1 Mʉguꞌugítʉty, jaa may ja ja̱ꞌa̱y diꞌibʉ nayñiga̱jxʉdʉp ko yʉꞌʉ yaꞌʉxpʉktʉ es ko xytyuknimiꞌinʉm ja Diosʉ ꞌyayuk. Katʉ miits xymyʉbʉktʉ, jaꞌa ko taa may diꞌibʉ andáktʉp, jeꞌeyʉ xywyinꞌʉʉna̱ꞌa̱nʉm. Ixtʉ yajxónʉ tadʉ ꞌyʉxpʉjkʉn es net xymyʉbʉ́ktʉt pʉn tʉyꞌa̱jtʉn ko yʉꞌʉ Dios tjaꞌaꞌáty.

2 Dʉꞌʉn xyñijáwʉdʉt ko yʉꞌʉ Diosʉ Jya̱ꞌa̱jʉn tjaꞌaꞌáty: nidʉgekyʉ pʉ́nʉty jʉnándʉp ko yʉ Jesús yʉꞌʉdyʉ dʉꞌʉn ja Kristʉ, Diosʉ ꞌyUꞌunk diꞌibʉ miin ya̱ naxwiiñ éxtʉmʉ naxwíñʉdʉ ja̱ꞌa̱y, jaꞌa myʉda̱jttʉp ja Diosʉ Jya̱ꞌa̱jʉn. 3 Ja diꞌibʉ jʉna̱a̱mp ko Kristʉ kyaj dʉꞌʉn oj myiñ, kyaj ja Espíritʉ Santʉ tmʉdaty, jaꞌa taadʉ myʉdsipꞌa̱jtypy ja Kristʉ. Es tʉ xymyʉdowdʉ miidsʉty ko myina̱ꞌa̱ñ diꞌibʉ myʉdsipꞌa̱jtypy ja Kristʉ. Pes ta net ya̱ naxwiiñ.

4 Nitítʉty, miidsʉty Dios mjaꞌaꞌa̱jtʉdʉp. Tʉ xymyʉmada̱ꞌa̱ktʉ tadʉ andakpʉty, mʉt ko yʉ Espíritʉ Santʉ diꞌibʉ miidsʉty mʉʉt mꞌittʉ, niꞌigʉ yʉꞌʉ myʉ́jʉty es kʉdiinʉmʉ kaꞌoybyʉ diꞌibʉ ja ya̱ naxwiiñ. 5 Tadʉ andakpʉ yʉꞌʉ jaꞌaꞌa̱jtʉdʉp ja naxwíñʉdʉ winma̱ꞌa̱ñ, pa̱a̱ty tka̱jxwa̱ꞌxtʉ ja naxwíñʉdʉ winma̱ꞌa̱ñ, es myʉdooꞌijtʉdʉ ja ja̱ꞌa̱y diꞌibʉ naxwíñʉdʉ winma̱ꞌa̱ñ jaꞌaꞌa̱jtʉdʉp. 6 Per ʉdsa̱jtʉm Dios xyjaꞌaꞌa̱jtʉm. Diꞌibʉ Dios ꞌyijxyꞌajtypy, myʉdooꞌijtypy ja ayuk diꞌibʉ nga̱jxwa̱ꞌxʉm. Per diꞌibʉ kyaj Dios jyaꞌaꞌátyʉty, kyaj xymyʉdooꞌijtʉm. Es dʉꞌʉn mba̱a̱t nꞌʉxka̱jpʉm pʉ́n myʉda̱jtypy ja Espíritʉ Santʉ diꞌibʉ tʉyꞌa̱jtʉn yajkypy, es pʉ́n myʉda̱jtypy ja kaꞌoybyʉ diꞌibʉ winꞌʉꞌʉmp.

7 Mʉguꞌugítʉty, nꞌoknaydsyojkʉm nixim niyam, mʉt ko yʉ tadʉ tsojkʉn myiñ ma̱ Dios. Nidʉgekyʉ diꞌibʉ myʉda̱jttʉp ja tsojkʉn, yʉꞌʉ Dios uꞌunkꞌa̱jtʉdʉp, es ꞌyixyꞌa̱jttʉp ja Dios. 8 Diꞌibʉ kyaj tmʉdaty ja tsojkʉn, kyaj yʉꞌʉjʉty tꞌixyꞌattʉ Dios, mʉt ko Dios yʉꞌʉ dʉꞌʉn ja tsojkʉn. 9 Dios xytyukꞌijxʉm ja tsyojkʉn ʉdsa̱jtʉm ko tkejxy ja tyuꞌuk Uꞌunk ya̱ naxwiiñ es nmʉda̱jtʉm ja njikyꞌa̱jtʉnꞌa̱jtʉm mʉt yʉꞌʉgyʉjxmʉ ꞌyUꞌunk. 10 Kyaj ꞌyʉdsa̱jtʉmʉty jawyiin ndsojkʉm ja Dios, jawyiinꞌa̱jtp yʉꞌʉ oj xytsyojkʉm es xytyukꞌijxʉm mʉt ko xytyuknigajxʉm ja ꞌyUꞌunk es xyajpojpʉnitʉgoꞌoyʉm.

