2 Amuto ge pou tavu sesele la kilaka, amuto ge mata kaseka, ge kaka moli me la sagegela te la tia mutou. 3 Me amuto ge kaka tai La Tahalo Uru veia eia ge abia miteu la baa ale koramulia veia amite ge valolo tataho egiteu la valalua me hatavivile ale omai te la merera te Kraist ale pala tabuli kokovu. La merera moli aleie, eau palati la valolola, me eala egite vagoiloau te la luma la kilisi. 4 Amuto ge kaka veia La Tahalo Uru ge suliau, la valolo taku ge matagaga tataho, la vuhula ale la tabarila taku.

5 Amuto ge vibaumuli la vulovulo mutou soio tegiteu la valalua me hatavivile ale kama goilo te Kraist. Amuto ge raragi tataho veia ge vahilo legiteu la gauru te Kraist. 6 La merera tamutou tavu egiteu ge mai ale malama, amuto ge vikara tataho, me mai egite ge tahi amutou la tilahi te la gauru te Kraist, amuto ge raragi moliti mai ele veia ge koli seselea soio tegiteu tomi isasasa.

7 E tabara gatou sesele, e Tikikas, eia ge gilemulia mutou te la pulolou taku omai. Eia la tahalo la valolo sesele, amila vaigogolu kapopo te la bilaha te La Uru. 8 Eala eau bahea soio tamutou ele veia eia ge gilemulia mutou te la pulolou taku omai, eia ge vivagari amutou ovola. 9 Eau baha egirua me Onesimas, eia tai e tabara gatou sesele, eia isa tamutou ele, eia la tahalo isa taritigi pepeho. Egira me Tikikas ele ge gilemuli tatahoa mutou la pulolou taku.

10 E Aristakas, ale pou tomi leau te la luma la kilisi, eia veia mutou la haro sesele soio tamutou, egira me Mark ale e tamisale Banabas. Me e Mark ele, amuto lolotia la merera taku pala veia mai eia ge guvi oio tamutou ele, amuto ge rara tavu seselea, ge vararapua. 11 Me e tabara gatou uru, e Iesus Iastas, eia tai toia mutou la haro. Me tegiteu e Iuda tomi ale goiloti te Kraist, egiteu taho tolu moli ele suliau te la igogolu la valolo te la pulolou la matagagala te La Tahalo Uru ale halaba. E Aristakas, e Mark, e Iastas, egite taho tolu moli ele suli pepehoau te la igogolu taku ele. 12 Me e Papras tai veia mutou la haro. Eia isasa tai tamiteu ale omai, la bilalaha sesele te Kraist Iesus. Eia sau tola sesele le amutou la kilaka tetala te la haroharo tomi veia La Tahalo Uru ge vivagari amutou, amuto ge rovi tataho la masasagala tetala, amuto ge sagaiti sesele ale amuto ge roromuli tomi moli la merera tetalale. 13 Eau rovitia, la tahalo ale e Papras ele, eia igogolu vagari veia amutou la valalua me hatavivile e Kolose, la valalua me hatavivile e Laodisea, me la valalua me hatavivile e Hirapolis tai, veia amuto tomi ele ge matagaga tataho te la merera te Kraist, me eau veipalea mutou mai ele, amuto ge rovia. 14 E maura e Luk tai, e dokta taku ale taritigi, egira me Dimas veia mutou la haro.

15 Amuto ge laharoa giteu e tabarabaragu oio la mautu e Laodisea, amuto ge vei taia la tavile uru e Nimpa, me egiteu la valalua me hatavivile ale lotu oio te la luma tetala, veia eau e Pol toi la haro sesele soio tegiteu.

16 Amuto ge gigi kaluvu la merera taku ele, amuto ge vaharia soio tegiteu la valalua me hatavivile te la lotu oio la mautu uru e Laodisea, egite ge gigi taia, me amuto ge gigi tai la leta ale eau kekesia giteu e Laodiseale.

17 Amuto ge vei taiale Akipas mago “Eme ge vagari, eme ge vikaluvu sesele la igogolu ale La Tahalo Uru tabaratiamu.”

18 Te la tapasi la merera tomi maie, eau e Pol sau tola la pen, eau kekesia mutou te la limagu sesele. Eau toia mutou la kavikoki, me la haro, me la maulavi, me la logo soio tamutou tomi. Amuto ge gabu tikumua ale eau so popou te la luma la kilisi omaie!

Taritigi la gilogo te La Tahalo Uru eia ge pou tamutou tomi. Eala moli ele, kaluvuti.