1 Io a matailala tasa buo sele ei palea na langi. Matailala do ei maido, a tavine tasa ei kai a kinainai minei a oaso. Ma game ei ino matano na ubune ei, ma mataidoido savulu tasa timana lua sou ino na kele na letene ei. 2 Tavine do ei saaavu, ma davutina mina vasusualena bibaini ei paleasi ne ei, me ei somiale a davutina buo sele, maido me ei lalai vauta. 3 Ma matailala tasa sea ei palea na langi. A dregon buo kasososo ei ino. Ei isa a letena i padilua, ma siili savulu tasa sou ino na letene ei. Ma kele padilua sou ino na leteletene sou. 4 Iune ei i sasape sele a mataidoido makuba mina langi me ei lange sou utano na magamaga. Ei tomane sou soebule a mataidoido na abuna tolu, ma abuna mataidoido tasa ei pu vuso utano.
Io dregon odo ei magili na laguna tavine i kale ni vasusu, me ei magitali a tavine do i vasusialesi a bibaini, me ei ni busonge a mongomongo baini odo. 5 Ma tavine ei vasusiale a mongomongo a bibi, iede a bibaini Salemo ei vilealesi ni iteale sagali sou a abuna vanunua ma tavivine vuso a butu a ain. Tavine ei vasusiale a bibaini, io ma tabaa oto sou guale a bibaini uata, me sou maasi ei usino ne Salemo me na niugugu a mapana minei. 6 Ma tavine do ei iava usino na avena a vanua boa. Salemo ei masusuliosi a avena do ne sou iteale ei, me ei ni malu kuba i mapigogoi a malada savuluvulu tasa savulu sobo lua timana savulu pantasa (1,260).
7 Io seidolo a maubina taula ei ilisi na langi. Mikael pilu e sou a bineanea minei sou maubi ana dregon odo. Ma dregon pilu e sou a bineanea minei sou maliu a maubina ne sou, 8 moni sou ma mapigogoi ete ne sou vululusi a maubina. Maido me sou ma mapigogoi otosi ne sou guale a muina ne sou ugu lou na langi, 9 me sou a bineanea mine Salemo sou lange a dregon buo odo utano. Aliusu odo ei lisasi, me sou tole ei a mapana nunu pagu ue Satan, ei toegolali a vanunua ma tavivine vuso na magamaga. Sou lange ei utano na magamaga pilu a bineanea minei tamai.
10 Me na langi eau longe a baligoluna bibi tasa ei tola sagali maido,
“Seidei Salemo mine eitou ei gualeliuosi e eitou,
ma sagagalina ma niitealalena minei ei palea muadasi.
Me Bibi minei, sou tole e Krais, ei gualesi a nilongo ma sagagalina.
Vuna, bibi na niubina inade ei vavasa ane tamtamaine eitou na matane Salemo mine eitou na oaso me na lodo,
moni seidei sou a bineanea sou langesi ei utano.
11 Tamtamaine eitou sou guale a sagagalina maino na dalane Natuna Sipsip
ma inade mine sou so veipale i.
Me Satan ei kale ni valiputemate sou, moni sou ma mailengi ete a maulina mine sou.
Na inigogona do sou vululusi a maubina me sou taupui e Satan.
12 Maido me oo a langi me amutou vuso ino na langi, namutou mongemonge.
Moni oo a magamaga me oo a dasi, amulu tilale. A mavaana buo ni palea le amulu,
Vuna, Satan ei sivosi utano ne amutou, me ei sinoa mamau sele,
vuna ei muada ilala minei boto moni.”
13 Dregon odo ei iteilale maido sou langesi ei utano na magamaga, me ei veletole a tavine ei vasusiale a bibaini odo. 14 Moni sou bilii a velevelena loaaulu taula lua usino na tavine do, me ei mapigogoi ni lovo usino na aubu minei na magamaga a vanua boa, me ei ni bulago ana aliusu odo. Me na avena do ne sou iteale kube ei i asu mapigogoi a avala tolu ma maduna avala tasa. 15 Io aliusu odo ei luetase a nanu na asene ei, me a nanu odo ei palea tomane a nanu buo me ei kale a nanu do ni saltase a tavine do. 16 Moni a magamaga ei buloi a tavine do. Magamaga ei pee a asene ei mei busonge a nanu dregon ei luetase do. 17 Maido ma dregon ei sinoa mamau sele ana tavine do, mei asu ni maubi ane sou e natatuna sanii, iedo a vanunua ma tavivine sou ogomulimuli a binea mine Salemo, me sou veipale a inade mine Iesu me sou ogomuli. 18 Ma dregon odo ei asu magili na mado na dasi.
