1 Enang ninge makuꞌderompiiꞌnaang tee diikaang kara daarimemuruꞌnung. Tampaꞌ eeꞌ makosi: Naning nampeesiaravaꞌ otoaing. 2 Teka orara aarumo beremparimaung-koo tee, makosi, donkaani baꞌaang otoꞌevuainge, eeꞌnoko manikuma baꞌung otoꞌevuainge. 3 Baꞌunge tee kapooꞌ nampeesi-koo biꞌari otoining piavoko baꞌaang avuaing. Teeꞌ nariꞌ baꞌaange napoꞌ baꞌung avuainge. 4 Baꞌaang baka bakaang mono tanatavaravaꞌ, baꞌunge deekoꞌ makosi. Teeꞌ nariꞌ napoꞌ baꞌung bakaang mono tanatavaravaꞌ, teka baꞌaange deekoꞌ makosi. 5 Orokorariaꞌ otoai. Aꞌnooꞌ okiꞌnung batei-koo makosi nariꞌ karereta kunsirarema otoreeꞌnaang deekoꞌ. Eeꞌnoko damaꞌke mono konteereai; diiꞌka tanatarariaruko Sietaniꞌke paararuriꞌneenga. 6 Ninge boto siompansi minkuampaꞌ nampeesirariiꞌnaang, teka piarorima deekoꞌ tee makosi. 7 Ninge eeꞌ naurampimang: Nampeesirariarui dei makosi ning-pinaꞌ, nka noruꞌansi oꞌnong niiꞌ nariꞌ oroꞌnanka deeaꞌ Kumponinge narunaꞌ narunaꞌ nkomuruꞌnaꞌkoo.

8 Enang ninge eeꞌ naurampimang diiꞌ nampeesirariaing eeꞌnoko naaroonku: Diiꞌ nampeesirariarui dei tampaꞌ, ning-pinaꞌ nariꞌ otoripeuꞌ. 9 Teka diiꞌka tanatarariaukaꞌnung deekoꞌ, makosi, nampeesirariaing, karaaꞌke booꞌ otorimaatoꞌneenga.

10 Teka ninge eeꞌ naurampimang diiꞌ nampeesiniiꞌnuka, aꞌnooꞌ Ovoringe teeꞌ eeꞌnaꞌ botoruruꞌnaꞌ eeꞌpinaꞌ: Baꞌaang baꞌung-eta tontaꞌaravaukaꞌ, eeꞌnoko baꞌunge baꞌaang sipuaukaꞌ. 11 Baꞌaang tontaꞌarara deekoꞌ tee nampeesiaravaꞌ otoaing, niiꞌnooꞌ napoꞌ baꞌung-koo tampoꞌaravai.

12 Niiꞌning-koo Ovoringe tero boto nkoevuriaꞌ, teka teing-koo ninge aaꞌpamaang: Niiꞌnung Karistooꞌkoo baito-nupoong-koo narung baꞌaang mutaanang-koonani eeꞌnoko teni pinkaꞌari otoaing deekoꞌ tee ninka nariꞌ otoreeꞌnaang, teie tee, teni baꞌaang sipuaukaꞌnung. 13 Eeꞌnoko niiꞌnanie dootuuꞌkoonanie baꞌung mutaanang-koong deekoꞌ eeꞌnoko tee pinkaꞌari otoaing deekoꞌ teni ninka nariꞌ otoreeꞌnaang, tenie tee, tee baꞌung sipuaukaꞌnung. 14 Donkaani mutaanang-koong teni manikuma ninka pinkaꞌaresi tee beekaang nampeesi meekaꞌpari otong. Eeꞌnoko nani manikuma mutaanang-koonani Karistooꞌkoonung ninka pinkaꞌaresi tee beekaang nampeesi napoꞌ meekaꞌpari otong. Eeꞌkoo teeꞌ: Beekaang nampeesi meekaꞌpari otoaruko dei beurukaaꞌ Karistooꞌ bakaninge biurukaaꞌpinaꞌ deempariarupeuꞌ. Nka enang-pinaꞌ tee teing Kumponing bakaninge biurukaaꞌ. 15 Eeꞌnoko naring-koo naveu mutaanang-koonaveu pokaꞌkoo piavoaing deekoꞌ, makosi, pokaꞌaravaing. Pokaꞌarako Karistooꞌkoonaveu tee-koo baruꞌ noruꞌ daiꞌaravaukaꞌ, aiꞌ Kumponinge tee daꞌ mooa-koo miruꞌduing. 16 Daꞌ baꞌaang aiꞌ daꞌ baꞌung Karistooꞌ masikaꞌantavemaung deekoꞌ, dake noruꞌeaꞌ niiꞌnung ninka otorekotaaꞌ tokoonaꞌ nkoarapeuꞌnung: Domampepeuꞌ aiꞌ domampearupeuꞌ.

