1 Teeꞌ nariꞌ daangamaramaaꞌnoaing. Bane kapooꞌ basiaravaukaꞌ, teka ioꞌ temuriiꞌ dangaꞌdaangang sipamira niiꞌnamuriiꞌ dangaꞌdaangang-koo pareꞌmaravaing aaꞌning-koo niiꞌnaung-koo bereꞌmarama ooamaing eeꞌnoko teing kapooꞌ makensiꞌning Ovoringe siraꞌ antavumaing ning-koo. 2 Mareꞌ kivora-ita karenaumo divuꞌuuꞌning-koo ning tee Kumponinge paning-koo koontoꞌ bakanooꞌ aꞌdeiꞌ beenaumo-navaro-koo deto bokumuuꞌ beroveeroꞌkoo. 3 Teka ning noruꞌmaravaꞌ moniꞌnaung meuꞌnung deekoꞌ aiꞌ pang tanuaanooꞌke meuꞌ. Kumponinge narunge noruꞌui otong. 4 Teka noruꞌansi oꞌnong ning deto aꞌdeiꞌ basimaruꞌnung teꞌ osi tampooꞌ, eeꞌnoko kapooꞌnanka taꞌnimpaariiꞌnanka taaravarantuꞌ naninge minkuvuma punkaam˜ puarupeuꞌ aaꞌnanka, eeꞌnoko minku-koo tauraꞌparavaꞌ. 5 Ning teeꞌ ookamira biivimarapeuꞌ, teka ning teeꞌ nkomaravaukaꞌnung, teka nkaang aruaruꞌnanka-koo deekoꞌ biivimaravaing. 6 Aꞌnooꞌ tee biivimarama deekoꞌ makotuioꞌ biivimarapeuꞌ kapooꞌnanka masikeng minkumarama. Teka teeꞌ nkomaravaung nantoonge baruꞌ ning deto basi-pinaꞌ noruꞌmaaꞌneeng-koo niiꞌnaung-koo bereꞌmarama ooamaing-koo, teka kapooꞌ ninge nkoamaing eeꞌnoko minkuamaing-koo deekoꞌ noruꞌaitaaꞌ tasiꞌmaavaing.

7 Teka ning biivimaraꞌneeng-koo teing kapooꞌ makensiꞌning aaꞌnaꞌ pankeng ooantuꞌning-koo tee teie Sietaniꞌke mono-koo tooꞌmung siꞌmuuꞌ teketa toraꞌantamumaatooꞌnaang Ovoringe tauraꞌpuioꞌ. 8 Bera tee teketa beemuꞌpie eentamaruꞌ Ovoring-koo tontaꞌuuꞌnaang ning-eta. 9 Teka teie aaꞌmuuꞌ ning makuꞌmuma, “Ninge daꞌ piaaransi pakuramanaꞌ teeꞌ makosinaꞌ daꞌkoo, aiꞌ nkaang iriꞌ tee dupeari oroꞌparamaung teing-koo aruaruꞌnuka-koo.” Teeꞌkoo ning aaꞌnaꞌ deto basinooꞌ dotumari daangamaravaing aruaruꞌmomanooꞌkoo tee Karistooꞌ bakaang iriꞌ ning-koo oroꞌparavainaꞌ arooꞌansi. 10 Teeꞌkoo eeꞌnaꞌkoo Karistooꞌ siompansi ning dotumaramaung aing aaꞌning kuneꞌama: puring mantomaravaruma, deuꞌdovamaako, poreꞌ kompama, turamaako eeꞌnoko arikananka kuneꞌama, aiꞌ tenang aing sisikeerananka kuneꞌamanang tee Karistooꞌke puring-antamumaung bakaang mintoong nko-koo.

11 Tee kara ninka biiving-koong kanuꞌpinaꞌ karoma minkuansing tee diiꞌke daangameripeuꞌninge poreꞌantameriko minkuansing. Bane ning tamunsiꞌnunge, teka teinge kara okovuri nkanuka pankeng tamparimainge ning koontoꞌ puruꞌmaavaꞌ. 12 Tenang teke diiꞌ ninka oꞌnoi ninge ookara kapooꞌnanka-koo iriꞌ oꞌmaravaꞌ doong kante taaꞌniꞌantamaruꞌnung koontoꞌ Kumponing bakaang kara okovuri nkanuka-koong masikung-pinaꞌ, tasiꞌantamarama aing aaꞌning diiꞌkoo meuꞌke nkoarako: amutemuriiꞌ taꞌning-antananka, taaꞌniꞌantananka eeꞌnoko nko-nko purintoꞌnanka. 13 Eeꞌnoko ninge diiꞌ tampaꞌ dootuuꞌkoo donkong-antarampiruꞌ niiꞌning osi-koo donkong-antavarantuꞌnaꞌ nariꞌ, teka mankiꞌ diiꞌkoo sipampaꞌ niiꞌning-koo sipantuꞌnaꞌ, aiꞌ teinge taamang tovang-koo pakumauꞌnunge. Nka ning diiꞌ ninka oꞌnoi kapooꞌnanka nkaang moniꞌ paku-anta-kooning-koo apukaꞌmarama ninge diiꞌ eentarampiaꞌ. Teka ninka taremaruꞌnung-koo orakaꞌ noruꞌmeriaukaꞌ!

