Ma̱ tadʉ ka̱jpn, Dios esʉ Borreeguꞌunk yajkutuka̱ꞌa̱ndʉ, esʉ myʉduumbʉty ꞌyawdata̱ꞌa̱nʉdʉ, 4 es ꞌyíxtʉp ja Dios ja wyiin jyʉjp, es tmʉdáttʉt ja Diosʉ xyʉʉ ma̱ wyimbok. 5 Jap kyaj kyoodsʉyaꞌañ. Es diꞌibáty ijttʉp jap, kyaj ttsóktʉt ni ja lyamprʉ es ni yʉ xʉʉ ñijá̱jʉdʉt, mʉt ko yʉ Nindsʉnꞌa̱jtʉm Dios kudʉꞌxánʉp, es yajkutúktʉt winʉ xʉʉ winʉ tiempʉ.

6 Nétʉdsʉ anklʉs xyꞌanma̱a̱y:

—Tya̱dʉ ayuk, tʉyꞌa̱jtʉnʉꞌʉ es mba̱a̱t xymyʉbʉktʉ. Pa̱a̱dyʉ Nindsʉnꞌa̱jtʉm Dios diꞌibʉ wyinma̱ꞌa̱ñmyeepy ja kyuga̱jxpʉty, yʉꞌʉ tʉ tkexy ja ꞌyanklʉs es yajtukꞌixa̱ꞌa̱ndʉ ja myʉduumbʉty diꞌibʉ tsojk tunán jatánʉp.

7 Dʉꞌʉn ja Jesukristʉ jyʉnaꞌañ:

—¡Mʉdooꞌíttʉ! ¡Tsojkʉts nmina̱ꞌa̱ñ!

¡Jotkujk diꞌibáty pyaduundʉp ja nꞌʉxpʉjkʉnʉts diꞌibʉ ijtp kʉxja̱ꞌa̱y ma̱ tya̱dʉ neky!

8 Ʉj Fwank. Nꞌijx nmʉdoots tʉgekyʉ tya̱a̱dʉ. Es kots nꞌijxta̱a̱y nmʉdooda̱a̱y, taats nnaygyoxtʉna̱a̱ydyákʉ anklʉs tyekyꞌʉjxy diꞌibʉdsʉ naty tʉ xytyukꞌixy, es njaꞌꞌawdatáñʉts. 9 Per yʉꞌʉts xyꞌanma̱a̱y:

—Kátʉts xyꞌawdaty. Nmʉdiimbyʉts ja Dios, éxtʉm mij, es éxtʉmʉ mmʉguꞌugʉty diꞌibʉ Dios ja ꞌyayuk kya̱jxwa̱ꞌxʉdʉp, es nidʉgekyʉ diꞌibáty pyaduundʉp ja Diosʉ ꞌyʉxpʉjkʉn diꞌibʉ ijtp kʉxja̱ꞌa̱y ma̱ tya̱dʉ neky. ¡Awdat ja Dios!

10 Es ja anklʉs xyꞌakꞌanma̱a̱yʉts:

—Ka̱jxwa̱ꞌx yajxónʉ tya̱dʉ Diosʉ ꞌyʉxpʉjkʉn. Katʉ xykyuyuꞌutsy, mʉt ko tʉ dʉn tyimpatypy ja tiempʉ ma̱ yajkuydyuna̱ꞌa̱ñ. 11 Pʉ́nʉty axʉʉk adʉ́tstʉp, waꞌanʉ dʉꞌʉn tꞌaktimtuunꞌadʉꞌʉtstʉ; es pʉ́nʉty pyanʉjxtʉp ja kaꞌoybyʉ winma̱ꞌa̱ñ, waꞌanʉ dʉꞌʉn tꞌaktimpanʉjxꞌadʉꞌʉtstʉ; es pʉ́nʉty pyanʉjxtʉp ja tʉyꞌa̱jtʉn, waꞌanʉ dʉꞌʉn tꞌaktimpanʉjxꞌadʉꞌʉtstʉ; es pʉ́nʉty kyuydyuundʉp ja Diosʉ wyinma̱ꞌa̱ñ, waꞌanʉ dʉꞌʉn tꞌaktimkuydyuunꞌadʉꞌʉtstʉ.