11 Mʉguꞌugítʉty, mʉt ko dʉꞌʉn ja Dios tʉ xytsyojkʉm, nandʉꞌʉn nnaydsyojkʉm nixim niyam. 12 Ni na̱ꞌa̱ pʉ́nʉ Dios tkaꞌixy. Per pʉn nnaydsyojkʉm nixim niyam, Dios ijtp ma̱ ʉdsa̱jtʉm es nmʉda̱jtʉm ja tsyojkʉn. 13 Es mʉt ko Dios tʉ xymyoꞌoyʉm yʉ Espíritʉ Santʉ, tʉ xytyukꞌijxʉm ko yʉꞌʉ ꞌyity mʉt ʉdsa̱jtʉm, es ʉdsa̱jtʉm nꞌijtʉm mʉt yʉꞌʉ. 14 Es tʉts nꞌíxyʉts kʉꞌʉm es nga̱jxteꞌxyʉts ko Dios Teety tkejxy ja ꞌyUꞌunk ya̱ naxwiiñ éxtʉmʉ Yajnitsókpʉ. 15 Oytyim pʉ́nʉty diꞌibʉ ꞌyijxkajpy ko Jesús yʉꞌʉ Dios ꞌyUꞌunkꞌátyʉty, jikyꞌa̱jtp mʉt ja Dios es ja Dios jyikyꞌaty mʉt yʉꞌʉ.

16 Es dʉꞌʉn nnija̱ꞌa̱m es nmʉbʉjkʉm ko Dios xytsyojkʉm. Dios yʉꞌʉ dʉꞌʉn ja tsojkʉn, es pʉn nnaydsyojkʉm nixim niyam, Dios jikyꞌa̱jtp mʉt ʉdsa̱jtʉm, es ʉdsa̱jtʉm njikyꞌa̱jtʉm mʉt ja Dios. 17 Es ko njikyꞌa̱jtʉm mʉt ja Dios, mʉj máyʉp es kexy kaꞌpxy ꞌyítʉt ja ndsojkʉnꞌa̱jtʉm es ndukmʉꞌawda̱jtʉm ko Dios xypyayoꞌoyʉm, jaꞌa ko nꞌijtʉm ya̱ naxwiiñ éxtʉmʉ Kristʉ. 18 Ma̱ jyámʉty ja tsojkʉn, kyaj jyámʉty ja tsʉꞌkʉn. Diꞌibʉ myʉda̱jtypy kexy kaꞌpxy ja tsojkʉn, yajkekypy ja tsʉꞌʉgʉ. Jaꞌa ko pʉn ndsʉꞌkʉm tii, njʉjptsʉꞌkʉm ko xytyukkumʉdowa̱ꞌa̱nʉm diꞌibʉ tʉ nduꞌundʉgoꞌoyʉm. Ko ti ndsʉꞌkʉm, kyaj kexy kaꞌpxy nmʉda̱jtʉm ja tsojkʉn.

19 Dios jawyiin xytsyojkʉm ʉdsa̱jtʉm. Pa̱a̱ty ʉdsa̱jtʉm ndsojkʉm ja Dios. 20 Pʉn ja pʉ́n jyʉnaꞌañ: “Ʉj ndsejpyʉts ja Dios”, es kyaj ttseky ja myʉguꞌuk, andakpʉ taadʉ. Pʉn diꞌibʉ kyaj ttseky ja myʉguꞌuk diꞌibʉ ya̱a̱ ꞌyijxypy, nan kyaj mba̱a̱t ttseky ja Dios diꞌibʉ kyaj tꞌixy. 21 Mʉt ko Dios tʉ xytyukꞌanaꞌamʉm ko diꞌibʉ tsyejpy ja Dios, nandʉꞌʉn ttsókʉt ja myʉguꞌuk.

<- 1 FWANK 31 FWANK 5 ->