Lom 3

1 Adok Yowbad singay bilabeids peinan min-Yudiy ya̱kids, ne? Ikalin nuwan peinan Ebelam nakabivatus wa̱wouds, ne?

2 Magen, bo ilabeids youd babaw waseg. Nakabsilamaw waseg, Yowbad nilivnek anilivan min-Yudiy wasigeis.

3 Min-Yudiy mwasanin mo isiplaves aygan Yowbad, tage Yowbad nag ibob ansinap didumwal wasigeis ya̱kids.

4 Nag. Magat babaw gamag bitakapidabs, Yowbad mo bisesuna tadidumwal tonen. Liva̱nen Yowbad nises mamagina:

“Amlivan bakanuw mo bakaban amsinap didumwal,

o igaw ya̱tal waseg bukutawtoun mo bukutamap yak.”

5-6 E, taninuways adsinaps kalbaleb mo takakins Yowbad ansinap didumwal, wankuyeim tabta bitalivans, talansa, “Yowbad takalbaleb, peinan ikawkuneids”? Awoum bitalivans ma̱wan. Livan kalbaleb. Gamag mwasanin asisinap ma̱wan. Kukin Yowbad ansinap bigeg, ta-ma̱wan bikatukin wasigeis gamag yakids.

7-8 Tayyaweids mwasanin ilansa, “Pawl inageiguy mamagina,

‘Bayaweid singay mo bitakakins Yowbad ansinap mounid, mapuna bitakavasis.

Adok awoum biyateleig peinan agusinap kalbaleb. Kadiloka beivag adsinap kalbaleb va̱gan kid Yowbad ansinap bwanabwein mo bisap.’ ”

Tayyaweids mwasanin idokes gungeiguy ma̱wan. Kadilok Yowbad bikamta̱nis peinan asilivan ma̱wan.

Nag kal ansinap didumwal

9 Ama̱wan? Tabta min-Yudiy ya̱kids bitamugwas? Nag. Agulivan mamagina adsinaps kalbaleb, babaw ya̱kids, takinew min-Yudiy, o takinew ven babaw gimgilis tasiyas.

10 Liva̱nen nises mamagina:

“Nag kal ansinap didumwal.

11 Nag teitan ikakin; nag teitan inineiv Yowbad.

12 Asibabaw bo ipiyaves inaked, ininounas ked kalbaleb waseg;

Nag anmwa̱net gamag ansinap bwanabwein, nag.

13 Asilivan kalbaleb, wudous ma̱wana alawag,

Wudous waseg ikatidavidavs.

Mwatet napwa̱tuw yayanen wawudous nises.

14 Wudous bo ika̱lawt bwa̱lat son sinap yayan.

15 Bo iseiw nuwes anwaway gamag.

16 Ininounas, igugweileks youd babaw.

17 Niwal inaked nag ikakins.

18 Nag bikakins Yowbad; nag bigoulus, nag.”

19 Bukitab anilivan towen silma̱nin tasiyas wanuwan Moses nakaleiwag, va̱gan Yowbad bibob adilivans, o ven babaw ya̱kids mo bitakakins adsinaps kalbaleb.

20 Nag kadilokeid bitakanow Moses nakaleiwag va̱gan bitasesuna wamatan Yowbad tadidumwal ya̱kid, nag. Kaleiwag towen bikatimlakeid mo takakin adsinap kalbaleb.

Tasimounids waseg Yeisuw mo ivag adsinaps didumwal

21 Tut towen takakins didumwa̱lun Yowbad inaked kweitan. Moses nakaleiwag nag ma̱wana ked towen, nag; tage liva̱nen ked towen nises Moses nakaleiwag waseg, o tasiyas palopit sikalelel waseg.

22 Ked towen, bitasimounid waseg Yeisuw Kelis, mo Yowbad bisekeid didumwal tonen. Gamag babaw ya̱kids idakeds katanok-wan.

23 Babaw ya̱kids adsinaps kalbaleb; Yowbad nakamnat bo ilisaweids.

24 Nasiwa̱youb mo ikatinabweids Yeisuw Kelis waseg, mo tamlavags tadidumwals ya̱kids.

25 Yowbad bo itam Yeisuw mamagina lun bulukwan buya̱vin biwid adsinaps kalbaleb, magat bitasimounids waseg. Lun towen waseg, Yowbad ikamtilakeids ansinap didumwal, peinan bo ikaltuwen adsinap kweiboug kalbaleb.

26 Bo ikapatul wasigeis ya̱kids mo takakins ansinap didumwal, tut towen ikidumwa̱luds ansinap didumwal waseg, peinan tasimounids waseg Yeisuw.

27 Tabta bitakaypamwes adsinaps waseg? Adok nag. Aveiyag wawun? Adsinaps waseg nag bitamlavags tadidumwals; misinaka bitasimounids waseg Yeisuw mo bitamlavags tadidumwals ya̱kids.

28 Mapuna takakins misinaka bitasimounids waseg Yeisuw mo bitamlavags tadidumwals; sinapun Moses nakaleiwag waseg nag aveiyag bitaba̱nes.

29 Tabta Yowbad misinaka min-Yudiy daYowbads? o adok vena babaw siYowbad? Mounid vena babaw siYowbad.

30 Magen, Yowbad anmwa̱net, mapuna bikidumwa̱luds min-Yudiy ya̱kids peinan tasimounids Yeisuw waseg, o bikidumwa̱lus vena babaw gimgilis peinan isimounids Yeisuw waseg.

31 Tabta bitasimounid waseg Yeisuw mo bitagulekwes Moses nakaleiwag? Nag. Bitakatimweisis mo bitawtoun.

<- Lom 2 Lom 4 ->