1 “Warewaresiku ba tamatama, koi tainabaenega, te bikunumakiku wai kairaviku ani sisiya.” 2 Maranai si nonori kata Hebrew gamosi yai i sisiya kurisi wai si boguguba damana.

Ba i wona, 3 “Yauku kona Jew sebare Tarsus kamonai a tupuwa, meyaga kaikapona Cilicia kupurina kamonai. Saba Jerusalem kamonai a rakata, Gamaliel*Acts 5:34-39 gaburinai a kiruma, tamatamata asi kairuwana i beyebeyiku ba God a bokuwaya sakiyei, nanakasike karaku komi rutainimi. 4 Pipiya Keresiyana biyisi asi keta si bisununuri wai a patumisi ba a kasibigoyonisi, ba ku patum yovena ai garu riuvisi.*Acts 8:3, 26:9-11 5 Priest kaikapona ba babada sina wonimi kata bisuwona nikasike a wosei. Ba kosi karisi yai pepa a bosekwai, warewaresisi Damascus kamonai te mamana wai kairavisi ba a nae nikosi pipiya, ata patumisi ba ata veramaga ku Jerusalem wai asi saroba sita yauni.

6 Kao basunai a botu Damascus parinai ba, mara kesana yasegana kaikapona sapamai i bokadari wai yaseganina i subibiriku. 7 A peku ku tano ba gamo a nonori kuriku i wona, ‘Saul! Saul! Awaika kairavina ke kasikasibigoyoniku?’

8 Ba ai toiruba, ‘Kom kotoi Bada?’

I kaobeyiku, ‘Yauku Iesu Nazareth biyina ba kom ke kasikasibaigoyoniku.’ 9 Maturaturaku yabata yasegana si kitai saba gamo i bisisiya kuriku wai kega si nonori.

10 Ba ai toiruba, ‘Awaika ana wosei Bada?’

Ba i wona, ‘Ke bomsiri, ba kuna nae ku Damascus, ba namai sina wonim kata God am saibira ereonowana awaika i taunim wai kuna wosei.’ 11 Maturaturaku nimaku si yauni, ba si naoviku ka riu ku Damascus, basuna yasegana ana kadara kaikapona wai mataku i sowasowa.

12 Sebare kana waba Ananias i botu i kinaniku. Kona wai pipiya si bokuwayei ba kairuwana ibo sisirei ba, Jew biyisi ereonowasi namai te mamana wai, si bokuwayei. 13 Ba i botu pariku ai i msiri ba i wona, ‘Waresiku Saul, ki kinana mena!’ Ba kona maranai ai kinana mena ba a kinani. 14 Damanina ba i wona, ‘Tamatamata asi God i bineim kata ana waina kuna kuiri, ba Baibaiyawasina Kaobaisiyena kuna kitai, ba wona kawanai kuna nonori. 15 Kom ana bai mamatara biyim, awaika ereonowana ku nonori ba ku kinakinani wai pipiya kurisi kuni mamatarei. 16 Awaika ke potapotai? Ke bomsiri ba kuna babataito. Ba am piragagoyosi Iesu kana wabai kuna yorei wai ina yauna taveyei.’

17 Maranai a veramaga ku Jerusalem ba God ana yove kamonai a rupari wai aba kinakinanai, 18 Bada a kitai i wonewoniku, ‘Yagiyagina! Jerusalem ke kasibau taveyei kairavina awaika yauku kairaviku kuni sisiya wai sini sinikikiyei.’

19 Ba Bada a kaobeyei, ‘Nikosi pipiya si kuiri kata yauku Jew biyisi asi dugu yove nunusi yai a riu ba kom si bigeruwim wai pipiyisi a patupatuisi ba a gudagudaisi. 20 Ba maranai Stephen tarana i tamosewa wai a msi gwabi, ba ai damaninei ba kasibunuwa biyisi kasi tarasowo a koyakoyaga ba si kasibunui.’*Acts 7:58

21 Damanina, ba Bada kuriku i wona, ‘Ke nae, ani poraim ku rabaraba Gentile biyisi kurisi kuna nae.’ ”

22 Paul sibi tainabaenegei yepo nikona i wonewonei, wai gamosi kaikaposi yai si parara, “Ko naveyei! Ba ko kasibunui! Kega rubana ina mana!”

23 Ba si paraparara ba kasi kwama si botavetaveyana ba popokau si bigarugaru ku kaidamona. 24 Kata abiya badana i kaobiyoyobanisi Paul sita naveyei abiabiyisi asi ku yove. Ba i wonisi kata sita ravi ba sita kuiri awaika kairavina, Jew biyisi kurina nikasike si parapara. 25 Ba maranai si kau patupatumi ba ravina kairavina, wai Paul abiabiyina kesana i bimsiri wai kurina i wona, “Kairuwana ebi damanina kata Rome pipiya kota ravi, ba koti kunumaka kwarumei kona?”

26 Maranai abiabiyina nikona i nonori wai i nae abiya badana kurina ba i toiruba, “Kom awaika ke wosewosei? Niko sebare wai kona Rome biyina.”

27 Abiya badana i nae Paul kurina ba i toirubai, “Ke woniku, kom Rome pipiya kona?”

Ba I kaobeyei, “Eee. Yauku kona Rome biyiku.”

28 Ba abiya badana i wona, “Yauku mane kaikaponai ai maisa wai karaku ai Rome pipiya.”

Saba, Paul i kaobeyei, “Yauku kona a tupuwa, Rome sebare.”

29 Kosi iyabosi si dagui sita ravi ba siti kasekasemaini wai si msi sairei. Abiabiyisi asi bada i nagara saki maranai ibo panani, kata Paul wai Rome sebare, ba i wona wai chain yai si kaupatupatumi.

30 Mara i tom wai abiya badana ana waina ita kuira kabitamni, awaika kairavina Jew biyisi Paul si kunumakei. Kata Paul i tombauni ba priest kaikaiwabosi, ba Sanhedrin ereonowasi i wonisi si notuwa. Ba Paul i botuwei naosi yai i msiri.

<- Acts 21Acts 23 ->