1 Enang tee eeꞌpinaꞌ mooniꞌ oosieriaing teing Kumponing bakaning meekupoong paku-koo: Dootuuꞌnupoong Kalesia-nameensiꞌka osi kante-koo nauarantuꞌnaꞌ nkoveriaing, eeꞌpinaꞌ: 2 Saandei kante diiꞌ narunaꞌ narunaꞌ diiꞌka taakoreꞌning taapoꞌ koreꞌdariai. Tee tee oosi bakeniiꞌ otoko ning moaing. 3 Miruꞌereriaing niiꞌning diiꞌkooning, eeꞌnoko tenang ning tavoꞌkamira ninge karavoto˜ ninka botoarampaing diikaang avuavuꞌnanka ninka Jerusalemaꞌaape beꞌanta-koo. 4 Makosinaꞌ deekoꞌ ning nariꞌ meriainge.

5 Ning maromaramang Masedoniaꞌnameensiꞌ beeroꞌansi nanamaꞌnaang. Masedoniaꞌ beeroꞌansi diiꞌanko moainge. 6 Eeꞌnoko diiꞌ ninka oꞌnooꞌnoriaing deeꞌma, aiꞌ pa kamaari-poꞌnaveraaꞌka-koo nariꞌ oꞌnoriainge diiꞌke pakumeriainaꞌ nanampainairu-koo beꞌkoo. 7 Enang tamung okiꞌnooꞌkoo beeroꞌdampiiꞌnaang piamoaꞌ, teka pankapankaroong otoꞌkoo piamomaang diiꞌ ninka, Ovoringe tauraꞌmuko deekoꞌ. 8 Ning Epesesie oꞌnoi oꞌnoaing bera Pentekos-naꞌmung basinooꞌke. 9 Aiꞌ doona pankaing oroꞌparing ning mintoomaravaing-navaro-koo sinampuriaining. Eeꞌnoko teing niꞌninka turaniꞌnuka mmauꞌ otorong.

10 Teka Timoti poaing deekoꞌ diiꞌanko, tampaꞌ ooveriaing tee avoroꞌneeng-koo tenang diiꞌ ninka otoritaaꞌ, aiꞌ teie tee Ovoring bakaang nko-nko nkovumaung ning-pinaꞌ. 11 Tee diiꞌkoo narunge doonko noruꞌeaukaꞌ. Pakuerioꞌ danto nanuaing mooavari tee ning-anko basiaravainaꞌ. Niiꞌke niiꞌmaikororiꞌ ninka nempampimaang tee.

12 Napoꞌ tee-koo mmaikoꞌ Apolos: Ninge aaꞌnaꞌ pia-antavantuꞌnung diiꞌanko beeꞌnaang niiꞌmaikororiꞌ ninka, nka tee enang beꞌkoo piavoaꞌ, teka tee beaing doona oovura deekoꞌ.

13 Tanterariri imaꞌdariri donkoniriaing diikaang masikaꞌanta ninka, naning-naunturi purintoꞌ ninka. 14 Ootukunung kapooꞌ nkoveriaing piaa ninka nkoveriai.

15 Mmaikoriꞌ ee, diiꞌke noruꞌeri otong Sitepanas bakanava-nupoong teing teing teva-nupoong tutunaꞌ bereꞌariruꞌning Akaiaꞌnameensiꞌkoo eeꞌnoko teing toꞌbii-antavarimaung Kumponing bakaning meekupoong paku-koo. 16 Ninge botorampimang diiꞌke taaraveriaing kara teing-eta nantoong teeꞌ oroꞌnuka-ita, eeꞌnoko ookara-ita niiꞌ ninka nariꞌ aaꞌnaꞌ mintoompariaining-eta. 17 Ning dotumaring aaꞌning poroioꞌ: Sitepanas, Potunatus eeꞌnoko Akaikas diiꞌ pariꞌantaraari. 18 Tavoꞌkaioꞌ ning unaamouꞌ eeꞌnoko diiꞌ teeꞌke, unaaroruꞌ. Diiꞌke tee tasiꞌperiaing teing teeꞌ oroꞌnuka makosinuka tampaꞌ noruꞌkoo.

19 Teing dootuuꞌnupoong osi kante-koo Eesia-nameensiꞌkoo otoromainge tampara tantaaring. Akuila daring Pirisikaꞌ nariꞌ teing dootuuꞌnupoong beekanava-koo naroꞌarimaing ninka piaa ninka tampaꞌ minkuraaringe Ovoring-koo. 20 Niiꞌmaikororiꞌ ookarai aaꞌ otoroininge tampara tantaaringe. Diiꞌ ookara narunaꞌ narunaꞌ onkeonkeꞌdeeriaing meekupoong nkoarimanaꞌ.

21 Enang tee, ninge Paulaꞌke napoꞌ tampara minkurampimang anaare ninge koontoꞌ daariama nkaang birenge miring taaꞌniꞌantamari. 22 Baa naning tee Ovoring domange daiꞌuaukaꞌnung barakosiꞌ tee-koo otoaing. “Maranata” – Ovoring poaing. 23 Tee biraanke Ovoring Jiisuuꞌ Karistooꞌ bakaang diiꞌ ninka nariꞌ otomatoaing. 24 Ninge piaarampimaang diiꞌ Jiisuuꞌ Karistooꞌkoo kuunge.

Masikung.

<- 1 KOORIN 15