Hebrews 3

Moses Pora Dangor Jisu Ase

1 Etu nimite, pobitro bhai khan, apuni khan sorgo rajyo nimite matise. Jisu ke bhabibi, jun ase amikhan pora shikar kora laga apostle aru moha purohit. 2 Jineka Moses pora Isor laga ghor te hodai biswasi hoi kene thakise, tineka Tai bhi, kun pora etu kaam kori bole nimite Taike basi loise, Tai uporte biswas koribo para ekjon thakise. 3 Jineka ekta ghor pora bhi ghor bona manu ke bisi sonman aru mohima hoi, eneka pora Tai he Moses pora bhi dangor sonman aru mohima ase. 4 Kelemane ghor to kunba pora bonai, kintu Isor pora he sob bonaise. 5 Moses bhi Isor laga pura ghor te biswasi ekjon noukar thakise, etu kotha laga gawahi khan hobo nimite jun aha dinte hobole ase. 6 Kintu Khrista to Isor pora biswas thaka Putro ase kun Isor laga pura ghor sai ase. Amikhan bhi Tai laga ghor hobo jodi amikhan ke ki asha te matise etu te phutani kori kene mon dangor pora dhuri thakise koile.

Isor Laga Manu Khan Nimite Kotha

7 Etu nimite, Pobitro Atma pora bhi eneka koise:

“Aji, jodi apuni Tai laga awaj hune

8 Mon tan nokoribi,

Aru biya kaam nokoribi,

Jongol te thaka homoi te porikha kori kene sa nisena*.

9 Tumi baba khan laga baba khan pora Moike porikha kori kene kotha mana nai,

Taikhan Moi chalis saal tak ki kaam korise etu sob dikhise.

10 Etu nimite Moi manu khan uporte khushi thaka nai.

Moi koise, ‘Taikhan hodai mon pora biya kaam kori kene jai,

Aru taikhan Moi pora bhal rasta dikhai diya to najane.’

11 Moi laga ghusa pora kosom kha nisena he ase:

‘Moi thaka aru aram kora jagate taikhan kitia bhi jabo na paribo†.’ ”

12 Hoshiar hoi jabi, bhai khan, apuni khan laga monte biswas nakora laga biya bhabona nahibo nimite, kelemane etu pora apuni khan ke jivit Isor pora dur loijai. 13 Kintu, hodai ekjon-ekjon laga mon dangor kori dibi, jiman din ke “aji” matibo, titia apuni khan majot kun laga bhi mon to paap laga biya kaam pora tan nohobo. 14 Kelemane amikhan Khrista laga kaam te sathi hoi jaise jodi amikhan shuru pora ses tak Tai pora biswas koribo para manu thakise koile. 15 Eitu khan nimite Isor kotha te koi dise,

“Aji, jodi apuni Tai laga awaj hune,

Apuni laga mon tan nokoribi,

Aru biya rasta te najabi.”

16 Kelemane kun Yehudi khan huni kene bhi kotha mana nai? Taikhan sob Moses logot pora Egypt chari kene ulabole parise na hoi? 17 Aru kun logote Tai chalis saal tak khong uthi kene thakise? Paap kora manu khan logote nohoi naki, kun laga mora gaw to jongol te giri kene thakise?‡Num. 14:29. 18 Aru kun logote Tai kosom khai sele taikhan Tai laga aram kora jagate ghusi bole na paribo koi kene, kun manu kotha namani kene ase taikhan ke nohoile aru etu kotha kunke koisele?§Psa. 106: 24-26. 19 Amikhan dikhise biswas nathaka nimite taikhan ta te ghusi bole para nai.

<- Hebrews 2 Hebrews 4 ->