12 Dʉꞌʉnʉ Jesukristʉ jyʉnaꞌañ:

—¡Tsojkʉts nmina̱ꞌa̱ñ! Es kots nmínʉt, nmoꞌoyaꞌañʉts niduꞌuk niduꞌuk éxtʉm pyaadyʉty wiꞌixáty tʉ jyikyꞌattʉ. 13 Ʉjtsʉ dʉꞌʉn éxtʉm ja A es éxtʉmʉ Z, ʉjtsʉ dʉꞌʉn ja jawyiimbʉ es ja tim okpʉ. Ʉjtsʉ dʉꞌʉn diꞌibʉ tʉgekyʉ yajtsondák, es ʉjtsʉ dʉꞌʉn nandʉꞌʉn diꞌibʉ yaꞌꞌabatʉdyaapy. 14 Jotkujkʉdyʉ taadʉty diꞌibáty tʉ tpujtʉ yajxónʉ wyit, jaꞌa njʉna̱ꞌa̱nʉm diꞌibʉ tʉ jyodʉmbittʉ es tʉ tmastuꞌuttʉ ja pyojpʉ. Yʉꞌʉdyʉ dʉn jeꞌeyʉ pátʉdʉp tyʉ́kʉt ma̱ tadʉ ka̱jpn es tjʉꞌxʉt ja ujts tʉʉmp diꞌibʉ yajkypy ja jikyꞌa̱jtʉn winʉ xʉʉ winʉ tiempʉ. 15 Mʉt ko ni na̱ꞌa̱ mba̱a̱t kyatʉ́kʉdʉ jap diꞌibʉ myʉda̱jttʉp ja axʉk winma̱ꞌa̱ñ, yʉ brújʉty, mʉꞌinduumbʉty, yajja̱ꞌa̱yꞌoꞌkpʉty, yʉ diꞌibʉ ꞌyawda̱jttʉp diꞌibʉ kyaj Dyiósʉty, es diꞌibáty tsyojktʉp tyuundʉp ja andakʉn.

16 ’Ʉj Jesús, tʉts ngexy ja nꞌanklʉs es tꞌawánʉt nidʉgekyʉ ja mʉbʉjkpʉtʉjk ma̱ ñaymyúkʉdʉ. Ʉjtsʉ dʉꞌʉn ja Davitʉ tyʉʉmp ꞌya̱a̱ts, es ʉjtsʉ dʉꞌʉn éxtʉmʉ jayxyʉʉ diꞌibʉ móñʉm pʉdsʉʉmp.

17 Yʉ Espíritʉ Santʉ esʉ Borreeguꞌungʉ ñʉdoꞌoxy, jaꞌa njʉna̱ꞌa̱nʉm ja ja̱ꞌa̱y diꞌibʉ myʉbʉjktʉp ja Jesukristʉ, jaꞌa jʉnándʉp:

—¡Min!

Es diꞌibʉ myʉmʉdeepy, waꞌan nandʉꞌʉn tjʉna̱ꞌa̱ñ:

—¡Min!

Es diꞌibáty tʉ́tsʉdʉp, waꞌan tmindʉ es tꞌaxá̱jʉdʉt nadʉꞌʉñʉ ja nʉʉ diꞌibʉ yajkypy ja jikyꞌa̱jtʉn winʉ xʉʉ winʉ tiempʉ.

18 Ʉj nꞌanmaabyʉts nidʉgekyʉ diꞌibáty myʉdooꞌijttʉp yʉ Diosʉ ꞌyayuk diꞌibʉ ijtp kʉxja̱ꞌa̱y ma̱ tya̱dʉ neky, pʉn ja pʉ́n tnikóñ yʉ tya̱a̱dʉ diꞌibʉ ijtp kʉxja̱ꞌa̱y, Dios nandʉꞌʉn nikoꞌonxʉdʉp ja ꞌyayoꞌon diꞌibʉ ijtp kʉxja̱ꞌa̱y ma̱ tya̱dʉ neky. 19 Es pʉn ja pʉ́n oynʉꞌʉnʉn tpuwitsy yʉ ayuk diꞌibʉ ijtp kʉxja̱ꞌa̱y ma̱ tya̱dʉ neky, Dios nandʉꞌʉn puwijtsxʉdʉp diꞌibʉ naty pátʉp tjʉꞌxʉt ja kepytyʉʉmp diꞌibʉ yajjikyꞌa̱jtp, es kyaj tyʉ́kʉt ma̱ ja Diosʉ kya̱jpn. Yʉ kepytyʉʉmp esʉ Diosʉ kya̱jpn kʉxja̱ꞌa̱y ꞌyity ma̱ tya̱dʉ neky.

20 Diꞌibʉ tya̱a̱dʉ ñigajxypy, dʉꞌʉn jyʉnaꞌañ:

—Tsojkʉts nmina̱ꞌa̱ñ.

Es nandʉꞌʉnʉts njʉna̱ꞌa̱ñ:

—Waꞌan dʉꞌʉnʉty. ¡Min, Nindsʉnꞌa̱jtʉm Jesús!

21 Waꞌanʉ Nindsʉnꞌa̱jtʉm Jesús tkunuꞌxtʉ nidʉgekyu ja Diosʉ jyaꞌayʉty.

<- DIꞌIBɄ JATANɄP 21