkoo muiꞌnamuiꞌ miring Kaudaꞌnamuiꞌkoo neeꞌmariri meruꞌ, eeꞌnoko teke karimarima tee bakaasi deto kakau barampampiraiꞌnange kuunga aareri-koo pinkaꞌampiri daiꞌampiruꞌ. 17 Teketa tereng aareri-nareng nanampi-koꞌnareng koomponge pankenge boonavete puring-antavampima daiꞌampiruꞌ. Eeꞌnoko Aperikaꞌkoo dueꞌ daunaaꞌnooꞌ pionge koing-antamuriꞌneeng-koo avoreaama teneꞌ pionteeꞌnaneꞌ miiruni-koonaneꞌ depeto siauꞌ. Teketa moꞌming-koo biꞌaara doonko pirung-koo duaꞌantavaioꞌ teneꞌke tee aareri teka dateꞌdate-antavuuꞌ. Eeꞌnoko teeꞌ nariꞌ oꞌnoriko tamung biiꞌmurikoꞌ. 18 Eeꞌnoko daunaꞌmung pionge avitoitoi baiꞌmuriko teinge tee pionteeꞌkoong botunarong oko duaꞌkoo depeto sing-antavauꞌ. 19 Bera piong beenamparuꞌnaꞌmung niiꞌke ookarai birenge kompampiri doonko kosiꞌampiruꞌ ookara kapooꞌnanka terong botunarong-koo biꞌari otokoꞌning ninka nariꞌ. 20 Eeꞌnoko mmauꞌ doong-koo duaaꞌ dovang beentoꞌ okiꞌnooꞌ oroꞌpariarukoꞌ, eeꞌnoko aung piong aaꞌnaꞌ pankaing masikung oroꞌparako domamariaukaꞌnung-pinaꞌ noruꞌmariruꞌnung.

21 Eeꞌnoko teing tee taamang nai-koo mmauꞌ doonge datavaavaruioꞌ Paulaꞌke uroꞌkanooꞌ pora teing-koo aaꞌpuuꞌ, “Ee aing, teeꞌ naurampiruꞌnaꞌ taaramerira Kiritiꞌketa moriaruuꞌnung dei tampaꞌ, aung baike kuneꞌampiarupeuꞌ eeꞌnoko aing kapooꞌnanka keraꞌpampiarupeuꞌ. 22 Enang tee naurampimang ninge, domang kuaaꞌdoriaing aaꞌnoainaꞌ: diiꞌkoo narung minkiaravaukaꞌ, teka aung aareri narung nakaꞌaravai. 23 Aiꞌ eꞌmung tee muunga ning-anko tee koosinung˜ Kumponing-nung donkonuing tee ning mooꞌmuioꞌ mintoompevomaung bakaang. 24 Eeꞌnoko teie aaꞌmui, ‘Aroreaukaꞌ, Paulaꞌ. Daꞌ tee bakei Roomaꞌ tampaꞌ basirarara Siisaꞌkoo uroꞌkanooꞌ donkoniaing. Eeꞌnoko ooveko aing teing daꞌ ninka nariꞌ nanirimaatomaing Kumponinge daꞌ ninka nariꞌ domampariiꞌnaang tampuruꞌning.’ 25 Teeꞌkoo domang kuaaꞌdoriaing, ee aing, aiꞌ ninge tee Kumponing masikaꞌantavansi otong teeꞌ nariꞌ naumuinaꞌ masikaꞌ nkoaraaꞌnaang. 26 Teka niiꞌ teing niiꞌnamuiꞌkoo piisiꞌkoo koing-antamuriaining.”

27 Teketa piong kivora-ita karenamparuꞌnaꞌmung tavoꞌkuko teeꞌ tamung danto pirung Eeriria-aape-naruꞌkoo biiꞌantamuriko meuꞌnamang aareri-koo-nupoonge eeꞌ noruꞌauꞌ: Niiꞌ pa kansiꞌkoo dueꞌmarimang. 28 Teketa paaranampaama eeꞌ doonko daangaꞌnooꞌ kenaanka kivora daangaꞌ paaravauꞌ. Teketa napoꞌ dantoꞌdaanto paarananpaama kivora-ita paꞌnokoꞌ daangaꞌ paaravauꞌ. 29 Eeꞌnoko avoreaara kapang-koo koinampiꞌneeng-koo karenaumo aankaꞌ sing-ntavauꞌ taaꞌo˜namarang-eta doonko. Eeꞌnoko daꞌdeng taneꞌpuuꞌnaang piavoroi nempaakoꞌ. 30 Eeꞌnoko teketa aareri-koo-nupoong mmariaavaꞌnaang kariarima tee bakaasi doonko sing-antavaakoꞌ pirung-koo, daang aankaꞌ sing-antavaama kooꞌbe˜ita doonko. 31 Teketa Paulaꞌke tee daakuꞌ tarenara eeꞌnoko teing piatooronuka aaꞌpuruꞌ, “Aing aareri-koo kuung otoroaruko deekoꞌ diiꞌ teing domantariarooꞌnaang.” 32 Teketa teinge piatooronukai tee bakaasi-koong moꞌming napuꞌaara danto sipauꞌ.

