5 Maranai Egypt kana taupauma Pharaoh si wonei kata pipiya wai si vera wai, ana babadisi yabata nuwanuwasi si nebirabira ba si wona, “Kota awaika ta wosei? Kota Israel biyisi ta boterisi si nae ba karaku kotoi ina bo saibisaibirita!” 6 Kata ana chariot si bobunagi ba ana abiabiyisi yabata i yaunisi. 7 Ba ana chariot abiya woraworasi asi 600 i yaunisi, ba yebo Egypt ana chariot mutusi yabata ere kasi babada kesakesasike sita pota wai i urabaisi. 8 Ba Bada Pharaoh, Egypt kana taupauma nuwanuwana i badobadoi, wai Israel biyisi ere tepatorasi si yewoyewo wai i vera nunurisi. 9 Ba Egypt biyisi ba Pharaoh ana horse ba chariot pipiyisi, ba horse pipiyisi ba ana abiabiyisi si vera nunurisi yepo, Pi Hahiroth enaga parinai Baal Zephon sepinai, si kwanatu wai namai si taina tawanisi.

10 Ba Pharaoh i veravera kasibau maranai wai, Israel biyisi si tagagawa kata Egypt biyisi wai, murisi yai si kewai si daru si botubotu. Kosi si nagara saburere wai Bada kurina si tou gagawa. 11 Ba Moses kurina si wona, “Mekabage, kata Egypt kamonai karawaga kega wai ku uraba kasibauwikai kata nina kupura momnai kana rabobo! 12 Ka wonim, kata Egypt kamonai kuta boterikai, kata bosaibisaibirisi, i gaire kata Egypt biyisi kata bo saibisaibirisi ba ka botubotu yepo nina kupura momnai kana rabobo!”

13 Moses pipiyisi i kaobeyisi, “Kega kona nagara. Ko msi kikita ba Bada niko kaonai ini yawasimi kona kinani. Karaku nikosi Egypt biyisi ko kinakinanisi wai kega kona kinana meyisi. 14 Koi raoboraobo ba Bada kairavimi ini rauwa.”

15 Damanina ba Bada Moses kurina i wona, “Awaika kairavina kuriku ke tutou? Israel biyisi ke wonisi sina nae mom. 16 Am ruwakuna ke bokabari ba nisa tepanai ke kotoi kata okowa basuna ini baubaurani ba Israel biyisi tano gasarinai sini garubona. 17 Yauku Egypt biyisi ani nuwa badobadoisi wai, murisi yai sina vera nunurisi. Ba Pharaoh, ana abiabiyisi, ana chariot ba horse pipiyisi ana gebinubaisi, kairavina kosi kamosi yai wai, yauku kadara ana yauni. 18 Maranai ana gebinubaisi wai Egypt biyisi au kadara sina kitai ba sina kuiri kata Yauku kona Bada.”

19 Damanina ba God ana aneya Israel biyisi mamanina i binaovisi wai, i muritaina i veramaga ku murisi. Ba guba kasu rutainina yebo i muritaina ku murisi. 20 Guba Israel biyisi ba Egypt biyisi basusi yai i msiri. Kona pomnai guba i wosei kata Egypt biyisi wai baidibarai si mamana, ba Israel biyisi wai yaseganai. Kata pom veoromina wai kosi kega rubana sita botu ku parisi.

21 Moses yarona enaga tepanai i kotoi, ba Bada sibe maragasina maramatanai i porai wai enaga i rubukoini i veramaga ba tano i gasari. Kata okowa i keyauwari ku sepinai ba yebo ku sepinai, 22 kata Israel biyisi tano gasarinai si garubona ba enaga wai papa rutainina kasusi ai ba gedusi ai si mana.[a]

23 Ba Egypt biyisi murisi yai si kwabinisi, Pharaoh ana horse ba chariot ba horse pipiyisi yabata si kibisi ku enaga si gakira. 24 Matapa mara i tomtom ba Bada keyama karakarasina, kasu ba guba kamonai Bada i giyou Egypt biyisi asi abiabiyisi i kinanisi, ba i wosisi wai si bo negenegisi. 25 Kata asi chariot kaesi si tamotaveyana, kega rubana sita vera. Ba Egypt biyisi si wona, “Bada Israel biyisi kairavisi Egypt ebi abiyei wai nagarisi tana vera!”

26 Damanina ba Bada Moses kurina i wona, “Yarom enaga tepanai ke kotoi kata okowa ina veramaga mena ba Egypt biyisi ba asi chariot pipiyisi yabata ina kutubisi.” 27 Kata Moses yarona enaga tepanai i kotoi ba mara i tomtom wai okowa yebo i veramaga kana ku gawara mena. Egypt biyisi okowa nagarina asi waina sita vera saba Bada ku enaga i kutubisi. 28 Okowa i veramaga ba chariot ba horse pipiyisi ba Egypt abiabiyisi ereonowasi Israel biyisi si kibisi si gakira ku enaga wai si toma bunuwa, kega kesana i yawasa.

31 Maranai Israel biyisi Bada ana maragata kaikapo sakina i debei si kinani ba mekabage Egypt biyisi i gebinubaisi wai kawasi si saeke damanana, ba Bada si wareyei, ba si kumarei, ba ana saibisaibirina Moses si geruwei.

<- Exodus 13Exodus 15 ->