2 Diiꞌ teing tampenanka tantampimaang ning norunoruꞌmerimaung-koo eeꞌnoko tee naurampiruꞌnung aarumo tampaꞌ imaꞌeri otomaung-koo. 3 Teka ninge diiꞌ pia-antarampimang tee Karistooꞌ noruꞌeriiꞌnaang tee tee Boreꞌ ookara donkaang kante-koo, eeꞌnoko donkaani tee manikuma-koo boreꞌ, eeꞌnoko Kumponing Karistooꞌkoo boreꞌ. 4 Baa donkaani kunsiaravaing niiꞌnaꞌ tarampeearavaing˜ boreꞌ dakaꞌparitaaꞌ tee tee Karistooꞌ doreꞌuaꞌ otong, bakaang Boreꞌ. 5 Niiꞌnani manikuma oosirarimanooꞌke kunsiarapeuꞌ niiꞌnaꞌ tarampeearapeuꞌ bakaang boreꞌkoo baarong manikuꞌkoo makosinaꞌ kurumparavaꞌ tenie tee baꞌung doreꞌuaꞌ otong, tee bakaang boreꞌ. Teni tee teni-pinaꞌ nariꞌ dapo kaariarinani-pinaꞌ maiaꞌpoꞌnani. 6 Niiꞌnani manikuma boreꞌkoo baarong kurumparavarupeuꞌnani makosi, dapo opui napuꞌarapeuꞌ, teka kaariari otoꞌkoo maiaꞌopeuꞌnung deekoꞌ makosi manikuꞌkoo makosinaꞌ baarong kurumparavaing napoꞌ, boreꞌ dakaꞌpui. 7 Donkaani tee boreꞌkoo baarong kurung-koo makosi deeaꞌ dootuuꞌkoo oosirarimanooꞌke, aiꞌ teie tee tavoꞌantavumaung Kumponing bakaang oroꞌoroꞌnaꞌ eeꞌnoko tee meenasi bakaang; teka manikumai donkaani bakaang meenasi tavoꞌantavumaung. 8 Tutuntoma tee donkaani manikuma-ita Kumponinge nkovuaꞌ, teka manikuma donkaani-eta nkovuuꞌ. 9 Donkaani tee Kumponinge manikuma nkoevuaꞌ, teka manikuma Kumponinge donkaani nkoevuuꞌ.

10 Teeꞌkoo maniiꞌkoo boreꞌkoo baarong kurumparimatoaing taaꞌniꞌanta-koo donkaani deto deeng-antavui, eeꞌnoko koosinunankai ooaama dotuarimatoai. 11 Aꞌnooꞌ tee eeꞌkoo: Manikuma donkaani-eta tontaꞌaravaꞌ, napoꞌ donkaani manikuma-ita tontaꞌaravaꞌ Kumponing bakaang aarumo-koo. 12 Teeꞌ nariꞌ manikuma donkaani-eta nkovuuꞌnaꞌkoo napoꞌ teeꞌ nariꞌ donkaani manikuma-ita pontoꞌaramaung, nka aing ookara teing Kumponing-etaning. 13 Diiꞌka-koo arekeeꞌ, oosirarimanooꞌke boreꞌkoo baarong kurumparavaꞌ manikuma ee kunsiarapeuꞌ Kumponing-koo, makosie? 14-15 Enanaroong-koo niiꞌke nantoong-koo nkoaramanaꞌ ooampima dei tasiꞌpampipeuꞌ makosinaꞌ eeꞌ: Narung donkaani dapo isikung otoi tampaꞌ deeaꞌ, eeꞌnoko nani manikuma dapo isikung otoꞌevuitaaꞌ tee tampaꞌ, aiꞌ tee tee bakaang meenasi. Aming-koo, nnaꞌ Kumponinge tee dapo avuuꞌ boreꞌ dakaꞌkoo. 16 Baa niiꞌnung naning minkuminku-koo piavoko eeꞌ nauramaꞌnaang, “Niiꞌnamuriiꞌ aarumo otoꞌmemuriaꞌ, eeꞌnoko Kumponing bakaning dootuuꞌnupoong osi kante-koo otoꞌevoroaꞌ.”

