1 Tamtamaigu, amutou ma tovetove lei ve namutou palea a bibi na matetengina, vuna ilala Salemo ei vilemuliale a inigogona mine sou, ei ni vilemuliale iiti lou a pipigona mine sou. 2 Eitou vuso eitou goligoli a sinusu. Moni mane a bibi tasa eili ei mapigogoi ni iteale kube a asena, io ei matuasi a itealekubena vovona vuso.

3 Eitou tau a maduna ain mina asena hos ne sou ogomuli a masagana mine eitou na inasu. Eitou iteale a asene sou, me na inigogona ieli eitou maivele kube a vovone sou vuso. 4 Amutou damutale a kuta tamai. Kuta ei a golu buo, ma avetale buo i palea mei valitase a kuta ni vele maisaba, moni a ginivi ei alabaini sele, me a inaunauna kuta ei kale ni asu usino na avena tasa, io ei ni sauvule a ginivi ma kuta ei ni vele usino na avena iva ei kale. 5 Tomane moni, a tabelena bibi ei alabaini moni, moni ei masalailai e ei me ei beilangelange a aisane ei oto. Eitou muada, oavi baini ei mapigogoi ni tununi a autauta vuso mei ni aani a obu vuso. 6 Ma tabelene eitou ei tomane moni a oavi. Ei a avena tasa moni mina avena vovone eitou vuso, moni ei mapale a matamatana inigogona pagu. Ei goli a vovona bibi vuso ei palea mumugu, me ei goli a inigogona pagu i palea na maulina mine eitou tomane a oavi. Oavi iedo ei a oavi maino na aubu na davutina.

7 Vanua sou tomamaliosi a matamatana viuviu masivo me sou a manumanu ma golugolu vuso sou salasala, ma golugolu vuso na dasi. 8 Moni a bibi ei ma mapigogoi ete ni iteale a tabelene ei oto. Taliuliu tabele ei goli a inade pagupagu. Ei tomane a bunu pagu ei vonu na tabelene eitou mina valiputena bibi.

9 Na tabelene eitou, eitou beilange a aisana Bibi Taula, ei e Tamane eitou. Moni na tabelene eitou, eitou goli a inade pagupagu ni toegegeli a vanunua ma tavivine Salemo ei mapale sou tomane ei oto. 10 Inade mina beilangena aisane Salemo ma inade pagu tamai sulu pilu palea na tabelene eitou tasa moni. Amutou tamtamaigu, amutou ma goligoli lei a matana inigogona maido. 11 A aopu na nanu tasa i ma mapigogoi ete ni mapale a nanu doa pilu a nanu masigalai. 12 Amutou tamtamaigu, nane a obu a fik i mapigogoi ni vuale a oliv, io? Nane a obu a vain i mapigogoi ni vuale a fik, io? Tomane moni, a dasi ei ma mapigogoi ete ni mapale a nanu doa.

13 Sei bibi balivua ne amutou ei isa a damutatalana doa ma muadana? Mane a matana bibi maido eili, de a inasu minei ei ni doana. Ei ni ma toevautauta lou me ei ni ma beilangelange lei a aisane ei oto. Ei ni ogomuli kube a inigogona mina damutatalana doa ma muadana, me sou a vanunua ne sou ite a inigogona doana ei goli. 14 Moni mane amutou lilogegelu sele ana vanunua sanii, me mane taliuliu amutou gemugemu a vea mina beilangena aisane amutou oto, io namutou ma masalailai lei a damutatalana doa ma muadana mine amutou ue namutou ma taupui lei a inade patotona. 15 Damutatalana ieli ei ma asu oto maino ne Salemo. Ei a golu mina magamaga moni ie. Ei palea maino na lilomumuguna ma nunu pagu mine Satan. 16 Longe. Sou a vanua so lilogegelu ana vanua sanii me taliuliu sou tilotilo a vea mina beilangena aisane sou oto, a vanua do sou ma ugu kubakuba oto me sou mailisilisi a mavaana ma matamatana inigogona pagu.

17 Moni sou a vanua sou guale a damutatalana doana maino ne Salemo sou goligoli a inigogona maido. Munugana, sou ogomulimuli a damutatalana maolo. Me maluanai, sou lilo tasa moni ane sou sanii, me sou lilomea ane sou, me sou longemuli a inade mine sou sanii. Sou lilomuli sele sou sanii me sou goli a inigogona doana usino ne sou. Sou ma vile ete a vanunua, me sou ma aualala oto ana vanunua ma tavivine. 18 Mane eitou ugu lilo tasa moni, iede ei tomane eitou dani a vuavua mina lilomeana. Me na lilomeana moni, a inigogona bilesi i palea na maulina mine eitou tomane a gona inani doana ei palea na mauma.

<- Iemus 2Iemus 4 ->