1 Damanina ba Bada Noah kurina i wona, “Kom ba am rakaraka yabata ereonowami ku waka ko riu, kairavina pipiya ereonowasi kamosi yai kom ikesim wata am wose gaigairesi ba totorisi. 2 Aba payapayaya gaigairesi ereonowasi God matanai pesi kesana kamonai sebasebare asi 7 ere kaokaowasi ke yauna. Ba aba payapayaya ereonowasi kega gaigairesi God matanai, wai pesi kesasike kamosiyai sebare ere kaowana ke yauna. 3 Ba manu ereonowasi pesi kesana kamonai sebasebare asi 7 ba bibaine 7 ke yaunisi kata yawayawasisi sina mana, ba kega asi pesi ina momosa. 4 Kao 7 murinai kusana ani porai ku dobu, ba kao 40 ba pom 40 ina kusana bonei, ba awaika ereonowasi yawayawasisi niko dobuai a wose wai ana pupuna taveyisi.”

5 Ba Bada Noah i kaotunetunei wai tupana i wosei.

6 Noah kana bodu 600 ba kutukutuba dobu i kamkutubi. 7 Ba Noah ere kaowana, ba natunatuna sebasebare ere kaokaowasi, kutukutuba nagarina wai si geru ku waka.*Matthew 24:38,39; Luke 17:27 8 God matanai manu ba aba payapayaya gaigairesi, ba kega gaigairesi, ba tano ai te botete wai ere kaokaowasi. 9 Sebasebare ba bibaine si botu Noah kurina ba ku waka si geru, mekabage God Noah i kaotunetunei wai nanakasike. 10 Kao 7 murinai kutukutuba dobu i kamkutubi.

11 Noah kana bodu 600 ba nawaravi bairuwaina, ba kao 17 kamonai tano sinenai damana okowa si rubusibusira si gae, ba kusana matam ketana sapamai i tamotatara. 12 Ba dobu ai i kusana yepo kao 40 ba pom 40.

13 Kona kaonai, Noah i gerugeru ku waka wai natunatuna Shem, Ham ba Japheth ere kaokaowasi yabata si geru. 14 Kosi yabata kamosiyai wai aba payapayaya ereonowasi, garagarai te mamana wai ba manamisi pesisi nunusi yai ba aba payapayaya ereonowasi, tano ai te botete wai pesisi nunusi yai ba manu pesisi nunusiyai, awaika ereonowana ere mapemapesi. 15 Ba aba payapayaya yawayawasisi sebasebare ba bibaine ereonowasi si botu Noah kurina ba si geru ku waka. 16 Ba aba payapayaya pesisi nunusiyai sebasebare ba bibaine si geru, mekabage God Noah i kaotunetunei wai nanakasike. Ba Bada matam keta i gudui.

17 Kutukutuba kao 40 i nebonei ba okowa i gae wai tano kamkutubi wai waka i rukaruwei. 18 Okowa i rakata saki ba dobu i kamkutubi wai waka i rukarukaruwei. 19 Ba okowa i gae saki i ragu ba koya kaikaposi ereonowasi sapama gaburinai i gae i kamkutubisi. 20 Okowa i gae yepo koya i sowo, ba i gae 20 meter rubana ba yoginaikei yebo i gae. 21 Sawara yawayawasisi ereonowasi dobu ai si rabobo, manu, ba garagara aba payapayaya ba aba payapayaya manamisi ba tano ai te botete wai, ba pipiya ereonowasi yabata. 22 Awaika ereonowasi yawayawasisi tepai si mamana wai, si rabobo. 23 Awaika yawayawasisi dobu ai ereonowasi i pupuna taveyisi, pipiya ba aba payapayaya, tanoai te botete wai ba manu kaidamonai te roborobo wai dobuai i pupuna taveyisi. Noah ba iyabosi waka kamonai kosi wata si mana.

24 Kutukutuba dobu i kamkutubi ba okowa nanakasike i mana kao 150 rubana.

<- Genesis 6Genesis 8 ->