1 Nétʉts nꞌijxy ja Borreeguꞌunk ko dyajjʉnáky myʉtuꞌukpʉ seyʉ ma̱ ja jʉxtujkpʉ. Es nmʉdoogajxyʉts niduꞌugʉ nima̱jtáxkpʉ jikyꞌa̱jtpʉty, es jantsy mʉk kyajxy, éxtʉm ja anaa ñekyʉn:

—¡Min!

2 Nétʉts nꞌijxy tuꞌugʉ poop kwa̱a̱y, es diꞌibʉ tyukꞌuñaapy tmʉdaty tuꞌugʉ tiꞌpxn, es tpʉjtákʉdʉ tuꞌugʉ koronʉ. Ta oj pyʉdsemy éxtʉm diꞌibʉ madakp es myada̱ꞌa̱ga̱ꞌa̱ñ.

3 Ko ja Borreeguꞌunk dyajjʉnajky ja myʉmajtskpʉ seyʉ, nmʉdoogajxyʉts ja myʉmajtskpʉ jikyꞌa̱jtpʉ kyajxy:

—¡Min!

4 Es pyʉdseemy tuꞌugʉ tsapts kwa̱a̱y. Es diꞌibʉ tyukꞌuñaapy yajmooy ja kutujkʉn es yajtsiptʉ́kʉt ma̱ tʉgekyʉ naxwíñʉdʉ, es ja ja̱ꞌa̱yʉty ñayyaꞌoogʉdʉt nixim niyam. Es yajmooy tuꞌugʉ mʉj espa̱a̱dʉ.

5 Ko ja Borreeguꞌunk dyajjʉnajky ja myʉdʉgʉʉkpʉ seyʉ, nmʉdoogajxyʉts ja myʉdʉgʉʉkpʉ jikyꞌa̱jtpʉ jyʉnaꞌañ:

—¡Min!

Nétʉts nꞌijxy pyʉdsemy tuꞌugʉ yʉk kwa̱a̱y. Es diꞌibʉ tyukꞌuñaapy, yʉꞌʉ myʉda̱jtypy tuꞌugʉ balanzʉ. 6 Es nmʉdooyʉts kyajxy kujkꞌa̱a̱y ma̱ ja nima̱jtáxkpʉ jikyꞌa̱jtpʉ, es jyʉnaꞌañ:

—Jeꞌeyʉ tuk kilʉ triigʉ xyákʉt tuk xʉʉ nidún, es tʉgʉk kilʉ seba̱a̱dʉ xyákʉt tuk xʉʉ nidún, per ni jeꞌeyʉ xykyatónʉt yʉ aseytʉ oliivʉ es ni yʉ vinʉ.

7 Ko yʉ Borreeguꞌunk dyajjʉnajky ja myʉma̱jtáxkpʉ seyʉ, nmʉdoogajxyʉts ja myʉma̱jtáxkpʉ jikyꞌa̱jtpʉ jyʉnaꞌañ:

—¡Min!

8 Nétʉts nꞌijxy tuꞌugʉ bayʉ kwa̱a̱y. Es diꞌibʉ tyukꞌuñaapy, jaꞌa txʉꞌaty Oꞌkʉn. Es ʉxꞌa̱a̱y pyamíñʉty ja diꞌibʉ ñiwindsʉnꞌa̱jtypy ma̱ ja oꞌkpʉtʉjk. Yajmooydyʉ ja kutujkʉn es dyaꞌooktʉt tuk peky ja diꞌibʉ wa̱ꞌxp taxk peky ja naxwíñʉdʉ ja̱ꞌa̱y, dyaꞌoogʉt mʉt ja espa̱a̱dʉ, yuu, pa̱ꞌa̱m esʉ awa̱ꞌa̱n jʉyujkʉty.

