Paulaꞌke Avuavuꞌ Neri-koo Tante-antavuruꞌnaꞌ Judiaꞌnupoong Paku-koong
8
(8:1–9:15)
Mooniꞌ Oosiaavainaꞌ Nauvuruꞌnaꞌ Paulaꞌke
1 Enang tee mmaikoriꞌ, niiꞌke pia-antararampimaang teeꞌ avusiroꞌari otoꞌnaꞌ Kumponinge piaavurima teing Masedoniaꞌnameensiꞌkoo osi kante-koo dootuuꞌnupoong avuruꞌnung noruꞌeriiꞌnaang.
2 Bane aaꞌnaꞌ arikanankai paaravuriko eeꞌnoko aaꞌnaꞌ ataꞌkai, teka doturotue maantoꞌuri avusiroꞌariri avuavuꞌ nkoaakoꞌ.
3 Koontoꞌ ooamira ninge siraꞌpamaang makosiauꞌnaꞌ biikaang avuavuꞌ nkoauꞌnung-koo, eeꞌnoko bonoꞌ divuꞌauꞌ avuꞌkoo makosi-pinaꞌ oroꞌnooꞌ.
4 Maroita biiꞌka aaꞌnaꞌ tanaꞌmaakoꞌ niiꞌke tauraꞌparampiko niiꞌning ninka nariꞌ pakuei nantoong Kumponing bakaning meekupoong teka Judiaꞌka pakuaariiꞌnaang.
5 Niiꞌke eeꞌ noruꞌampikoꞌ, “Aiꞌ pang tang niiꞌning mooniꞌ sipaavaꞌnaang,” teka teing biiꞌka tutung avariruꞌ Ovoring-koo eeꞌnoko napoꞌ niiꞌkoo Kumponing bakaang pia-koo kuunge.
6 Teeꞌkoo Taitas tanaꞌampiko arooꞌarioꞌ botoampiruꞌ teie koompaaraꞌduriiꞌnaang temuriiꞌ pakupaku piaa-koong dupeveriiꞌnaang, aiꞌ diiꞌ teing eeꞌnarai tutung-antaruruꞌning teeꞌ nko-koo.
7 Diiꞌ bakei dau basinooꞌ amutemuriiꞌ aarumo Kumponing-etaning tampaꞌ nko-koo biaꞌdorimaung aaꞌning-koo: masikaꞌanta-koo, kara-koo, noruꞌkoo, ookutuari arooꞌkoo eeꞌnoko niiꞌ piaa-koo. Enang napoꞌ tanatarariai nariꞌ dau basinooꞌ avusiroꞌdariri nko-koo.
8 Ninge eturampiaꞌ naurampimang diikaang piaa taaꞌniꞌpoainaꞌ oo-koo niiꞌning ninka. 9 Aiꞌ diiꞌke tee noruꞌeri otong tee piaa niikaang Ovoring Jiisuuꞌ Karistooꞌ bakaang. Tee aaꞌ bane maantoꞌari otoitaaꞌ, teka diiꞌ noruꞌduri boonko batariꞌarara ataꞌkuuꞌ diiꞌ teie bakaang ataataꞌke maantoꞌantarariiꞌnaang. 10 Eeꞌnoko ning nkaang tautau aung diiꞌkoo, aung amuriiꞌ aarumo avuavuꞌkoong nkoveriainaꞌkoo: Boonamareꞌkoo tee diiꞌ eeꞌning dootuuꞌnupoong ookara osi-koo avuavuꞌkoo tutunaꞌ tutuntariruꞌning, eeꞌnoko tee narung-koo deeaꞌ, tee avuavuꞌ nko-koong pia tee diiꞌketa tutumparuꞌ. 11 Enang tee tampaꞌnaꞌ eeꞌ: dupeveriaing temuriiꞌ nko-nko nariꞌ dompirompiꞌdoritaaꞌ otori tutuntariruꞌnaꞌ teeꞌ diiꞌka-koo makosinaꞌ noruꞌdarimanaꞌ. 12 Kapooꞌ otoꞌderuriaung-eta deeaꞌ, nka otoꞌderurining-eta avuꞌkoo makosi. Arekeeꞌ basi tee avuavuꞌ averiko tee Kumponing dotuaravaing diikaang aroarooꞌ oovui.
