A Varumaraiang A Waambaar Zin Jon Ka Waan Sin Aubina Di Inaxam Paazaai A Dor Vaamaravazang Pana A Waambaar Angkari Aaposal Jon, naata Zebedi xa varaar a waambaar angkari. Amun maravas faagit di wat ipiaat adu a laklagaai a xazak ka daxa singsaxai a winpina xa raksaat, malasing ma a laklagai xa iziar rawarak siaana a winpin. Pana a vaagitang kanaan, di piaat adu Iesu xa wat be wana a laklagai, xawit pana a winpin. Ma di naxaam adu a laklagai xa iziar rawarak siaana a winpin, malasing ma di piaat a matmalabuk taksaat ila winpin ka daxa, xawit nat faraxas kana varaksaat a laklagai, malasing ma bulaai di gigiu amun saan taksaat. Jon ka langarin amun faraviraaiang faagit angkanaan ma xa varaar a waambaar angkari. Ka vazei naandi dina naknakaai wana amun faraviraaiang faagit, ma xa vainaxaam naandi adu Nakmai xana zaxot faulin naandi. A maariaas iwana fararang ka malasing AD 87. A baar 1 Jon ka malasing kari: (1) 1:1-4 Iesu a Dorang iwana roroiang (2) 1:5-2:29 A lan iwana a maravas ma a lan iwana bungsuzuk, nandiaa xawit dit faraxas iaa (3) 3:1-4:6 Amun naata Nakmai ma amun naata Saatan (4) 4:7-21 Nakmai xai sasaxot aubina (5) 5:1-12 Aubina zin Nakmai dit paramin a matmalabuk taksaat (6) 5:13-21 A vaanongang iwana a dorang
1A Dorang Kai Lis A Roro Tapal 1 Jn 1:1Maam maadi ifazei wana naan, a Dorang kai lis a roroiang. Ma a Dorang kanaan ka izi roro mumua pis, paamua wana a faaziarang iwana a pira angkari. Maadi ra langarin ma maadi ra raamin. Maadi ra raamaai wana naan ma maadi ra xaaf naan. 2 Jn 1:14Ma a roroiang kanaan ka ra balas la maravas, ma maadi ra raamin naan, ma maadi ipiaat a dorang faaratunaan pana naan. Ma naari maadi fazei wana naan sinim, naan a Roro Tapal ina xa ra iziar varaxai wana Damana, ma xa balas la maravas sin dia. 3 Maadi fazei zinim pana naan ina maadi ra raamin ma maadi ra langarin a dorang sina xuna xanat faraxas nim naaguna izi vatu varaxai wana maam. Ma aizi vatuiang kanaan sin dia varaxai wana Damana dia ma Naatna Iesu Kaarisito. 4 Maadi varaar a dorang kari xa waan sinim kuna a nanamang sin dia xana bas mase. A Zangazang Lamaskana A Maravas 5 A dorang maadi ra langarin sina ma maadi fazei wana zinim ka malasing kari: Nakmai naan a maravas ma xawit mase ta bungsuzuk na iziar lamaskana. 6 Tamon dia di piaat adu di izi vatu varaxai wana Nakmai singsaxai di zazangas lamaskana bungsuzuk, dia amun taktegit ma dia xawit di iziar lamaskana a dorang faaratunaan. 7 Singsaxai tamon dia di zazangas la maravas malasing Nakmai xa iziar la maravas, dia di izi vatu varaxai wana dia zaksaxai ma a daraaia Iesu Naata Nakmai xat faninis dia ziaana amun matmalabuk taksaat faakdul.8 Tamon dia di piaat adu xawit ta matmalabuk taksaat sin dia, dia di vagit dia nanga, ma a dorang faaratunaan kawit na iziar zin dia. 9 Tamon dia di pitfiaat amun matmalabuk taksaat sin dia zin Nakmai, naan ka tak ma xana valos a dorang sina ma xana naxaam pizin amun matmalabuk taksaat sin dia, ma xana vaninis dia ziaana amun matmalabuk faakdul ina xawit na tak. 10 Tamon dia di piaat adu xawit di ra giu ta matmalabuk taksaat, pana awat dorang kanaan di vakilaan Nakmai adu naan a rapti iwana vaagitang, panaze Nakmai xa piaat adu aubina vaakdul di gigiu amun matmalabuk taksaat. Ma tamon dia di piaat malasing kanaan, a dorang sina xawit na iziar lamaskana dia.
1 Jon 2 ->
8 Tamon dia di piaat adu xawit ta matmalabuk taksaat sin dia, dia di vagit dia nanga, ma a dorang faaratunaan kawit na iziar zin dia. 9 Tamon dia di pitfiaat amun matmalabuk taksaat sin dia zin Nakmai, naan ka tak ma xana valos a dorang sina ma xana naxaam pizin amun matmalabuk taksaat sin dia, ma xana vaninis dia ziaana amun matmalabuk faakdul ina xawit na tak. 10 Tamon dia di piaat adu xawit di ra giu ta matmalabuk taksaat, pana awat dorang kanaan di vakilaan Nakmai adu naan a rapti iwana vaagitang, panaze Nakmai xa piaat adu aubina vaakdul di gigiu amun matmalabuk taksaat. Ma tamon dia di piaat malasing kanaan, a dorang sina xawit na iziar lamaskana dia.
1 Jon 2 ->