9 Ko ja Borreeguꞌunk dyajjʉnajky ja myʉmʉgoxkpʉ seyʉ, nꞌijxyʉts artal patkʉꞌʉy ja ꞌyanmʉja̱ꞌa̱nʉty ja ja̱ꞌa̱yʉty diꞌibʉ naty tʉ ꞌyooktʉ mʉt yʉꞌʉgyʉjxm ja Diosʉ ꞌyayuk diꞌibʉ naty yʉꞌʉjʉty tʉ tka̱jxwa̱ꞌxtʉ. 10 Tya̱a̱dʉ kya̱jxtʉ jantsy mʉk:

—Nindsʉnꞌa̱jtʉm Dios, mij sitʉy mmʉda̱jtypy tʉgekyʉ kutujkʉn. Mjantsywya̱ꞌa̱dsʉty es mdʉyꞌa̱jtʉnmʉʉdʉty. ¿Extʉ na̱ꞌa̱nʉm xypyayoꞌoyaꞌañ es xytyukkumʉdowa̱ꞌa̱ñ ja naxwíñʉdʉ ja̱ꞌa̱yʉty mʉt kots tʉ xyaꞌooktʉ?

11 Net yajmooydyʉ niduꞌuk niduꞌuk pyoop wit, es tyukꞌanaꞌamʉdʉ:

—Awixtʉ mʉt ja maꞌxtujkʉn jawaandiꞌknʉ. Nandʉꞌʉn éxtʉm miidsʉty oj mꞌooktʉ, tʉʉ dʉn tyimpatypy ma̱ dʉn ꞌyooga̱ꞌa̱ndʉ ja mmʉguꞌuk diꞌibʉts ʉj nandʉꞌʉn nja̱ꞌa̱yꞌa̱jttʉp. Yʉꞌʉ yajka̱ꞌpxaampy ja jyamyʉʉt diꞌibáty oogándʉp mʉt kots xymyʉdúñ.

12 Ko ja Borreeguꞌunk dyajjʉnajky ja myʉdʉdujkpʉ seyʉ, nétʉts nꞌixy ko myiiñ ja tʉgoymyʉk ujx, ja xʉʉ yʉkʉdyaay éxtʉmʉ yʉk wit, yʉ poꞌo jyʉmbijtta̱a̱y tsapts, dʉꞌʉn éxtʉmʉ neꞌpyñ, 13 esʉ mʉdsa̱ꞌa̱ kyaꞌay naxkʉjxy éxtʉm ja iigʉ tʉʉmp kyaꞌay ma̱ ja kyepy ko myiñ ja mʉk poj. 14 Dʉꞌʉn ja tsa̱jp yaꞌijxtʉgooy éxtʉmʉ neky ko yaꞌꞌaxa̱a̱tsy. Tʉgekyʉ tun kópkʉty esʉ naxwíñʉdʉ diꞌibʉ jikymyejyñóty yajwijtsxijtta̱a̱ydyʉ. 15 Net yʉ naxwíñʉdʉ ja̱ꞌa̱yʉty ja ryey ñayyuꞌtsʉdʉ a̱a̱ngóty es mʉj kaadsóty, tiꞌigyʉ mʉt ja mʉkja̱ꞌa̱ydyʉjk, solda̱a̱dʉ wyindsʉ́nʉty, yajkutujkpʉty, yajmʉduumbʉty esʉ mʉduumbʉty, 16 es tꞌanʉʉmʉdʉ ja tun kopk esʉ kaats:

—Nijijtpajtkʉts ʉʉdsʉty es yuꞌtskʉts kʉdiibʉts xꞌíxʉt ja diꞌibʉ uñaapy uñaaybyajngʉjxm, es kʉdiibʉts xypya̱a̱dʉt ja mʉk tʉydyuꞌunʉn diꞌibʉ yakaampy ja Borreeguꞌunk, 17 jaꞌa ko tʉ net jyaꞌty ja mʉj xʉʉ ma̱ ja tʉydyuꞌunʉn ꞌyita̱ꞌa̱ñ, ¿es pʉ́n mba̱a̱t tmʉmadaꞌaky?

<- DIꞌIBɄ JATANɄP 5DIꞌIBɄ JATANɄP 7 ->