17 Nka diiꞌ Kumponinge bokururuꞌning teing niiꞌnamuriiꞌ otootoꞌkoo pareꞌdariainaꞌ besiꞌeriaukaꞌ, teka tee otootoꞌ tero narunaꞌ narunaꞌ Karistooꞌke tankeeꞌduri aruruꞌnung komperi otoriai. Aung tee boto ninge sipamaung ookara dootuuꞌnupoong-koo osi kante-koo. 18 Naning dopaꞌ totoꞌnisi bokuvuko deekoꞌ makosi, teeꞌ Juꞌkoonung-pinaꞌ otoitaaꞌ nanuaing. Napoꞌ dopaꞌ totoꞌparavaung bokuvuko deekoꞌ makosi, teeꞌ nariꞌ Juꞌdeeaung-pinaꞌ otoaing. 19 Dopaꞌ totoꞌ kapooꞌ deeaꞌ, eeꞌnoko totoꞌparavaung teeꞌ, kapooꞌ deeaꞌ, teka Kumponing bakaang boto siong tee masikung. 20 Diiꞌ temuriiꞌ otootoꞌkoo otorimaatoaing narunaꞌ narunaꞌ, Kumponinge tankeeꞌdurioꞌ otorikoꞌnaꞌ teꞌmung Karistooꞌke bakaning deentariiꞌnaang bokuruuꞌnaꞌmung. 21 Daꞌ tero naning-koo botovotonaaꞌ deentari otoko Kumponinge bokuruuꞌnung deekoꞌ teeꞌ otoi simpiriꞌanta-koong taung besiꞌeaukaꞌ. Teka doona simpiriꞌanta-koong oroꞌparako deekoꞌ makosi simpiriꞌdaravaing. 22 Baa naning tee bokuvuing niiꞌnung bakaang botovotonaaꞌ deempari otoko tee unaa-antavuing Kumponinge, eeꞌnoko teeꞌ nariꞌ tee baa bokuvuing tenang niiꞌnung bakaang botovotonaaꞌ deemparavaꞌ otoko tee Karistooꞌ bakaang botovotonaaꞌ deempari otong. 23 Daꞌ tee mooꞌduuꞌ mooꞌke. Nantoong biikaang daiꞌnisi deentari otoaukaꞌ. 24 Mmaikoriꞌ ee, Kumponing-koo imaꞌmariri oꞌnoriaing teꞌ naroꞌ bakaang bokubokue peꞌnumuring-navaro-koo narunaꞌ narunaꞌ teke oꞌnoritaaꞌ.

25 Enang teing nampeesiariaing-koo ning boto oꞌnoaꞌ Ovoring-eta, teka nkaang noruꞌ arompimaang, Kumponinge piaamuraiꞌnange naning diiꞌke masikaꞌantameriaing deeng-antamuuꞌnung. 26 Ninge tee eeꞌ noruꞌamaang: Niiꞌ enang poreꞌ kuneꞌampimaung-koo oꞌnoritaaꞌ makosi nampeesimariaꞌ tamung oꞌnoripeuꞌnung-koo tampaꞌ. 27 Arekeeꞌ? Daꞌ daꞌaang-poꞌnunge? Teni sipeainaꞌ besiꞌeaukaꞌ. Aiꞌ daꞌ daꞌaang otoaunge? Nampeainani besiꞌeaukaꞌ. 28 Daꞌ nemaka nampee-siraravaing deekoꞌ orakaꞌ nkoraravaꞌ. Eeꞌnoko neraiꞌnaꞌ teeꞌ, nampee-siaravaing deekoꞌ orakaꞌ nkoaravaꞌ. Teka teing nampeesiariaininge tee arikung kuneꞌaavaing kansiꞌkoo, eeꞌnoko ninge teeꞌ oroꞌ kuneꞌeriꞌneeng-koo teeꞌ minkuamaang.

