Link to home pageLanguagesLink to all Bible versions on this site
2
Yowbad nakatuneib
1 Kadiloka bitaliganes bwein livan towen nisekeids. Awoum ge biyatuwen beikous.

2 Kweiboug Yowbad nataka̱yobs tasiyas asilivan mounid, o gamag mwasanin isiplaves ages bo imop asisinap kalbaleb.

3-4 Ya̱kids ma̱wan. Bitapiyaves Yowbad nakatuneib bwanabwein, mo singay bimop adsinaps kalbaleb. Nag binok nuwan ya̱kids, nag.

DaGuyaws wanmugwana nikamtel nakatuneib towen. Tasiyas niliganes aygan wankuyeim mo ikatimlakeids ya̱kids.
Yowbad-vak ikatimlakeids sinap towen mounid, peinan naman mulin nivag, singaya tawtoun nawotet kweitan kweitan; o peinan Kululuwan Towen Bwanabwein bo ilabeids, isekeids adsinaps kweitan kweitan, sivinan ma̱wana nanon towen.
Adtamumugs
5 Ven towen nitalivan igaw bitaban, Yowbad nag isekes min-liba̱lab sikaleiwag va̱gan bikaliwages ven towen, nag.

6 Bo isek Natun nakaleiwag towen. Liva̱nen gamag Bukitab waseg mamagina:

“E Yowbad, adok nag bukunuway gamag,
o adok nag bukumtakavet gimgilitoun towen.
7 Mukwaleiwag waseg, mo ibus gamag towen tut kayakus,
Min-liba̱lab wanakaew, towen watinow,
Mo kusek nakaleiwag avakaein son yakawanan avakaein,
8 E, bo ikaleiwag wasigeis youd babaw.”
Bo isek gamag nakaleiwag wasigeis youd babaw. Nag kweitan bika̱bwag. Tut gog towen nag bitakaliwages youd babaw. Igaw.

9 Tage takines Yeisuw tut kayakus ibus im watinow, min-liba̱lab wanakaew. Mo ikow nakaleiwag avakaein son yakawanan avakaein, peinan moumouvit ilivet, waseg imat, isimkwen kanig mouvitan peinads ya̱kids. E, Yowbad nasiwa̱youb ma̱wan.

10 Towen bo ibun youd babaw silma̱nin nawotet tatonen. E, sivinan babaw nitun beisiws mititeilin waseg. Kadilok-wan adtamumugs bilivet moumouvit va̱gan bikatinabweids, va̱gan biyakous ansinap bwanabwein meivek-wan. Yowbad nakaleiwag ma̱wan.

11-12 Adtamumugs bo iva̱geids adsinaps ibwein, Towen inakabsilamaw Yowbad. Ya̱kids-vak dakabsilamaws Yowbad. Mapuna idokeids budan ya̱kids. Nag ivag anmwasin wasigeis ya̱kids, peinan idibek Yowbad, ilivan mamagina:

“Bageiguy wasigeis budag; yagam yak waseg.
Mugwamag babaw bikatuyouns bimeis, bisiwunigs;
yey wanuwein mo bakavasim.”

13 Anilivan kwayuwein:

“Basimounid waseg towen.”
Kwatounun:
“Yey-aya sigwey budag tasiyas Yowbad nisekeig.”

14 Yeisuw budan ya̱kids, peinan bo imlavag ma̱wana ya̱kids, won waseg, son buya̱vin, ma̱wana ya̱kids, va̱gan bikanig mo bigulek Seitan. E, Seitan son inakaleiwag bo igulek-vak. Seitan nakaleiwag silma̱nin kanig bo ikous.

15 Peinan bo tawenes kanig, mamagina iyawanids tasesus bweilim babaw, mo ilikuds, ikatinabweids.

16 Nag ikatinabwes min-liba̱lab, nag.

“Bilabeids, Ebelam delen ya̱kids.”

17 Kadiloka bimlavag gamag ma̱wana budan ya̱kids, mo imlavag tanuwgwes-lun sitovek, inok nuwan ya̱kids, o itoukum waseg Yowbad nawotet, mamagina iluns son Yowbad o iwid adsinaps kalbaleb, mo Yowbad ikalin nuwan ya̱kids.

18 Ven watinow Yeisuw a̱ban igeg, Seitan iyakwen, bo nag; mapuna ikadilok bilabeids ya̱kids, avei-tut Seitan biyakwaneids.

<- Min-Ibliw 1Min-Ibliw 3 ->