Hebrews 4

1 Etu nimite, Isor laga aram jagate ghusi bo paribo laga kosom amikhan logote ase, hoilebi jodi kunba manu ta te punchibole para nai eneka nohobo nimite amikhan bhoi pora rukhi thakibo. 2 Kelemane taikhan ke koi diya nisena amikhan ke bhi bhal khobor to koi dise. Kintu ki kotha koi dise etu pora taikhan nimite eku labh huwa nai, kelemane kun manu biswas pora hunise taikhan logote mon mili kene thaka nai. 3 Kelemane amikhan biswas kora pora aram jagate ghusi bole parise, Tai pora kowa nisena,

“Moi laga ghusa te kosom kha nisena,

Taikhan Moi laga aram jagate kitia bhi ghusi bole na paribo.”

Aru jodi bhi, shristi shuru kora homoi pora Tai laga kaam sob pura kori kene rakhise. 4 Kelemane Isor kotha te sath din laga kotha eneka koise:

“Aru Isor bhi sob kaam kori kene sath dinte aram korise.” 5 Aru bhi eneka likha ase,

“Taikhan Moi laga aram kora jagate ghusi bole na paribo.”

6 Etu karone, ta te ghusi bole para kunba aru bhi ase, aru kunba manu susamachar hunise hoile bhi taikhan kotha namana nimite ta te ghusi bole para nai. 7 Isor pora ek din ke “Aji” matidise. Bisi din pichete, Tai David logote kotha korise, age te kowa nisena,

“Aji jodi tumi Tai laga awaj hunile,

Apuni laga mon tan nokoribi[a].”

8 Aru jodi Joshua pora taikhan ke aram dise koile, etu pichete Isor pora aru bhi alag din laga kotha nokobole thakise[b]. 9 Etu nimite, Isor laga manu nimite Bisram din rakhi ase. 10 Kelemane kun Tai laga aram jagate ghusi bole parise, tai nijorke sob kaam pora aram pai loise, jineka Isor Tai laga kaam pora aram loi sele[c]. 11 Etu karone, kun bhi eneka kotha namani kene girija nisena nohobo nimite amikhan bhi aram jagate ghusi bole nimite taiyar koribo[d]. 12 Kelemane Isor laga kotha to jinda aru dui phale dhar thaka talwar nisena kaam kore. Etu he atma aru jibon majot te ghusi kene, jurai aru hardi khan ke bhag koribo pare, aru manu laga monte ki bhabona ase etu sob bhi janibole pare[e]. 13 Aru shristi te ki bonai kene thaka eku Isor pora lukai kene nai. Kintu, sob khula-khuli ase aru Taike amikhan sob hisab dibole lage.

Jisu He Mohan Moha Purohit Ase

14 Kilekoile amikhan logote mohan moha purohit ase, kun sorgo paar kori kene ahise, Isor laga Putro, Jisu, etu nimite amikhan biswas ke dhori lobo. 15 Kelemane amikhan laga komjur nabujha laga moha purohit thaka nohoi, kintu amikhan nisena, Taike bhi porikha korise, kintu Tai eku paap kora nai. 16 Etu nimite ahibi, amikhan mon dangor kori kene Isor laga anugraha thaka singhason usorte jabo, eneka korile amikhan daya pabo aru dukh homoi te modot kori bole anugrah pabo.

<- Hebrews 3 Hebrews 5 ->