17 Naurampima aing botovotonanka napoꞌ narung tuumpi otoꞌmemung ninge minku-koo eeꞌ: Diiꞌ naroꞌdarima orakaꞌ nkoverimatoininge tamparananka dakaꞌpurimatoi. 18 Tutung tee taaravansieeng diiꞌkoo tankatankaang otong tenang diiꞌ dootuuꞌkoo naroꞌdarima, eeꞌnoko ninge masimasikaꞌantavamang. 19 Aming-koo, nnaꞌ aarumo tankatankaang tee masikaꞌ tavoꞌkuaing diiꞌkoo tasiꞌpampiainaꞌ baata areing masikaꞌpariri otong. 20 Tee tee taamang diiꞌ nai-koo naroꞌdarimaung Ovoring-nung tamperima Ovoring-nung taamang deeaꞌ, 21 aiꞌ tee tee narionaꞌ diiꞌka naierimaung eeꞌnoko teeꞌkoo niiꞌning peeravorokooꞌ eeꞌnoko niiꞌninge naiaamatoma kanuꞌantavarikooꞌ. 22 Arekeeꞌ, osie diikanooꞌke taamang eeꞌnoko ntong tovang ee naieriarupeuꞌ? Kumponing bakaning dootuuꞌnupoong ee okiꞌnaꞌanta-koo piarorimaunge, eeꞌnoko ataꞌoiꞌnuka maiaꞌanta-koo? Areꞌdampiiꞌnaang ninge; daangantampiiꞌnaang? Bakei, katuaꞌ teeꞌkoo.

23 Tee pareꞌnaanta ninge naurampiruꞌnung Ovoringe baka poꞌantavuuꞌnung. Teꞌmung muunga Judasie tooka kompura kare-nupoong-koo sivuuꞌnaꞌmung Ovoring Jiisuuꞌke bereteꞌ nkavura, Kumponing-koo tampaꞌ, tampura tenang pisiꞌuuꞌ eeꞌnoko aaꞌpuuꞌ, 24 “Aung tee nkaang mono makosi diiꞌ neeꞌdampima booꞌkoo tauraꞌmaring. Eeꞌ naierima ning noruꞌmerimatoaing.” 25 Taamang bakearako tee teeꞌ nariꞌ napoꞌ tereng uaini-poꞌnareng nkavura aaꞌpuuꞌ, “Enang-eta deto areng-koo naikirima eeꞌ noruꞌmerimatoaing, ninge Kumponing ninka nerakung kara naroong-anta nkaang erenge pinkaꞌantavantuꞌnung diiꞌ domantariiꞌnaang.” 26 Tenang naierima aung bereteꞌ eeꞌnoko tuaantarima areng-etaꞌ diiꞌke siraꞌperimatoaing tee Ovoring diiꞌkoo booꞌparuꞌnung poainooꞌke basi.

27 Tee tee enang naning tee bereteꞌ naivuaing tuaamparama tereng-eta Ovoring bakanareng-eta makotuaꞌnaꞌ nkovuma tee tee tuumpivuaing mono-koo eeꞌnoko ereng-koo Ovoring bakaang-koo orakaꞌnko nkovuing-koo. 28 Naning tee tutung baakeenearavaing baka mmeꞌ naivuaꞌ bakanavioꞌ bereteꞌkoo eeꞌnoko teruꞌ tereng-eta. 29 Aiꞌ tee naning Ovoring bakaang mono tampaꞌ tasiꞌpuaꞌ naivuaing tee tee baka orari-antavaravaing tee-koo naivuing-koo. 30 Teeꞌkoo eeꞌnaꞌkoo mmauꞌ diiꞌkoo-nupoong aruaruꞌoromaung eeꞌnoko siipavorokooꞌ eeꞌnoko mmauꞌ booꞌparikooꞌ. 31 Tutung diiꞌka tampaꞌ simpesimpeꞌdaripeuꞌning deekoꞌ teie orameng-koo simpeꞌduriarupeuꞌ. 32 Teka Ovoringe orameng-koo simpeꞌdurima tee, teie koong-antarurimaung baurukaaꞌpinaꞌ asiꞌnooꞌke diiꞌ kiimata-nupoong tanturiꞌneeng-koo kansiꞌnupoong ninka nariꞌ. 33 Teeꞌkoo mmaikoriꞌ, taamang-koo naroꞌdarima tampaꞌ navurariri tataꞌdeeriaꞌ naierimatoai. 34 Niiꞌnung peeravoko osie taamang-antaverimatoai diikaang naronaroꞌ kiimata-poꞌnung deemparaꞌneenga. Damaꞌke mora napoꞌ niiꞌning naurampiaing.

<- 1 KOORIN 101 KOORIN 12 ->