1 Malibuuna mina silimulina ei maido, golugolu vuso Salemo ei gatunasobesi ni bilii e eitou me eitou magitalitali a gualena, ede neitou guale ivu. Ma golugolu vuso matane eitou ma mapigogoi ete ni ite, moni na silimulina eitou muada golugolu vuso odo sou ino. 2 Na inigogona silimulina odo, lisa vanunua ma tavivine sou gualesi a aisa kuba maino ne Salemo.

3 Na silimulina moni eitou muadasi i, Salemo ei mapale a langi pilu a magamaga na inade minei oto. Maidolo ma golugolu vuso seidei eitou ite, ede Salemo ei mapale a golu eitou ma mapigogoi ete neitou ite.

4 Na silimulina moni Abel ei goli a niabi doana lou usino ne Salemo ane Kain. Salemo ei mongemonge a niabi mine Abel, moni ei ma kale ete a niabi mine Kain. Me Salemo ei vate Abel a bilesina bibi. Abel ei matesi, moni na silimulina minei iodo ei saboa eili ademuadada ane eitou.

5 Na silimulina moni Enok ei ma mate oto, mei asu uata na langi. A vanunua sou tilomulimuli e ei, moni sou ma ite ete ei, vuna Salemo ei gualesi e ei uata na langi. Laulau mine Salemo ei vei maido, ilala Salemo ei saboa guale e Enok uata, Salemo ei mongemonge sele e Enok. 6 Sei bibi ma silimuli ete Salemo, ei ma mapigogoi ete ni toe mongemonge Salemo. Vuna, bibi ei kale ni asu agavuale e Salemo, ei ni silimuli maido Salemo ei mauli, me Salemo ei bilii a mapa doana usino na vanunua sou tilomulimuli e ei.

7 Noa ei silimuli e Salemo, na ilala Salemo ei ademuada ane ei a golu ei ni palea mulimuli, a golu odo Noa i saboa ite, ei ogomuli a inade mine Salemo me ei tige a kuta tasa. Me ei pilu e susuna natatune ei sou gali ulilo na kuta do, maido me sou puiale moni, me sou ma mamau oto. Na silimulina minei iodo, Noa ei vavasa a inigogona pagu mine sou vuso a vanunua ma tavivine na magamaga. Noa ei silimuli e Salemo me Salemo ei vate ei a bilesina bibi, tomane Salemo ei goli le sou vuso a vanunua sou silimuli e ei.

8 Na silimulina moni, ilala Salemo ei toleale Abraham, ei ogomuli a inade mine Salemo me ei ilisitase a aubu minei, me ei asu usino na avena magamaga tasa e Salemo ei kale ni bilii e ei tomane a magamaga minei bilesi. Abraham ei ma muada oto ei ni asu usiva, moni ei silimuli, me ei asu. 9 Na silimulina minei, ei asu malu na magamaga lisa Salemo ei vei ni bilii e ei iodo. Ei tige a luma bale na magamaga do me ei malu pilu e Aisak me Iekop tomane a bibi mina abuna sea. Ede sou vuso a vanunua Salemo ei gatunasobesi ni bilii a magamaga do usino ne sou. 10 Vuna taliuliu Abraham ei magitalitali ni ite a aubu buobuo do ei muina sagali sele, ede a aubu buobuo Salemo tasa moni ei niage me ei tige. 11 Abraham me Sara sulu buosi ma ilala mina natuana i pulosi. Moni Sara ei guale a sagagalina i mapigogoi ei ni natua. Vuna ei silimuli maido, “Salemo ei adegatunasi ne eau na natua.” 12 Maido ma bibi iodo ei palea bibi buosi me ei bisii moni ni mate, moni ei palea tamane selebanini makuba sele, tomane a mataidoido vuso na langi ma magamaga lealea mina mado i ma mapigogoi ete a bibi ni gi e sou.

13 Vanunua ieli sou silimuli e Salemo pea na ilala sou mate. Ilala sou eili na magamaga, sou ma guale ete a golugolu Salemo ei adegatunasobesi ni bilii e sou. Moni sou gegemu usino na golu vuso do ino bulago sele ane sou, me so monge a niitene sou. Me sou ma maela oto a ademuadana maido, “Amiteu malu na magamaga ieli tomane a vanunua ma tavivine mina avena sea. Amiteu asu usinani te malu bisii moni na magamaga ie.” 14 Mane eitou longe a vanunua ma tavivine sou goli a matana inade maido, de eitou muada, sou kale ne sou veteliu usino na magamaga ivu mine sou. 15 Mane sou damutaletale moni a magamaga sou ilisitase do, io sou mapigogoi ne sou veteliuale lei. 16 Moni sou kale mamai sele ne sou guale a magamaga sea, ei doana mamau lou mei vululusi sele a magamaga iedo. Ede a aubu mina langi. Me sou a vanunua do sou tole e Salemo maido, “Oo e Salemo mine amiteu.” Salemo ei ma maela oto a veipalena mine sou odo, mei masusuliosi a aubu buobuo tasa ane sou.

17-18 Salemo ei adegatuna ane Abraham maido, “Maino ne Aisak moni sou a abuna tubutubune natatumu ne sou palea.”[a] Moni a ilala Salemo ei tove Abraham ni valipute e natune ei tasa moni iedo tomane a niabi, io Abraham ei silimuli e Salemo mei bilii e Aisak usino ne Salemo. 19 Abraham ei damutatala maido, “Mane Aisak ei mate, muina, Salemo ei mapigogoi ni mailisiliu e ei.” Maido me eitou mapigogoi neitou vei maido, Abraham ei gualeliu e natune ei na minate.