29 Mmaikoriꞌ, ninge tee naurampimang tee aung: Batei enang apukaꞌparing Ovoring bakanaꞌmung-koong. Enang-etaꞌ deto teing biiꞌankaampi-poꞌnupoong biiꞌankaampi otoꞌevoroaing-pinaꞌ otoroaing. 30 Teing biromparimatomaing birompariaing-pinaꞌ otoroainge. Teing dotuarimatomaing dotuariaꞌ otomaing-pinaꞌ otoroainge. Teing mooꞌmooꞌ nkoaamatomaing tee mooꞌ nkoaavaꞌ otoromaatomaing-pinaꞌ otoroainge. 31 Teing nantoong kansiꞌkoong nko-nko nkoaamatomaing teing kansiꞌkoong nko-nko baruꞌ aaꞌnaꞌ noruꞌai nkoaavaꞌ otoromaing-pinaꞌ otoroaing, aiꞌ kansiꞌkoong avutevuꞌ nko-nkonanka tankinuaing. 32 Ninge pia-antarampimang diiꞌ baruꞌ norunoruꞌkoo paaꞌdariri otoriaukaꞌ. Tee naning nampeesiaravaung tee Ovoring bakaang mintoong-koo kakeꞌiiari otomaung Ovoring dotu-antavuainaꞌ piavoitaaꞌ. 33 Tee naning nampeesiaruꞌnung bakaang noruꞌ kansiꞌkoo otomang, teni baꞌaang dotu-antavuuꞌnaang piavoma. 34 Tee bakaang onou tee pokaꞌari otong. Teni nampeesiaravai aiꞌ neraiꞌnaꞌ bakaang noruꞌ Ovoring bakaang mintoong-koo otong. Teni Ovoring bakanani otoꞌkoo piavomaang ookavetara-koo, mono eeꞌnoko tanuaang. Teka teni nampeesiaruꞌnani tee kansiꞌ bakaang mintoong-koo noruꞌ otong, tenie baꞌung dotu-antavumaatooꞌnaang piavoma. 35 Ninge tee aung diiꞌ eeꞌning diiꞌka paku-koo naurampimang, diiꞌ poterampiiꞌnaang deeaꞌ, teka tampaꞌ toosirariri otoriiꞌnaang, mataaꞌirariri Ovoring-koo, tunsi paakarariaꞌ.

36 Niiꞌnung naninge eeꞌ noruꞌui dei: nani manikuma nampeesi-koo kariviriꞌai piokang napuꞌnisi tamung pankaꞌkoo makosi deeaꞌ nampeesiaravaꞌ, eeꞌnoko teie nari-antavuaing nampeesi-koo pakuvuitaaꞌ tee, tee makosi, piavoainaꞌ nkovuaing. Teie tee orakaꞌnko nkovuaꞌ nampeesi-koo miruꞌuma teni. 37 Niiꞌnaꞌ napoꞌ eeꞌ: naninge ninge minkuamanaꞌ arooꞌui dei, eeꞌnoko teeꞌ nariꞌ nko-koo piavoi dei, teeꞌ tampaꞌke, teni neraiꞌnaꞌ nampeesiaravai tarevuaing. 38 Tee tee-pinaꞌ: Tee naning teni baurang nampeesiaravaing-koo pakuvumaung tee, kapooꞌ tampara teie nkovumaung; teka napoꞌ tee naning teni tanatavumaung nampeesiaravaruko teie, tee kapooꞌ baruꞌ tampara masikung nkovumaunge.

39 Teni baꞌaang tee baꞌung-koo biꞌari otong tenang tee domampari otoko, teka tee baꞌung booꞌpari dei teni tee makosi napoꞌ nampeesi-koo piavoaing ninka Kumponing-koo kuunge. 40 Teka teni deto basinooꞌ dotuari otopeuꞌ teni nampeesiaravaꞌ otoi dei. Aung tee nkaang noruꞌ, eeꞌnoko baruꞌnooꞌ eeꞌ noruꞌansi oꞌnong: Ning-koo Kumponing bakaang Tanuaang otoko minkuamaaꞌnomaung.

<- 1 KOORIN 61 KOORIN 8 ->