33 Teketa taneꞌpuma nanuko Paulaꞌke teing taamanaavaꞌnaang aaꞌnaꞌ botovurima aaꞌpuuꞌ, “Eꞌmung teꞌmung kivora-ita ˜karenang doong taa-naꞌmung teing-koo doong diiꞌ taamang nai dataveriaꞌ eeꞌnoko avoroꞌ narung-koo otorikooꞌ. 34 Teeꞌkoo ninge taamaniriiꞌnaang botorampimang diiꞌ puring-antaruriainaꞌ. Taaraveriai, diiꞌkoo boreꞌketa dapo-koo naviꞌ paaꞌaravarooꞌnaang.”

35 Eeꞌnoko teeꞌ minkuvura teie bereteꞌ nkavura tampaꞌ tampura Kumponing-koo, teing-koo dutakanooꞌke teke pisiꞌura nai tutumpuuꞌ. 36 Tenang teing ookara teeꞌ nkovura domang kuaaꞌantavurioꞌ niiꞌning taamang-koo naiauꞌ. 37 Niiꞌ ookara nantoong aareri-koo oꞌnorikoꞌning naroꞌka kenaanka daakuꞌketa naruaape-ita kenaiꞌka bera ˜narung-taa [276]. 38 Eeꞌnoko aaꞌnouꞌ uiteꞌ nai-koo makosining naiampira poomuruꞌ, eeꞌnoko naiampima sipampiruꞌning ookara bakurapoꞌ duaꞌaaruꞌ pirung-koo aareri kuaaꞌooꞌnaang.

39 Enang tee taneꞌpuioꞌ teinge tevoraꞌ kansiꞌ tasiꞌpaavaꞌ, teka teinge niiꞌnooꞌ ooaakoꞌ kunkumenooꞌ piisiꞌpoꞌnooꞌ eeꞌnoko teꞌ eeꞌnooꞌ piisiꞌkoo tee aareri koing-anta-koo maroaakoꞌ makosi deekoꞌ. 40 Eeꞌnoko teinge teing aankaꞌnanka-koong moꞌming pirung-koo duaꞌaara aankaꞌnanka teka nariꞌ sipaaruꞌ. Teeꞌ nkoaama tenang eeꞌnang teing bentang aareri koong-antaning dapaꞌaareta biꞌaresi otorekoꞌnooꞌketa doonko sing-antavaaretuꞌ beekanooꞌ pirung-koo. Teketa teneꞌ pionteeꞌnaneꞌ uroꞌkanooꞌnaneꞌ deto siampauꞌ, teketa piisiꞌaape daanto beꞌantavauꞌ. 41 Teketaꞌ daunaaꞌnooꞌ paakuꞌantavaara piisiꞌkoo koing-antavauꞌ. Teketa kooꞌbenooꞌ piisiꞌkoo keemparara kaꞌnunuaruuꞌ eeꞌnoko taaꞌo-namarang booꞌai teka nakaꞌuuꞌ. 42 Teketa teinge piatooronukai teing kiimata-nupoong tavuꞌkoo maroaarikoꞌ naampearira kooꞌariꞌneeng-koo. 43 Teka teie piatooronuka daakuꞌ tarenarai tee Paulaꞌ domang-anta-koo piavora orokovuruꞌ teeꞌ maroaakoꞌnaꞌ nko-koo. Eeꞌnoko teie naampe-koo makosinuka botovuruꞌ tutung doonko kooꞌarira naampeariiꞌnaang piisiꞌaape. 44 Eeꞌnoko asiꞌninge bentananka eeꞌnoko aareri puteꞌaruꞌnairu kompai naampe-koo botovuruꞌ. Aung tee teeꞌ eeꞌnaꞌ domamariruꞌnaꞌ kansiꞌaape morira.

<- KARA OKOVURI NKANUKA 26KARA OKOVURI NKANUKA 28 ->