1 Seidei eau na asuale amutou matolunai, ma Laulau mine Salemo i vei maido, “Mane a bibi lua ue tolu ue visa sou vei sou ite a bibi ei goli a inigogona i ma puiale ete, io eitou mapigogoi neitou toebilelesi a inade.” 2 Ilala maluanai eau malu pilu e amutou eau vei ana vanua sou goli a sinusu lisa me sou a vanua sea tamai a inigogona toebilelesina eau kale na goli. Me seidei eau eili bulago me eau vei ane sou lou maido, mane eau veteliu lou usino ne amutou, eau na ma itetase sabubi ete a vanua sou goli a sinusu. 3 Amutou kale ne amutou muada, Krais ei malongolongo a inade na asegu, ue boa? De ilala Krais ei toebilelesi e amutou, ne amutou muada ivu. Me longe. Krais ei ni ma bale oto a toebilelesina inigogona mine amutou. Boa. Ei ni maite sele amutou a sagagalina minei. 4 Ivu, lisa ei ma isa oto a sagagalina me sou gati e ei na tauvaleuti. Moni na sagagalina mine Salemo seidei ei eili mauli. Me amiteu tamai ma isa oto a sagagalina, moni amiteu valitole Krais, me na sagagalina mine Salemo ne amiteu malu mauli pilu e ei. Me ne amiteu mapale a sagagalina do balivua ne amutou.

5 Ne amutou gegemuliale iiti e amutou oto me ne amutou pogevuti a silimulina mine amutou ei ivu ue boa. Nane amutou ma muada oto e Iesu Krais ei ino na lilone amutou? Mane ei ma pilu oto e amutou, io amutou ma silimuli ivu ete ei. 6 Me eau kale ne amutou pogevuti maido, amiteu goli ivu a pipigona mine Krais. 7 Me amiteu kakake Salemo ei ni buloi e amutou ne amutou ma goli ete a inigogona pagupagu. Amiteu ma damu oto ve ne amutou ite amiteu tomane a vanua na pipigona mine Krais na kinaka mine amiteu ie. Golu tasa boa, amutou damu ve amiteu a aualana vanua na pipigona moni, masagana buo mine amiteu ei maido, amiteu kale ne amutou goli a inigogona bilesi moni. 8 Amutou muada, eitou ma mapigogoi ete neitou goli a golu tasa mina soetolena inade patotona. Boa. Neitou pipigo a buloina inade patotona moni. 9 Mane amutou ino sagali me amiteu ma isa oto a sagalina, amiteu mongemonge. Maido me taliuliu amiteu kakake Salemo ne amutou palea a bilesina vanunua sele. 10 Bibi Taula i matoale eau mina itealena pipigona minei, me ei bilii e eau a sagagalina mina gunolina pipigona ie. Me seidei eau niage a inade ieli usino ne amutou na ilala eau saboa eili bulago, vuna ilala eau asuale amutou, eau ma kale ete na goli a inade sagali mina toebilelesina inigogona mine amutou. Bibi Taula i bilii e eau a mui ieli mina masagalina silimulina mine amutou, ma mui minau ieli ei mina toegegeline amutou boa.

11 Io, tamtamaigu, amutou longemuli e eau. Namutou mongemonge moni. Amutou vuso namutou palea a bilesina vanunua sele me mu ugu lilo tasa moni ma lilone amutou ni mea moni. Me eau kaka ane Salemo maido, ei bilii e amutou a lilone ei me ei bilii e amutou a lilomeana, ei ni muina pilu e amutou.

12 Na inigogona mine eitou vanunua ma tavivine mine Salemo, amutou vuso tastasa ne amutou vate oaso kubaana usino ne amutou oto lilo ne Krais. 13 Vanunua ma tavivine vuso mine Salemo sou vate oaso kubaana usino ne amutou.

14 Eau kaka maido, Bibi Taula Iesu Krais ei ni dode amutou, me Salemo ni bilii a lilone ei usino ne amutou, ma Maolona Nunu ni toe amutou vuso ne amutou lilo tasa ivu.

<- 2 Korin 12