1 Kumponinge oomuresioꞌ eeꞌnoko Jiisuuꞌ Karistooꞌke, teie ookara nantoong simpeꞌuriainge, domantooꞌnuka eeꞌnoko boorouꞌning, ninge eeꞌ botoramaang daꞌ, noruꞌampiritaaꞌ Karistooꞌ tee napoꞌ ovorimpari oroꞌparavaing: 2 Iriꞌantavei siraꞌpeaing tee kara ootukunung batei-koo, oranang eeꞌnoko tampanang. Arooꞌantaveriai, tautaueriai eeꞌnoko tampaꞌ mantomperitaaꞌ nau-antaveriai. 3 Teeꞌ nariꞌ bointui uaaroaukaꞌ eeꞌ noruꞌei: Bateinang tee dueꞌumaang nantoong kontekontevoroainooꞌ kara masikung taara-koo. Niiꞌnamuriiꞌ kara taara-koo tariiꞌoroma mmauꞌ kara-naunuka bokuaariiꞌnaang teing ninka nariꞌ karaaꞌeemaing. 4 Teeꞌkoo kara masikung-eta akovetei bereꞌariiꞌnaang eeꞌnoko pooariiꞌnaang kumponaananka-koo biꞌariri. 5 Nka tee daꞌ pinkaꞌdari otoaing, baike noruꞌeaukaꞌ, kara nkavei nanuꞌkoo purintaravai, tampaꞌ dupeveai dakaang nko-nko pakupaku-koong, ninge nkaang dupeansinaꞌ.

6 Aiꞌ ninge dupeamira tee makosi tamaavaing dueꞌka, nka tee Ovoring-koo pareka-pinaꞌ noruꞌmari otong. Tee doong ning tenkenampainaꞌmung dueꞌumaang. 7 Ning piikonung deekoꞌ orara aarumo ninka tameerema puruꞌmuaruꞌ. Deikooꞌkoo kuaꞌmaruꞌnung-pinaꞌ iriꞌmoi tampaꞌ botu basimaring, kara masikung masikaꞌantavampimaung pinkaꞌansi. 8 Enang-eta deto nkaang mooꞌ nerang-koong tee maamuari otomatoaing, eeꞌnoko tee taaꞌniꞌanta Kumponinge koontoꞌnuka tammurimaing-koong. Tee eeꞌnara tee teie Ovoringe koontoꞌke bireꞌurimaunge kong-antamuainung teꞌmung eeꞌnaꞌmung makosinaꞌmung, eeꞌnoko ning narung deeaꞌ, teka napoꞌ tee avuriaing teing ookara karaaꞌai ooaavaꞌnaang nempaamaing.

9 Paaraveaing ning-anko poꞌkoo daꞌdeng. 10 Aming-koo, nnaꞌ Deemasie tee aung kapooꞌnanka kansiꞌkoong aaꞌnaꞌ karaaꞌura siꞌmuieeng; siꞌmuraiꞌnang Tesalonaikaꞌ beieenung. Napoꞌ Keresen Kalesia-nameensiꞌaape beiee; Taitas napoꞌ Damesia-nameensiꞌaape beiee; 11 Tikikas Epeses-aape botoansinung; Luukeꞌ narung niꞌninka oꞌnoreng; 12 Teeꞌkoo Maakaꞌ bokuera daꞌninka poreai; tee eeꞌnara nkaang pakupaku tampara. 13 Mononopaꞌ nkavei poai nkaang, Kaapas-anko sipantuꞌ Toroasi-navuntuꞌka, eeꞌnoko buukunanka, nka baruꞌnooꞌ teing ivekeng boromakaꞌkoong dopaꞌkooning. 14 Aleksandaꞌke, teie koopaꞌ taꞌnampumaunge, orari-antamuuꞌ. Ovoringe makuꞌevuaing tee bakaang nko-nko orara-koong. 15 Nka tee-koo daꞌ tareraravaing, aiꞌ teie aaꞌnaꞌ tooꞌdevumang niikaang minkunaa kara simpeꞌnupoong˜ anko. 16 Tero tuumpimaako tutunaꞌnang kara dimpaꞌanko naninge pakumuaꞌ ning. Ookarai siꞌmauꞌ. Orakaꞌ nkomauꞌnaꞌkoo Kumponinge piaavuri tontaꞌevuriaing ninge tontaꞌevoronsinaꞌ. 17 Nka bane siꞌmaioꞌ Ovoring tee ning-koo dueꞌ otouꞌ, eeꞌnoko puring-antamuuꞌ tampaꞌ siraꞌpamaꞌnaang tee kara ookara, ootukununge avotevoraꞌnupoonge taaravaavaꞌnaang. Teeꞌkoo domamuuꞌ tee-pinaꞌ laioni-koo karang-eta pasiꞌmupeuꞌnung-pinaꞌ. 18 Ovoringe tee ning mooꞌmuaing teieta ootukunung orarananka-ita, ning tampaꞌ domang-antamuainaꞌ paning-koo oꞌnooꞌnaang teie tarevumanooꞌ. Bakaang meenasi teeꞌ nariꞌ otoaing ootukunung doong-koo. Ee, teeꞌ nariꞌ.

19 Tampaꞌ tamperiaing Pirisikaꞌdaring-koo eeꞌnoko Akuila baꞌung, eeꞌnoko Onesiporas bakanava-kooning. 20 Irasitas Koorin-navuntuꞌ otoko sipantuꞌ. Eeꞌnoko Toropimas siipavoko Mailitas-navuntuꞌka sipantuꞌ. 21 Paaraveaing ning-anko poꞌkoo daꞌdeng narung, doving orara bakaang batei tavoꞌkuma avoꞌduꞌneeng. Iubiulas dovange Piudenis, Lainas eeꞌnoko Kolodia eeꞌnoko ookara niiraꞌmainkaange tampara tampaing daꞌkoo.

22 Tee Ovoring Jiisuuꞌ Karistooꞌ dakaang tanuaang ninka otoremaatoaing. Tee biraanke tee daꞌkoo otomatoaing.

Masikung.

<- 2 TIMOTI 3