14 Enang tee ning maamumaramaang diiꞌ beeroꞌdampiiꞌnaang beemuꞌpinaꞌ, teka ninge diiꞌ mankiꞌantarampiaukaꞌnung nkaang apuapukaꞌkoo, aiꞌ ning tee diiꞌ naing-koo piamomaung, diikaang kapooꞌnanka mooniꞌ dovang-pinaꞌ oroꞌnanka deeaꞌ. Noruꞌeriaing, toirekaaꞌke tee biuma kapooꞌ koreꞌaavaung, teka biumai baurukaaꞌ kapooꞌ koreꞌurimaung. 15 Teeꞌkoo ninge diiꞌ dotumarama pakurampiri ookara kapooꞌ nkaning duaꞌampaing eeꞌnoko napoꞌ booꞌkoo tauraꞌmari otong diiꞌ pakurampima. Aiꞌ pa ninge diiꞌ aaꞌnaꞌ piaarampimaung-koo ee okiꞌnooꞌ piaa-koo makuꞌmeriaing? 16 Diiꞌkoo niiꞌninge aaꞌmerimaung, “Masikung mankiꞌantamuriaung-pinaꞌ oroꞌparamaung, teka dauaꞌmurima ooampiaꞌnaꞌ mooniꞌ nkavumaung.” 17 Arekeeꞌkoo teeꞌmerimaunge? Aiꞌ ninge teing botoarama mooniꞌ eentaraariiꞌnaang botoarampaꞌ eeꞌnoko teing porora mooniꞌ diiꞌkoo nkavaavaꞌ. 18 Ninge tee Taitas botoantuꞌnung diiꞌanko beeꞌnaang, niiꞌnung ninka niiꞌmaikoꞌ ninka. Eeꞌnoko Taitasie mooniꞌ nkareruriaꞌ, apeꞌ aing? Aiꞌ neeꞌke tee narung taung siompampemaung narung noruꞌ ninka.

19 Enang ning eeꞌ minkumarako diiꞌke pa eeꞌ noruꞌmerimang: “Aung Paulaꞌ baka pakuaramanooꞌkoo niiꞌkoo dutakanooꞌke maroita tampaꞌ oroꞌparaaꞌnaang eeꞌ karomang.” Teka teeꞌ deeaꞌ, ee mmaikoriꞌ. Kumponinge narunge simpeꞌmuaing noruꞌansi Karistooꞌkoo kuunge teeꞌ karomang ookara karananka taaraverima koontariri otoriiꞌnaang. 20 Aiꞌ ninge avoroꞌantarampimaang tenang diiꞌanko mera ning piamoaꞌnaꞌ otoriko oorampiꞌneeng-koo, eeꞌnoko diiꞌ doturariarupeuꞌ ning mora turantampiri dei aing oreng aarumonanka-koo eeꞌ oroꞌning-koo: tataꞌnaang, mamairo, peusiꞌkuma iira, siivenkeꞌnanka, deuꞌ dovang, minkuminkuru, baka kirokaiari otoꞌ, eeꞌnoko onou betoveetoꞌ ninka otoꞌ. 21 Eeꞌnoko napoꞌ eeꞌkoo ning amoromaang: nkaang Kumponinge oomui otoko maiaꞌmoꞌneenga tenang diiꞌanko mora napoꞌ biromarako tenang karingai oreng nko-nkonanka mmeꞌ sipaavaruko eeꞌnoko bereꞌariaꞌ teieta biikaang aarumo kuꞌmiꞌpoꞌnanka-ita eeꞌ oroꞌnanka-ita: kaukauro, eeꞌnoko anutua maimaiaꞌnaꞌnko.

<- 2 KOORIN 112 KOORIN 13 ->