Matiw 5

Yeisuw igeiguy wa̱koy

1-2 Yeisuw ikin gamag singay babaw, ikatulag, in wa̱koy, isin, inavamul inekes, mo isilamaw nageiguy, ikatimlakes mamagina:

Tasiyas tamumwa̱saws

(Luk 6:20-23)

3 “Yakamiy waninoumiy kulansa, ‘Nag aveiyag bwanabwein nises wakululuwem,’ bweina kumwa̱saws, peinan bukusiws Yowbad wanakaleiwag.

4 “Kumwa̱saws yakamiy tavva̱lams, Yowbad bilabeimiy mo beitout ninoumiy.

5 “Kumwa̱saws yakamiy tamma̱nums, igaw Yowbad mo bisekeimiy youda babaw.

6 “Kumwa̱saws yakamiy magat biseiw nuwamiy sinap didumwal silma̱nin, igaw mo bivakaein wasigeis yakamiy.

7 “Kumwa̱saws yakamiy bukusiwyoubus tasiyas abes igeg, Yowbad mo bisiwyoubumiy yakamiy.

8 “Kumwa̱saws yakamiy tatoukums, igaw mo bukukines Yowbad.

9 “Kumwa̱saws yakamiy bukulabes gamag va̱gan biyakousis sikameiliw sisiyas, igaw Yowbad bilivan, ‘Nitug yakamiy.’

10 “Kumwa̱saws yakamiy, kukin gamag bikamliweimiy peinan amisinap didumwal, bukusiws Yowbad nakaleiwag wanuwan yakamiy.

11-12 “Kumwa̱saws magat gamag bitawyageimiy, bikamliweimiy, o peinan gungamag yakamiy, siyaweid avakaein bivtokeimiy livan; bweina kumwa̱saws avakaein, maysamiy bwanabwein igaw mo bukulivatus walba̱lab. Ma̱wan magin gamag nikamliwes tasiyas palopits kweiboug. Yakamiy bo ma̱wan bikamliweimiy.

Liva̱nen sol yayan o liva̱nen kamnat

(Mak 9:50; Luk 14:34-35)

13 “Yakamiy mamagina sol silma̱nin ven babaw sabal-nen yakamiy. Kukin sol sabal-nen bigeg, ta-ma̱wan bitavkek bisabal vayuwein. Peinan bo igeg, misinaka bitalev bein watoulan, gamag mo bivva̱nis.

14 “Yakamiy vena babaw sikamnat yakamiy. Magat wunovek ven bibunis koy wakunuwatan, makava kimna̱yawl ven towen. Ma̱wan magin gamag babaw bikines mikamnat yakamiy.

15 “Lamp nigidaged, awoum takow loutan takatugibliken kunuwatan tage tasen wateibol mo bimteil bunatum, nakamnat kadilok bunatum.

16 “Ma̱wan magin yakamiy kummiteilis gamag babaw va̱gan bikines miwotet bwanabwein, mo biyakawanes Tamads nises wanakaew.

Kaleiwag liva̱nen

17 “Awoum kudokeigs yey nam tagulekwein Moses nakaleiwag o tasiyas palopit sikaleiwag, awoum. Yey nam va̱gan bakatimweis sikaleiwag, bivakaein.

18 “Mounid adibakeimiy, nag kweitan sikaleiwag beikous tut towen waseg. Tut towen ven watinow son liba̱lab nisesus. Ma̱wan magin tasiyas Moses siney palopits sikaleiwag bisesus ee... igaw mo bikamat anagin.

19 “Kavel yak bukulivan, ‘Kaleiwag towen kakit, bweina tanumlaves talavewas,’ yak singay bukubus Yowbad nakaleiwag waseg. Tage bukwanow kaleiwag tasiyas, bukwatimlakes gamag, igaw mo bukumwen Yowbad nakaleiwag waseg.

20 “Taninuways tasiyas takatimlakeins kaleiwag sisiyas tasiyas Palisiy, gamag babaw idokes asisinap bwein. Tage yakamiy amisinap bwanabwein bivakaein; waseg kwalsawes tasiyas. Kukin gog nag, tama̱wan bukusiws Yowbad wanakaleiwag.

Kameiliw liva̱nen

21 “Kukwakins tammwayas sikaleiwag kweiboug mamagina:

‘Awoum kuweiy gamag.

Kukin bukkwatimet gamag, takalleiwags mo biyateleims yak.’

22 Tage yey gunakaleiwag mamagina:

‘Kukin yak bukkwamliw soum, takalleiwags mo biyateleims yak.

Kukin bukuyeg soum, tasiyas takaleiwag kawka̱veks wasigeis mo biyateleims yak.

Kukin go bukuyeg avakaein, adok Yowbad bilaveim bukun wadiginasim, kov bigabum yak.’

23-24 “Kukin aveiyag bukukow va̱gan bukulun Yowbad waseg mo kunuw kavel nanon igeg waseg yak, bweina kusem mulun abeilun wadadan, kunoun, kun, kulun gamag towen waseg; beikous, mo kuyum kum, kulun Yowbad waseg.

