1 Ee aing nkaning toirekaaꞌ, aung kara tee ninge diiꞌ daarirerompimang diiꞌke orakaꞌnko nkoveriarooꞌnaang, teka diiꞌkoo narunge orara nkovuko deekoꞌ, niiꞌ teing tee meerooꞌnara otoꞌmemuring Bauma-anko tampo-antamurimaung, tee naning koontoꞌ tee Jiisuuꞌ Karistooꞌ. 2 Tee eeꞌnara niikaning orakaꞌ nkonanka-koo Kumponing-nung iira oꞌantavuuꞌnaang tontaꞌmemurima booꞌparuꞌnung. Eeꞌnoko niiꞌ naing deeaꞌ teeꞌ oꞌantamemuruꞌ, teeo ookara kansiꞌnupoong teeꞌke.

3 Niiꞌke teing bakaning botonanka siompampima niiꞌ teing eeꞌ noruꞌampimatoaing: Niiꞌke doma tee Kumponing noruꞌampiri otong. 4 Baie teie naninge aaꞌpumaung, “Ninge tee noruꞌansi oꞌnong,” teka teie tee bakaang botonanka siompuaꞌ, tee tee tosi-bauko eeꞌnoko tee kara masikung tee-koo otoaꞌ. 5 Teka tee naning bakaang kara pinkaꞌumaung, teie tee tee-koo tee Kumponing bakaang piaa dupearamaung. Eeꞌnoko teeꞌkoo niiꞌ Kumponing-koo oꞌnorining noruꞌmarimaung. 6 Baa tee naning aaꞌpuaing, “Ning Kumponing-koo oꞌnomaung,” teeꞌ eeꞌnaꞌ nariꞌ Jiisuuꞌpinaꞌ koontoꞌ otoaing.

7 Ee diiꞌ mmaikoriꞌ, ninge tee diiꞌanko nerakung boto naurampima daariampaꞌ, teka tee urikung boto narung tee diiꞌke Karistooꞌ komperira tutuntoma-ita otoꞌderurimaung, tee urikung botonooꞌ tero tareveruꞌnung. 8 Teka tee aung boto ninge enang daarirerompimatomaung tee deekaꞌpari nerakung boto bakaang masikeenooꞌ tee tee tee-koo Karistooꞌkoo ooampiruꞌnung eeꞌnoko napoꞌ diiꞌkoo ooampimaunge. Aiꞌ tee mutaanang tee tankinumaang eeꞌnoko tee araka masikung tero arakavaring. 9 Baa tee naning aaꞌpuaing, “Ning araka-koo oꞌnong,” eeꞌnoko baꞌmaikoꞌ munteꞌuma, tee tee mmeꞌ mutaanang-koo otong. 10 Teka tee naning baꞌmaikoꞌ piaavumaung tee araka-koo otong, eeꞌnoko tee tee teꞌ araka-koo otoko kapooꞌke duaꞌantavuarupeuꞌ. 11 Teka tee naning baꞌmaikoꞌ munteꞌuaing tee tee mutaanang-koo otong, eeꞌnoko teie mutaanange nanumang tokoo nanumatomanooꞌ noruꞌuaꞌ, teie mutaanange kaputuꞌantavuioꞌ tee bakaang duta.

12 Ee aing nkaning toireꞌ, Kumponinge tee diikaang orakaꞌ nkonanka tontaꞌderuring-koo Karistooꞌ bakaang miring-koo; teeꞌkoo ninge tee aung kara diiꞌanko daariamang. 13 Diiꞌke biumatakaampie noruꞌeri otong tee eeꞌnara naning uripoꞌketa otomaung. Teeꞌkoo ninge tee aung kara diiꞌanko daariamang. Napoꞌ diiꞌanko nemaaꞌanko daariamang diiꞌke tee orara naning puruꞌeruꞌnung-koo.

Napoꞌ diiꞌanko toirekaaꞌanko daariamang, diiꞌke Niuma Kumponing noruꞌeri otomaung-koo. 14 Diiꞌke biumatakaampie noruꞌeri otong tee eeꞌnara naning uripoꞌketa otomaung; teeꞌkoo ninge diiꞌanko daariamang. Eeꞌnoko napoꞌ diiꞌanko nemaaꞌanko daariamang, aiꞌ diiꞌ teing purintariri otoring, eeꞌnoko Kumponing bakaang kara tee diiꞌkoo otomaunge eeꞌnoko diiꞌke puruꞌeruꞌ tee naning orara.

