E LUK 15

La vikarara la tilovo te Iesus te la sip ale ruru soio la hohoi

(Matiu 18:12-14)

1 Te la haro isasa, egiteu la tahalo la ilabi la takes, me egiteu la tahalo la iruru isahari tai, egite goio te Iesus veia ge lolo la merera tetala. 2 Egiteu e pariseo, me egiteu la tahalo la mari, egite hiloa mai ele, egite vikara kukumuala mago “La tahalo ale e Iesus, soioge eia ge e vikilipi tegiteu la tahalo la iruru, eia alali vikapopo legiteu ele!”

3 Tio, e Iesus rovi la gabutatalala tegiteu mai ele, eia goio veia giteu la vikarara la tilovo isa maie 4 “Mai isa tamutou eia ge tahola la sip salatusa, me isa ge ruru soio la hohoi, e tahola ge igoa mave? Eia ge hiliti taro egiteu la sip tetala tomi ale savulu ualasiu gete ualasiu, egite pou tola moli te la muli giteu, eia ge paa muli vagari la sip ale isa kokovuo, kara ale eia ge sivutia. 5 Mai eia ge sivutitia, eia ge sagege pepeho, eia ge tilo saea soata la behola, 6 eia ge bolea soluma. Eia ge tola vikapopo egiteu e vikilipilipila, egiteu e tabarabarala, eia ge veia giteu mago ‘Eau sagege pepeho pasi, la vuhula eau sivutiti la sip taku ale ruruti soio la hohoi. Etato ge sagege, etato ge igo la ilalila.’ 7 Mai tai moli ele, eau vei seselea mutou, la sagegela ge uru pepeho oata la lage mai la tahalo la iruru isa ge vuvulo. La sagegela te ale isa moli sekela, eia kara polo la sagegela ale soio tegiteu ale savulu ualasiu gete ualasiu, ale egiteu veia egite la tahalo la maroka, la vuhula egiteu la savelela ouka, eala La Uru kama ge sagege agi legiteu.

La vikarara la tilovo te Iesus te kina isa ale paru kokovu

8 “La tavile isasa, eia sau tola la uati savulu sasa, mai e kina ale savulusa sesele. Eala moli isa goio paru kokovu. Tio la tavile alele goio eia ge igo lava? Eia ge viroko la lam tetala, eia goio ge papaa oilo la ilo la luma tetala tomi ele, kara ale eia ge sivuti loua. 9 Mai eia ge sivutia, eia ge tola vikapopo egiteu e varagagala, egiteu e tabarabarala, eia ge veia giteu mago ‘Eau sagege pepeho pasi la vuhula eau sivutiti e kina taku isa ale paru kokovu. Etato ge sagege, etato ge igo la ilalila!’ 10 Mai tai moli ele, egiteu la angelo te La Tahalo Uru, egite ge sagege sesele pasi la tahalo la iruru isa sekela moli, mai eia ge vuvulo.”

La vikarara la tilovo te hatamalelaba ale eia tou e tamala

11 E Iesus goio visolo lou la merera tetala soio tegiteu mago “La tahalo isasa oio, e latula ilua e hatamalelaba. 12 Ale bisi tegirua, eia goio veiale tama girua mago ‘Tete, taritigi eme ge lele luea milua me tuagu la uati me la magasa taume.’ Tio e tama girua goio igo molia mai ale bisi veitiale, 13 la haro isahari goio polo, ale bisi goio sugu taro la magasa tetala, eia abi la uati ovola, eia goio hiliti taro e tamala, eia goio tuga. Eia goio tuga soio la mautu isa malau, eia goio vikaluvu tomi la uati tetala te la vareagila tetala ale uru pepeho. 14 Eia ali tomiti la uati tetala mai ele, la vitolo uru pepeho sibitala te la gale alele, eia goio pouti la savelela, eia la ilali ouka. 15 Eia goio paa muli la igogolu oio te la tahalo uru isasa te la gale alele, eia bahea soio veia eia ge baumuli egiteu la bolobolo tetala. 16 Eia vitolo sesele, eia masaga taia veia ge ali suli egiteu la bolobolo te la vaga ale eia valivali legiteu ele. Eala moli la tahalo isa kama gogoa veia ge abiala bakisi la makara la ilali.

