1 Kona maranai Levi rakarakana kamonai, sebare kesana yebo Levi wasike i rabai, 2 ba i manawa ba i tuwa natuna sebare. Ba i kinani wai, pepeya nuwarubarubana wai i buneyei navaravi tonu rubana.[a] 3 Saba kega rubarubana nanakasike iti buniyena manei wai, keyama kana waba papyrus ruraunai sinana tegara konai i bowai ba sawara kana waba tar i yauni ba i pasipasi potapotai. Ba pipiyinaikei i wani ku kamona ba Nile okowina parinai weguru kamosi yai i terei. 4 Ba nobuna wai yogina rabarabai i msi taveyana i bo kibukibui, kata awaika kurina ita tupuwa.

5 Ba Pharaoh natuna wasike i gakira ku okowa iti towatowa, ba okowa parinai kana aba potapota yabata si yewo si nenae, wai i kinana kata, tegara weguru kamosi yai i kitai, ba kana aba potapota wasike kesana, i porai ita yauni. 6 Maranai i botatari wai pepeya i kinani i tutou, wai i kamyosukuwei. Ba i wona, “Nikona wai Hebrew biyisi natusi.”

7 Damanina ba nobuna i nae, Pharaoh natuna wasike i toirubai, “Mekabage, ana nae Hebrew wasike kesana ana urabai kata pepeya kairavim ini tomani?”

8 Kona i kaobeya, “Eee, ke nae.” Ba wasikena i nae kata pepeya sinana damana i urabai. 9 Pharaoh natuna wasike kuurin i wona, “Niko pepeya ke yauni ba kairaviku ki tomani ba ani maisanim.” Kata wasikena pepeya i yauni i nae ana ku yove ba namai i potai.

10 Maranai pepeya i rakata wai i yauni i nae Pharaoh natuna wasike kurina, ba kona i natunei.[b] Ba kana waba i yorei Moses, kairavina i wona, “Kona wai okowa kamonai a taina geyei.”

11 Moses i waraete murinai, kao kesana i kasibau ana pipiya damana memena si mamana wai kurisi, ba si saibisaibira wai i bokibukibuisi. Ba i kinakinana ba Egypt biyina Hebrew sebare, kona mom ana pipiya kesana i raviravi. 12 Kata i kita nanaga nikei ba nokoi ba, kega kesana kotoi i kinani wai, Egypt biyina i kasibunui, ba tore i sarei ba i dogui.

13 Mara i tom wai i kasibau ba Hebrew biyisi asi ruwamo i kinanisi si birauwa. Ba kotoi birauwa i dagu wai, kona i toirubai, “Awaika kairavina Hebrew kwainam ke raviravi?”

14 Ba sebarena i wona, “Kom kotoi bibadana i berim kata kuni buibuiyikai, kom ke nosinosi, Egypt biyina ku kasibunui wai nanakasike kuna kasibunuiku?”[c] Damanina Moses i nagara ba i nuwasuya, “A nosinosi awaika a wosei wai si kuira roboi.”

15 Maranai Pharaoh nikona i nonori wai, i baga saki kata Moses ita kasibunui. Saba Moses, Pharaoh nagarina i vera i nae ku Midia ba namai i mana.[d]