15 Aung kansiꞌ teing ninka bakaning kapooꞌnanka ninka karaaꞌeriaukaꞌ. Baa tee naning aung kansiꞌ karaaꞌuainge tee Niuma Kumponing piaavuaꞌ otong eeꞌnoko Kumponing bakaang piaa tee-koo otoaꞌ. 16 Aing teing ookara aarumonanka kansiꞌkooning aaꞌning: mono bakaang pia siong eeꞌnoko dutai karaaꞌ eeꞌnoko naning baka daangang. Aing teing Kumponing-etaining deeaꞌ, teka tee tee kansiꞌ bakaang. 17 Eeꞌnoko tee kansiꞌ teing ninka bakaning karakaraaꞌnanka tee paaꞌaravaing, teka tee naning Kumponing bakaang pia siompuaing tee, teeꞌ nariꞌ domampari otoaing ookara batei-koo.

18 Ee aing nkaning toireꞌ, batei dueꞌumaang tee Karistooꞌ bakaang karenung pankaing pooꞌnaang teeꞌ eeꞌnaꞌ taaraveruꞌnaꞌ. Enang teeꞌke mmauꞌ Karistooꞌ bakaning kare-nupoong porora otorong. Teeꞌkoo niiꞌke noruꞌampimaung aung tee asiꞌnung batei. 19 Aing teing nantoong niiꞌkooning deempariaꞌ tero siꞌmaaruꞌning. Niiꞌkooning dei teing niiꞌ ninka nariꞌ otoropeuꞌ, teka teing tero tenkenauꞌnooꞌkoo tasiꞌparampiri otong teing niiꞌkooning deeaing. 20 Teka diiꞌ Tanuaang Meekung nkaveruꞌning eeꞌnoko diiꞌke tee kara masikung noruꞌeri otong. 21 Diiꞌke tee kara masikung noruꞌeriaung tampama daariampaꞌ, teeo diiꞌke noruꞌeri otomaung-koo teeꞌ, diiꞌ pinkaꞌantarampima, aiꞌ tee kapooꞌ tositosi tee ninka kara masikung ninka nariꞌ otoreaung noruꞌeri otong diiꞌke.

22 Tee tosi-nko baie? Tee eeꞌnara naning aaꞌpumaung, “Jiisuuꞌ tee Kumponinge Tero Pakoꞌpariꞌniiꞌ deeaꞌ niiꞌ domamurira taremurianooꞌkoo.” Tee tee eeꞌnara naning Karistooꞌkoo karenung. Teie tee tekang ookakang Bauma eeꞌnoko Bauring daang-antavuremaung. 23 Naning otoaꞌ Jiisuuꞌ Kumponinge Baurinooꞌ penkempuma Kumponing baurukaaꞌkoong deempari otopeuꞌnung, teka baa tee naning aaꞌpumaung, “Jiisuuꞌ tee Kumponing Bauring,” tee eeꞌnara Kumponing baurukaaꞌkoong deempari otomaung.

24 Tee tampara doorenang diiꞌke tutuntoma-ita taaraveruꞌnung tee Jiisuuꞌ tee teroita Kumponinge Pakoꞌpariꞌniiꞌkoong tee tampaꞌ pinkaꞌeriaing eeꞌnoko teeꞌkoo diiꞌ teing Bauring-koo eeꞌnoko Bauma tekang-koo otori otoriaing. 25 Eeꞌnoko tee tee kapooꞌ niiꞌkoo maraka-antavuuꞌnung kompampiaing, tee eeꞌnara domaang oparavaung.

26 Aung tee diiꞌanko daariamatomaung teing eeꞌning diiꞌ tosiraarimaing biikaning aarumo nau-antarampima teeꞌ. 27 Teka tee Tanuaang Meekung Karistooꞌke aruruꞌnung tee diiꞌ ninka nariꞌ otomatoaing, eeꞌnoko diiꞌ teing niiꞌnung naninge kapooꞌ nau-anta-koo keviꞌdariaung. Tee Tanuaang Meekung narung makosi diiꞌ nau-anta-koo ookara kapooꞌnanka eeꞌnoko tee bakaang kara masikung, daang deeaꞌ. Teeꞌ eeꞌnaꞌ Tanuaang Meekunge nau-antaruruꞌnaꞌ Karistooꞌkoo pinkaꞌdariri otoriai.

28 Eeꞌnoko enang tee diiꞌ nkaning toireꞌ tee ninka nariꞌ otoriaing, tenang tee oroꞌparavainang dotumariainaꞌ eeꞌnoko maiaꞌke dakaꞌmuriaukaꞌ tee poko. 29 Diiꞌke noruꞌeri otong Karistooꞌ tee koontoꞌ eeꞌnoko teeꞌkoo eeꞌ masikaꞌ noruꞌeriaing ookara tampaꞌ koontoꞌnaꞌ otoromaing teing Kumponinge paravuruꞌning.

<- 1 JOONI 11 JOONI 3 ->