17 “Eia pou mai ele, la gabutatalala tetala goio beu rivu tataho loua, eia goio veia maie ‘Egiteu la bilalaha te tete, egite ali marumaru tataho, me eau omai pepeho moli la vitolola. 18 Eau ge hiliti, eau ge beu rivua soio te tete, eau ge veiala mago: Tete, eau igoti la iruru soio te La Uru me soio taume tai. 19 Eau kati koramulia veia eme ge toi lou leau veia eau e latumu. Eme ge vagoilo rivu louau, eau ge mai moli la bilalaha taume isasa.’ 20 Tio eia gabutatalea mai ele, eia goio hiliti, eia beu rivua soio te tamala.

“Eia so tatuga te la gauru, eia soukama guvi hagagavi te la mautu, e tamala goio hiloa soio, eia goio mata kaseka tavua. Eia hari tavua soio, eia goio lao robotia, sagege roboa.

21 “E latula goio veiala mago ‘Tete, eau igoti la iruru soio te La Uru me soio tai taume, eau kati koramulia veia eme ge toi leau veia eau e latumu.’

22 “Eala moli e tamala goio baha egiteu la bilalaha tetala mago ‘Amuto tuga, abi somai la lavalava ale taritigi pepeho, la tuali, la silipa, etato ge vitokoromo e latugu ale beutia. 23-24 Amuto ge lao isa uru la bolo, eau ge vaoge e latugu, la vuhula eia mai ale pehoti, eia mahuliti lou, eia pala kokovu, eia sibitalati lou.’ Tio egite tomi goio igo la ilali uru pepeho mai ale e tamala veitiale.

25 “Eala moli e tuala popou orivo, eia igogolu kaluvu, eia veia ge goluma, eia goio sibitala oluma, eia lolo la mareregola uru oluma te la mautu, eia lolo la tilali la galamo me la kude, egite baubau, tilalia. 26 Tio eia goio baha tavu la bilalaha te tamala isasa, eia tahia mago ‘A ge, la tilali la papaga ale soluma mai moliti ele, mave?’

27 “Goio la bilalahale koliala mago ‘Ale e tarimu beutia, e tamamu eia laoti la bolo isa uru ge vaogela, la vuhula eia sagege pepehoti leia, eia beu rivuti loua, eia kama vilua oio te la mautu isasa.’

28 “Tio, e tuala loloa mai ele, eia igo totolo pepeho seseletio, eia kamati goluma. Goio, e tamala loloa veia eia ogala popou moli, eia goio hari tavua, eia kaka gogogoa veia eia ge goluma ge hilo la ilali tegiteu. 29 Eala moli eia veiale tamala mago ‘Eme hiloa, la leavala usuti eau pou taume, eme babaheau, eau kama toutoumei. Eala moli eme kama abiagu isa bisi e latu la mee ge vaoge leau veia amiteu me egiteu e vikilipilipigu ge pou vikapopo ge alia. 30 Eala moli e latumu ale kama kokorale beutia, eia ale vikaluvuti la uati taume uru soio tegiteu e hatavivile la gauru, eia goio beua, eme mata kaseka tavua, eme laoti isa uru la bolo, eme vaogeti leia?’

31 “Tio, eia veiale tamala mai ele, eala moli e tamala goio veiala mago ‘Latugu, eme pou tataho omai taku la leavalavala tomi, la papaga tomi ale taku, eia taume tomi moli. 32 Ale etato igoti la ilalila, la vuhula e tarimu ale pala eia mai ale pehoti, eia mahuliti lou, eia kokovu, ale eia sibitalati loue.’ ”

<- E LUK 14 E LUK 16 ->