BHAEBHULANIA 3

A Yeshu ni Bhakulungwa Kupunda a Musha

1 Kwa nneyo mmaakulupalila ajangunji, mmandunji bha ukonjelo nshemilwenje, na a Nnungu, nibha bhandunji bhabho malinga uwe mwaaganishiyanje a Yeshu ni a Ntume na Bhakulungwa Bhaabhishila bhutukwaalunguya. 2 Bhashinkubha bhaakulupalika kwa a Nnungu bhaabhishile bhatende liengo lila, malinga a Musha shibhashite kulupalika nnyumba jowe ja a Nnungu. 3 A Yeshu bhanapinjikwa kuishimika kupunda a Musha, malinga nkushenga nyumba anaishimika kupunda nyumba jiyene. 4 Pabha kila nyumba pujishengwa naka mundu, ikabheje a Nnungu ni bhaashenga bhapengenye indu yowe. 5 A Musha bhashinkukulupalika nnyumba jowe ja a Nnungu, bhalibheleketa ga indu ipinga kwiya lugulwa. 6 Ikabheje a Kilishitu bhanakulupalika nnyumba ja a Nnungu malinga Mwana akwete ukulungwa. Uwe twaashayene ni nyumba jabho, tupundaga kola makangala na tama nkwaakulupalila a Kilishitu.

Kuleya ga Ungakulupalila

7 Kwa nneyo, malinga shaabheleketa Mbumu jwa Ukonjelo,

“Monaga lelo mpilikanangaga lilobhe lyangu,

8 nnanonopanje mitima jenunji, mbuti shibhatendilenje ashinakulu bhenunji pubhaakanilenje a Nnungu lyubha lya lingwa, kuanga kula.

9 Kwekula ashinakulu bhenunji bhashinkuninganga,

Nkali bhaibhweninji itendi yangu yaka makumi nsheshe!

10 Kwa lyene ligongolyo nashinkulutumbalila lwene lubhelekolo gunjite,

‘Mobha gowe bhanapuganyikanga,

Bhakaakagulanga mipanda Jangu.’

11 Bhai, nkutumbala gunumbile,

‘Bhakajinjilanga pa shipumuli shangu.’ ”

12 Bhai ashaalongo ajangunji, mwiteiganje anapagwe munkumbi gwenunji jojowe jwa ntima gwangali gwa mmbone na ukaakulupalila, ukwaabhambala a Nnungu bhakwete gumi. 13 Ikabheje kutagana ntima mobha gowe, kila pwiikushemwa “Lelo”, nkupinga mundu jojowe munkumbi gwenunji anatembwe na yambi nibha jwa mitau. 14 Pabha uwe tubhowe tunalundana na a Kilishitu ibhaga tubhikaga mmitima ngulupai jitukwete mpaka kumpelo.

15 Majandiko ga ukonjelo gakuti,

“Monaga mpilikanangaga lilobhe lyabho lelo,

Nnanonopanje mitima jenunji.

Malinga shimwatendilenje mobha gumwaakanilenje a Nnungu.”

16 Igala ashigani bhapilikenenje lilobhe lya a Nnungu nikwaakana? Nngabha bhowe bhalongoywenje na a Musha kopoka ku Mishili? 17 Na kabhili, ni ashigani bhaatumbeyenje a Nnungu yaka makumi nsheshe? Nngabha bhowe bhalebhilenje niwanganga nng'anga bhala? 18 Kabhili, ashigani bhubhalumbile kuti, “Bhakajinjilanga pa shipumuli shangu,” ikabhe bhalebhilenje bhala? 19 Bhai, tubhwene kuti bhangajinjilanga pa shipumuli kwa ligongo lya ungakulupalila gwabhonji.

<- BHAEBHULANIA 2 BHAEBHULANIA 4 ->