25 “Kukin kavel soum biyateleim, kadiloka wa̱ked kulun amiteiy; kukin gog nag, adok soum towen bitokeim takaleiwag to gabman waseg, gabman mo bidibek plisman, bitokeim binaweim wa̱deil.

26 “Mounid adibakeimiy, bukusesus wa̱deil ee... bukupa̱yin soum beikous, mo bispuyeim bukun wamnat. Kukin gog nag, bukusesun-wan wa̱deil.

Liva̱nen kaninavay mav

27 “Kukwakins tammwayas sikaleiwag mamagina:

‘Awoum kwanavay mav.’

28 Tage yey gunakaleiwag mamagina:

‘Kavel yak bukumet vin, wananoum kid bo kukwanavay soum mana̱wen vin. Amsinap towen igeg.’

29 “Kukin gog matam wamkwa̱tay bikaleiwag mo bukukwalouw, kadiloka kugut kulev bein tana̱ban. Bweina kuyamkwen matam palatanok; mata ge tamkwa̱lan mo son woum bigob wadiginasim.

30 “Kukin mukwa̱tay bikaleiwag va̱gan bukukwalouw, kuboub, kulev bein tana̱ban. Bweina palatanok namam; mata ge bukuyamkwen woum sona tamkwa̱lan wadiginasim.

Liva̱nen peiyaw vinay

(Matiw 19:9; Mak 10:11-12; Luk 16:18)

31 “Kukwakins kaleiwag kweitan mamagina:

‘Kukin kal yak bukupiyev mukwav, kusek inalet mo kwayeb binoun.’

32 Tage yey gunakaleiwag mamagina:

‘Kukin kal yak, nag bukutanid, tage bukupiyev mukwav, mo kuva̱ges tasiyas bikaninavays mav son namwan teivaw.’

Liva̱nen tabudabod

33 “Kukwakins tammwayas kweitan sikaleiwag kweiboug mamagina:

‘Awoum kutabudabod mav. Bukutabudabod, bweina kuvag ma̱wan, daGuyaws silma̱nin.’

34-36 Tage yey gunakaleiwag mamagina:

‘Awoum kutatabdabod, misinaka amlivan mounid kusek.

Awoum kutabudabod liba̱lab waseg, peinan Yowbad a̱ban.

Awoum kutabudabod ven watinow waseg, peinan Yowbad nakabva̱wot kaken.

Awoum kutabudabod Yelusalem waseg, peinan daGuyaws inaven.

Awoum kutabudabod kunum waseg, peinan ta-ma̱wan bukuvkek bipwapwa̱kaw o bigunugoun walitanok kunum, nag.’

37 Kukin bukutam, misinaka kulivan, kulana, ‘E!’; o kukin bukupiyev misinaka kulivan, kulana, ‘Nag.’ Peinan tabudabod babaw meinoy neim Seitan waseg.

Awoum kwatimapus sinap kalbaleb

(Luk 6:29-30)

38 “Kukwakins tammwayas sikaleiwag mamagina:

‘Soum matan nukuweiy inalug matam yak beiweiy.

Soum kudun nukwatimoun, inalug kudum bikatimoun.’

39-41 Tage yey gunakaleiwag mamagina:

‘Awoum kwatimop soum peinan ansinap kalbaleb.

Kukin binep silapam wamkwa̱tay, bweina kutouvin binep paliyuwein silapam.

Kukin soum biyateleim bikow amukweim, bweina kusek-vak musag.

Kukin soum bikaleiwag, bilana, “Kwanag kukow katanok veit,” bweina kutam, mo kukow kwayuwein veit.’

42 Aveiyag soum bilivan, bweina kusek, o kukin soum binitoug, awoum kwayus.

Kusiwyoubus tasiyas astakameiliws yakamiy

(Luk 6:27-28, 32-36)

43 “Kukwakins tammwayas sikaleiwag mamagina:

‘Kusiwyoubus taliwom, kwamliwes gog tasiyas nikamliweims yak.’

44-45 Tage yey gunakaleiwag mamagina:

‘Kusiwyoubus tasiyas nikamliweimiy; kunitougs Yowbad waseg va̱gan kid bilabes tasiyas iyagageimiy.’

Bo ma̱wan bukumlavags Tamads nitun yakamiy, peinan mtowen wanakaew nilabes takalba̱lebs sisiyas toubweins, ka̱las ivag ikal yam katanok katanok wasigeis, o kweis isekes asibabaw-wan.

46 “Kukin bukuyamanes siwa̱youb wasigeis tasiyas nisiwyoubumiy, adok nag kweitan la̱lan bukuba̱nes, kulatanes gog simiyas tasiyas takaweins ta̱kis; peinan tasiyas iyamanes siwa̱youb wasigeis tasiyas nisiwyoubus. Ma̱wana tasiyas, ma̱wana yakamiy.

47 “Kukin misinaka simiyas tawlimiyas bukumulouls, amisinap nag bitawtoun, peinan tobwag ven gimgilis asisinap ma̱wan.

48 “Kadiloka bukuyakousis sinap bwanabwein, ma̱wan magin ansinap mtowen Tamads wanakaew.

<- Matiw 4 Matiw 6 ->