5 Paty xꞌɨxma̱tstɨt tukɨꞌɨyɨ ja kaꞌøybɨ: kaꞌ pøn amajtskja̱a̱ꞌy tmøøtꞌa̱tt ja wenk ya̱a̱ꞌdyøjk uk ja wenk tøꞌøxyøjk, kaꞌap ja axøøk wɨnma̱a̱ꞌñ xyiktuꞌundɨt, jøts nayɨdeꞌen kaꞌ ti xꞌama̱ꞌa̱tꞌa̱ttɨt. Jadeꞌen yø tukɨꞌɨyɨ tpa̱a̱ty ku yø xuꞌundɨt ejxɨmdam jeexyɨp xwɨndsøꞌøgɨdɨ ja awa̱na̱x ja agojna̱x. 6 Yøꞌøgøjxp ja Dios tkexy ja ayoꞌon jøts ja ttuktagɨda̱ꞌa̱ky ja yjadeꞌembɨ ja̱a̱ꞌy pøn ja kamɨmadojɨyɨp; 7 jøts ku yꞌity kaꞌanɨm xjanchja̱ꞌwɨyɨdɨ ja Dios yjaꞌ, tukɨꞌɨyɨ meets yø yꞌity nayɨdeꞌen xuñ. 8 Ɨxya̱mts, ɨxma̱jtskøjxnɨdɨ yø kaꞌøybɨ, yø a̱mbøjkɨn, yø axøøk wɨnma̱a̱ꞌñ, yø kaꞌødyuꞌunɨn, yø nawyɨnga̱jpxna̱xɨ jøts yø kaꞌøyꞌayuujk. 9 Kidi mnawyɨnda̱a̱yꞌatyɨdɨ, pø tøxɨ xꞌɨxma̱tstɨ sa̱ yꞌijty mja̱a̱ꞌyꞌa̱ttɨ, ti jaty yꞌijty mdundɨp. 10 Tøts ja Dios myiktɨgachɨdɨ jøts ja yjembyɨ tø xpadøkɨdɨ, pønɨ sa̱ meets ja yjaꞌ xjanchja̱ꞌwɨyɨ, nayɨdeꞌents meets ja myiktɨgachɨ kunɨm yikxon xtyimñɨja̱wɨdɨt sa̱ ja Dios. 11 Jøts kaꞌ chøkyɨ wan pøn tgriegɨtja̱a̱ꞌyɨ uk tꞌisraelɨtja̱a̱ꞌyɨ, wan ja tꞌejxa̱ꞌa̱nɨnmøødɨdɨ uk tkaꞌejxa̱ꞌa̱nmøødɨdɨ, wan ja abiky ma̱ ttsoondɨ uk wan ja tjaꞌajɨdɨ pøn ja Dios tkanɨja̱ꞌwɨdɨpnɨm. Yjajaꞌajɨdɨ jaꞌ pøn tmɨdundɨp ja wɨndsøn, uk pøn najtspøkɨ ejttɨp, tum ja nwɨndsønꞌa̱jtɨm Jesucristo jaꞌ yjaꞌ, jøts myøøtꞌijtpy ja øy pøn.

12 Mdsojkɨp meets ja Dios, jaꞌagøjxp meets ja tø mwɨꞌijxyɨ jøts ja tø mjaꞌbikyɨdɨ. Tsøønɨdɨts yikxon. Yiktundɨ ja øyꞌa̱jtɨn amuum, ja ayoꞌejxɨn, ja jotwa̱ꞌa̱ñꞌa̱jtɨn, ja wɨndsøꞌjkɨn, ja wijyꞌa̱jtɨn jøts ja tuda̱ꞌa̱kyꞌa̱jtɨn. 13 Namyɨduda̱ꞌa̱kyꞌa̱tɨdɨ xem ya̱m jøts namyaaꞌkxukɨdɨ ku pøn ti ttuñ jøts ja myɨguꞌuk tpøkyꞌixy. Nayɨdeꞌen xuꞌundɨt sa̱m ja nwɨndsønꞌa̱jtɨm Jesucristo mbojkpɨmeeꞌkxyɨdɨ. 14 Kaꞌapts ti jadeꞌen sa̱m ja tsojkɨn sa̱m ja paꞌayoꞌowɨn, jaꞌats ɨdøꞌøn myiktuꞌundɨp, pø jaꞌaxɨ amuum tsojkɨp, jaꞌaxɨ øy ti tyikꞌøgyaxøꞌkp jøts nɨti jaduꞌuk jadeꞌen abiky kyatsøkyɨ. 15 Ja Diosts ja yjotkujkꞌa̱jtɨn, ja Diosts ja xyonda̱a̱jkɨn mwɨnma̱a̱ꞌnmyoꞌojɨdɨp, pø jaꞌagøjxpxɨ ja Dios tø mdukpabikyɨdɨ ja yjaꞌ jøts jaꞌabɨ jotkujkꞌa̱jtɨn xyiktuꞌundɨt nɨꞌamukɨ nɨwɨneꞌen ja Dios xjaꞌa̱jtyɨndɨ. Tukmøja̱wɨdɨts tukunuuꞌkxyja̱wɨdɨts ja Dios.

