1 Adam kaowana Eve yabata si dauwa, ba i manawa ba i tuwa wai Cain. Ba i wona, “Bada ana bibaitai ba sebare yai tuwei.” 2 Muri yai teina Abel i tuwei.

Abel wai sheep i potapotaisi, ba Cain wai baobao bitana. 3 Ba mara kesana, Cain i bokasira i botu Bada kurina ita suwara. 4 Saba Abel ana sheep mutusi natunatusi iyarokosi ba budobudosi i botuvisi Bada kurina. Ba Bada Abel ana suwara i kinani wai, i nuwagaire.*Hebrews 11:4 5 Saba Cain ana suwara wai, Bada i sinikikiyei. Cain i yagisi saki wai naona i sugoyo popokasu kasuna wata i gegae.

6 Damanina ba Bada Cain kurina i wona, “Awaika kairavina ke biyagisi, ba awaika kairavina naom i goyo? 7 Wose kuta wose kabitamni wai, ati nuwagaire, saba wose kega ku wose kabitamni wai, piragagoyo e potapotaim, ana waina ina kasibi goyonim saba, kom kuna getawani kega wai ina yaunim.”

8 Damanina Cain teina Abel i wonei, “Tana nae ku kwapu.” Ba namai kwapu kamonai teina Abel i kasibunui.*Matthew 23:35; Luke 11:51; 1 John 3:12

9 Bada Cain i toirubai, “Teim Abel memena?”

Ba i kaobeyei, “Kega a kuiri, kata yauku kana aba potapota?”

10 Ba Bada i wona, “Awaika kairavina niko wose ku wosei? Teim tarana wai tano ai e tutou kuriku saroba kairavina.*Hebrews 12:24 11 Karaku, a kaonawaim teim ku kasibunui ba tarana ku tano i sororo kairavina niko tano ini sinikikiyim. 12 Maranai tano ai kuna bagibagi wai kega kuna mariya. Bagunai wata kuna sini nubanuba saba, niko dobu ai kuni ketaketa ba kuna bubuwa neubuwa.”

13 Cain Bada i wonei, “Au saroba i rakata saki damina au yauna kabai. 14 Karaku niko kupurai ke bipora taveyiku ba kuna ma kupusiku ba niko dobu ai, ana bubuwa neubuwa kega ani yakam, ba kotoi wata ina pananiku wai ina kasibunuiku.”

15 Saba Bada kurina i wona, “Kega rubana; kotoi wata ina kasibunuim wai, kona ana saroba kega kom rutainim, kona ana saroba wai ina rakata saki, ana rakaraka asi 7 sina rabobo.” Ba Bada Cain i kao papari kata kotoi wata ita panani wai kega ita kasibunui. 16 Damanina Cain Bada i kasibau taveyei ba i nae ku Nod.*Nod basuna wai ketaketa damana kona bubuwa neubuwa. Eden ku maramatana mena ba namai i mana.

17 Cain kaowana yabata si dauwa wai i manawa ba natusi Enoch i tupuwa. Kona maranai Cain meyaga kaikapona i bowabowai ba, meyagina kana waba i yorei Enoch natuna yabata si warigeya. 18 Enoch natuna wai Irad, ba Irad natuna wai Mehujael, ba Mehujael natuna wai Methushael, ba Methushael natuna wai Lamech.

19 Lamech bibaine ruwamo i rabaisi. Kesana kana waba Adah ba kesana wai Zillah. 20 Adah i tuwa wai Jabal ba kona guguba bowaina ba manina i dagui ba yebo aba payapaya potaisi i dagui. 21 Ba teina kana waba Jubal ba kona sawara gita rutainina kana waba harp biyakwarina, ba biwepururu i dagui. 22 Zillah yebo natuna sebare Tubal-Cain ba kona wai kirama i wosewose Ba Tubal-Cain nobuna wai Naamah.

23 Lamech kaokaowana ruwamo i wonisi i wona,

25 Adam kaowana yabata si dauwa mena, ba i tuwa wai sebare. Eve kana waba i yorei Seth. Ba i wona, “God natuku kesana yebo i beriku, Abel wasana i kausani kairavina Cain i kasibunui.” 26 Seth yebo natuna sebare i tupuwa ba kana waba i yorei Enosh.

Kona maranai pipiya si dagui Bada kana wabai si bopepeta.

<- Genesis 3Genesis 5 ->