20 Na silimulina minei, Aisak ei maibalave Iekop me Iso a golugolu ei ni palea ane sulu mulimuli.

21 Na silimulina moni, na ilala bisii moni Iekop ei ni mate, ei maibalave natuna bibi lua mine Iosep. Me ei magili a too minei, me ei kaka ane Salemo.

22 Na silimulina moni, na ilala bisii moni Iosep ei ni mate, ei vei maido, mulimuli sou e Israel ne sou ilisitase e Isip, me na ilala do ne sou guale a tuatuane ei.

23 Ilala tinane Moses ei vasusu ei, na silimulina moni, tinana me tamana sulu ite ei a doana bibaini sele. Maidolo me sulu tau oovi e ei mapigogoi a game tolu. Sulu ma lae oto a punope na inade mina mapana.

24 Na silimulina moni, ilala Moses ei buosi, ei ma kale ete ne sou tole ei e natune natuna tavine mina mapana mine Isip. 25 Ei damutale, puiale ei ni guale a mavaana pilu e sou a vanunua ma tavivine mine Salemo. Ei ma kale ete ni ogomuli a inigogona mina sinusu mei ni guale a munonge na magamaga na ilala i boto moni. 26 Ei damutale maido, a maelana ei guale mina aisane Krais, ielili ei ni vululusi sele a golugolu doana vuso mine Isip. Ei damutale a mapa doana Salemo ei ni bilii e ei mulimuli.

27 Na silimulina moni, Moses ei ma lae oto a sinoana mine mapana me ei ilisitase Isip. Moni ei magili sagali sele, vuna Moses ei gemuale e Salemo eitou ma mapigogoi ete neitou ite na matane eitou. 28 Na silimulina minei, Moses ei vei le sou e Israel ne sou ogomuli a malada na asuleletasena me ne sou savei a daladala na tematema mine sou, dae ne sou a bineanea ni valipute a matalagulagu mine sou e Israel.

29 Na silimulina mine sou, sou e Israel sou asiuti a dasi kasososo tomane moni sou asu na magamaga i tagasa. Moni ilala sou e Isip sou tove ne sou ogomuli e sou e Israel, sou pumumutu vuso.

30 Na silimulina mine sou, sou asu saiili a bigomu mina aubu buobuo e Ieriko mapigogoi a malada padilua, io a bigomu ei talolobe utano.

31 Na silimulina moni, sualolona tavine e Rahap ei buloi a bibi lua na gemuoovuna. Maidolo me ei ma mamau oto pilu a vanunua ma tavivine sou saukikiki a inade mine Salemo.

32 Moni seidei eau na toesusui sei inade lou? Eau a matailala boa mina mapamulina ane Gideon, Barak, Samson, lepta, Devit, Samuel, me sou a vanunua na malongolongona. 33 Na silimulina, sou vululusi a vanunua na maubina mine sou a mapana makuba me sou goli a inigogona i bilesi. Sou guale a golu vuso e Salemo ei adegatuna ni bilii e sou, me sou tabesobe a asene sou a laion. 34 Sou soe mate a oavi taula. Sou taotase a viso lagolago i binaso. Sou ma isa oto a sagalina buo, moni mulimuli sou guale a sagalina me sou palea a vanunua sagali sele mina maubina. Sou votetase a abuna vanunua na maubina buobuo mine sou a abuna sea. 35 Tavivine sanii sou gualeliu a maututune sou so matesi. Sou a butu sou malaitabe sele sou mapigogoi ne sou mate i. Sou a butu sou vei maido, mane sou lametase Salemo, io ne sou toemalemale sou. Moni sou saukiki a inade mine sou, vuna sou damutatala maido, mane sou mate, ne sou ilisiliu na minate me ne sou guale a maulina i doana lou. 36 Sanii sou guale a mavaana maino ne sou a butu sou adepintola ane sou me tibi e sou, me sou papale sou a sen me tau e sou na luma na tunuui. 37 Sou a butu sou ubi e sou a vatu, me sou soeuti a mainine sou a so na maduna lua. Sou utimate sou a viso. Sou kai a uliulina sipsip ma meme tomane a malo me sou asu oovu moni usinosi. Sou boto a gona inani me sou vitolo sele, ma vanunua sou bilii e sou a davutina me sou goli a inigogona pagu sele usino ne sou. 38 Maidolo me sou asu maisaba me sou ovu na magamaga a vanunua boa me na avena loeloena, me na babe na vatu me na aova lilo na magamaga. A vanunua ma tavivine mina magamaga sou ma mapigogoi sele ete ne sou malu pilu e sou a vanunua ma tavivine odo.

39 A vanunua ma tavivine vuso do sou silimuli e Salemo, me sou guale a aisa doana sele maino ne Salemo. Moni a ilala sou malu na magamaga, sou ma guale ete a golu Salemo ei adegatuna i ni bilii e sou. 40 Vuna, lisa otosi Salemo ei masusuliosi a golu tasa doana lou ane eitou vuso, me ei ma kale ete ne sou a vanunua ma tavivine lisa dolo ne sou palea doana ivu pala ane eitou. Ei kale ne eitou palea doana ivu pilu e sou.

<- Hibru 10Hibru 12 ->