13 Niiꞌ tee diiꞌkoo mankiꞌ panteꞌkoo piamoriaꞌ teing pakuererimaing tamung kuaaꞌoroi otoroko, teka ookamenta nariꞌ basi-koo piamori otong. 14 Enanung batei-koo tee mmauꞌ otoꞌderurining-eta niiꞌning pakuereriaing apukaꞌpariko tenang diiꞌ apukaꞌdariko pakuraariainaꞌ. Eeꞌnoko ookara naroꞌ basinooꞌ otoꞌderuriai. 15 Teeꞌ Daari Meekunge maanaꞌ ukuauꞌnaꞌ minkuvuma aaꞌpumanaꞌ,
“Bane tee naning mmauꞌ oosivuuꞌnung, nka baruꞌ deepoꞌ otoꞌevuaꞌ, eeꞌnoko bane tee naning okiꞌning oosivuuꞌnung nka apukaꞌparavaꞌ.” (Toro 16:18)
Paulaꞌke Taitas Dovang Botovuriko Onkeonkeꞌaariiꞌnaang Nauvuruꞌnaꞌ
16 Ninge tampara tampamang Kumponing-koo tee Taitas napoꞌ Kumponinge siong-antavumaung-koo diiꞌ aaꞌnaꞌ pakururiiꞌnaang teeꞌ eeꞌnaꞌ nariꞌ ninge diiꞌ noruꞌdampimanaꞌ.
17 Aiꞌ tee Taitas tee aaꞌnaꞌ dotuari otong nkaang pia siompui napoꞌ diiꞌ beeroꞌduriiꞌnaang, teka eeꞌ noruꞌamaang, ninge nauamparuko dei baka beeroꞌduripeuꞌ, aiꞌ tee tee bakei diiꞌ oo-koo aaꞌnaꞌ piavomaung.
18 Teka niiꞌke Taitas ninka narung niiꞌmaikoꞌ nariꞌ botoampimang diiꞌanko uroresi bereeꞌnaang, tee eeꞌnara ookarai dootuuꞌnupoonge osi kante-koo tampaꞌ noruꞌaamaung doorenang tampara tampaꞌ bereng-koo pakuvuriko.
19 Aung tee naning tampara, aiꞌ ookarai dootuuꞌnupoonge osi kante-koo miruꞌauꞌnung niiꞌ ninka nariꞌ nanuꞌkoo tee mooniꞌ Karistooꞌ siompaamainge amaarimaung nariꞌ kompampira damaꞌ Jerusalemaꞌke tankaampampiiꞌnaang. Teeꞌ ookara avuavuꞌnanka tavoꞌampima tee Kumponing bakaang miring pankaing-antavampiiꞌnaang eeꞌnoko niikaang paku-koong pia oroꞌantavampiiꞌnaang teeꞌ pakumeeri.
20 Niiꞌke bokuampiruꞌnung aung naning pakumuriiꞌnaang nantoonge tee mooniꞌ avusiroꞌariri sipauꞌnung orakaꞌ tankaang-koo tuumpimaariꞌneeng-koo.
21 Niiꞌke tampaꞌ pukeampiri nkoampimaung kapooꞌ tampaꞌ nariꞌ nko-koo, Kumponing-koo dutakanooꞌke naroꞌke deeaꞌ, teka aaꞌ nantoong-koo dutakanooꞌke teeꞌ nariꞌ nkoampimaunge.
22 Napoꞌ tenaanka ninka nariꞌ narung niiꞌmaikoꞌ motekaroꞌ diiꞌanko botoampimang tee ookara batei-koo kakeꞌiiari amutemuriiꞌ mankiꞌnanka-koo pakumuriko tampaꞌ ooampimaung, eeꞌnoko diiꞌ tampaꞌ noruꞌduritaaꞌ aaꞌnaꞌ masikaꞌ pakururiiꞌnaang noruꞌdurimang.
23 Taitas tee niꞌninka mantaꞌmaresi pakumeeremaung diiꞌ paku-koo eeꞌnoko anaanka niiꞌmaikororiꞌka tenaanka ainge dootuuꞌnupoonge osi kante-kooninge anke otoromainge miruꞌaaretuꞌnaanka biikaang noruꞌ siraꞌpureeꞌnaang. Napoꞌ teie tee Karistooꞌ pankaing-antavuremanaanka. 24 Teeꞌkoo diiꞌke diikaang piaa oroꞌantaveriaing aing-koo, aiꞌ niiꞌke tee diikaang piaa pankaing-koo biivintarampimaung, eeꞌnoko ookarai dootuuꞌnupoonge ooaavaꞌnaang piamomaang.
<- 2 KOORIN 72 KOORIN 9 ->