16 Jøts ja̱ꞌgyukɨyɨdɨ yikxon ja nwɨndsønꞌa̱jtɨm Jesucristo kyajpxy ja yꞌayuujk jøts ja xwɨnma̱a̱ꞌñꞌa̱ttɨt. Nadyukꞌɨxpøkɨdɨ jøts nagya̱jpxjotꞌamøjkɨyɨdɨ nɨxem nɨya̱m, ja wejɨn ja kajɨn myiktuꞌundɨp. Øøjɨdɨ ja Salmos, jøts øøjɨdɨ ja kunuuꞌkxkyajpxy jøts jadeꞌen xukmøja̱wɨdɨt xukunuuꞌkxyja̱wɨdɨt ja Dios. 17 Ku ti xunwa̱ꞌa̱ndɨ uk xka̱jpxwa̱ꞌa̱ndɨ, ja nwɨndsønꞌa̱jtɨm Jesús myøkꞌa̱jtɨn myikꞌawa̱jnɨdɨp, jøts jadeꞌenꞌampy ja xukmøja̱wɨdɨt xukunuuꞌkxyja̱wɨdɨt ja Dios Teety, jaꞌ myøkꞌa̱jtɨngøjxp.

18 Jøts ja tøꞌøxyøjk pøn amajtsktɨ, mɨmadowdɨ ja mnɨya̱a̱ꞌy, jadeꞌen pya̱a̱tꞌatyɨdɨ pøn tjanchja̱ꞌwɨdɨp ja nwɨndsønꞌa̱jtɨm. 19 Jøts nayɨdeꞌen ja ya̱a̱ꞌdyøjkmɨdɨ pøn amajtsktɨ, yikxon xjagyaptɨt ja mnɨdøꞌøxy. Kidi møøt atsep aꞌakɨ mdsøønɨdɨ. 20 Jøts uꞌnk una̱ꞌjkmɨdɨ, mɨmadowdɨ ejtp ja mdeety ja mda̱a̱k, jadeꞌen ja Dios ttsøky. 21 Jøts uꞌnkteety uꞌnkta̱a̱k nayɨdeꞌenmɨdɨ, kaꞌ nugo xyikꞌa̱mbøktɨt ja mꞌuna̱ꞌjk jøts kidi tꞌayojɨdɨ. 22 Jøts pøn mɨdundɨp, mɨmadowdɨ ja ja̱a̱ꞌy pøn mwɨndsønꞌa̱jtɨp, jøts kidi jaayɨ nugo nadyijyɨ myujyꞌa̱ttɨ ku ja mꞌijxyɨdɨ jøts ja jadeꞌen nugo mꞌøyja̱wɨyɨdɨt. Mduꞌundɨpxɨ døꞌøn sa̱m pya̱a̱tꞌatyɨ Dios wyɨndsøꞌjkɨngøjxp. 23 Yikxon xuꞌundɨt ku ti xunwa̱ꞌa̱ndɨ, ja Dios meets ja mdamɨdumpy jøts kidi ja ja̱a̱ꞌyɨp øy jaꞌ mjayiktuñɨdɨ. 24 Tøts xnɨja̱wɨdɨ jøts ku ja nwɨndsønꞌa̱jtɨm mmoꞌojɨdɨt ja øyꞌa̱jtɨn jøts meets ja mdukpa̱a̱dɨt ja kyunuuꞌkxɨn. Kumɨ Cristo meets ja yjaꞌ mduꞌunxɨp, nay jaꞌ meets ja køꞌøm mmoꞌojɨp. 25 Pønts ja kyaꞌøybɨ ttump, nayɨdeꞌents ja kaꞌøyꞌa̱jtɨn ja tikmoꞌodɨt. Kaꞌap ja Dios ja tꞌixy wan ja tjapønɨdɨ, tukna̱x ja tum jadeꞌen ttuꞌunt pønɨ sa̱ tø yja̱a̱ꞌyꞌa̱ttɨ.

<- COLOSENSES 2COLOSENSES 4 ->